ສົງຄາມນ້ຳມັນດຸເດືອດ ຊາອູດິດຈະເພີ່ມກຳລັງການຜະລິດຄັ້ງມະໂຫລານ ຕອບໂຕ້ລັດເຊຍ

ລາຍງານ 11 ມີນາ 2020, ທ່ານ ອາມິນ ນາສເຊີ ປະທານຄະນະຜູ້ບໍລິຫານ (CEO) ຂອງບໍລິສັດຊາອູດິອາຣາມໂກ ລັດວິສາຫະກິດດ້ານພະລັງງານລາຍໃຫຍ່ທີ່ສຸດຂອງອາຣັບບີ ຊາອູດິດ ຖະແຫຼງເມື່ອວັນອັງຄານ 10 ມີນາ ທີ່ຜ່ານມາ ວ່າໄດ້ກຽມເພີ່ມເພດານການຜະລິດນ້ຳມັນດິບເປັນ 12.3 ລ້ານຖັງຕໍ່ວັນ ຕັ້ງແຕ່ວັນທີ 1 ເມສາທີ່ຈະມາເຖິງນີ້ເປັນຕົ້ນໄປ.

ປັດຈຸບັນກຳລັງການຜະລິດນ້ຳມັນດິບຂອງອາຣັບບີ ຊາອູດິດ ປະເທດຜູ້ຜະລິດ ແລະ ສົ່ງອອກນ້ຳມັນດິບລາຍໃຫຍ່ທີ່ສຸດຂອງໂລກ ຢູ່ທີ່ປະມານ 9.8 ລ້ານຖັງຕໍ່ວັນ, ການປະກາດດັ່ງກ່າວຈຶ່ງໝາຍຄວາມວ່າເປັນການເພີ່ມເພດານການຜະລິດອີກ 2.5 ລ້ານຖັງຕໍ່ວັນ ແລະ ຊາອູດິອາຣາມໂກຢືນຢັນວ່າ ການຕັດສິນໃຈຄັ້ງນີ້ຈະສົ່ງຜົນດີໃນໄລຍະຍາວ ໂດຍຍັງບໍ່ໄດ້ໃຫ້ຂໍ້ມູນຊັດເຈນວ່າຈະຍົກລະດັບການຜະລິດດົນປານໃດ.

ຂະນະທີ່ທ່ານ ອະເລັກຊານເດີ ໂນວັກ ລັດຖະມົນຕີກະຊວງພະລັງງານຂອງລັດເຊຍ ກ່າວວ່າອຸດສາຫະກຳນ້ຳມັນດິບຂອງລັດເຊຍຍັງມີຄວາມສາມາດພຽງພໍໃນການແຂ່ງຂັນ ທ່າມກາງຄວາມຜັນຜວນຂອງຕະຫຼາດໂລກ, ໂດຍໃນໄລຍະສັ້ນອາດເພີ່ມກຳລັງການຜະລິດອີກ 200,000-300,000 ຖັງຕໍ່ວັນ ແລະ ອາດເພີ່ມເປັນ 500,000 ຖັງຕໍ່ວັນໃນໄລຍະຍາວ.

ແຕ່ລັດຖະບານລັດເຊຍຍັງເປີດກວ້າງທີ່ຈະເຈລະຈາອີກຄັ້ງກັບອົງການກຸ່ມປະເທດຜູ້ສົ່ງອອກນ້ຳມັນ (ໂອເປັກ), ສ່ວນໃນດ້ານກອງທຶນສຳຮອງແຫ່ງຊາດຂອງລັດເຊຍຢືນຢັນວ່າ ລັດເຊຍມີຊັບສິນພຽງພໍທີ່ຈະເອົາຕົວລອດໄດ້ ຫາກນ້ຳມັນຈະມີລາຄາໃນລະດັບ 25-30 ໂດລາສະຫະລັດຕໍ່ຖັງ ເປັນໄລຍະເວລາ 6-10 ປີ.

ເຊິ່ງໂອເປັກ ແລະ ກຸ່ມປະເທດຜູ້ຜະລິດນ້ຳມັນດິບລາຍໃຫຍ່ທີ່ບໍ່ແມ່ນສະມາຊິກໂອເປັກ ເຊິ່ງນ້ຳໂດຍລັດເຊຍ ໄດ້ພົບປະຫາລືກັນເມື່ອອາທິດທີ່ຜ່ານມາ ເພື່ອຫາແນວທາງອຸ້ມລາຄານ້ຳມັນໃນຊ່ວງວິກິດການແຜ່ລະບາດຂອງເຊື່ອຈຸລະໂລກໂຄໂຣນາສາຍພັນໃໝ່ ຫຼື ໂລກໂຄວິດ-19 ທີ່ເຮັດໃຫ້ອຸປະສົງໃນຕະຫຼາດຫຼຸດລົງຢ່າງໜັກ ແຕ່ທັງສອງຝ່າຍຕົກລົງກັນບໍ່ໄດ້ ແລະ ຕ່າງປະກາດຍົກເລີກການຈຳກັດໂຄວຕ້າການຜະລິດ, ສົ່ງຜົນໃຫ້ສັນຍາຊື້-ຂາຍນ້ຳມັນດິບໃນຕະຫຼາດໂລກຫຼຸດລົງກວ່າ 20% ຈົນກາຍເປັນສະຖິຕິຕ່ຳສຸດນັບຕັ້ງແຕ່ສະໄໝສົງຄາມອ່າວເປີເຊຍ.

ໃນດ້ານຂອງນັກວິເຄາະຕີລາຄາວ່າ ການຕັດສິນໃຈຂອງອາຣັບບີ ຊາອູດິດສະແດງໃຫ້ເຫັນວ່າ ຕ້ອງການພິສູດຕົວເອງເພື່ອຮັກສາສະຖານະເສດຖີນ້ຳມັນອັນດັບໜຶ່ງຂອງໂລກ ທ່າມກາງການແຂ່ງຂັນຍາດແຍ່ງສ່ວນແບ່ງໃນຕະຫຼາດໂລກກັບລັດເຊຍ ແລະ ສ.ອາເມຣິກາ.

HTML tutorial