ດ່ວນ…!​ ເກົາຫຼີເໜືອ-ເກົາຫຼີໃຕ້ ດວນປືນຂ້າມເສັ້ນແບ່ງເຂດແດນ ອັນໄດ້ເພີ່ມຄວາມເຄັ່ງຄຶງໃຫ້ແຫຼມເກົາຫຼີ

ລາຍງານ 3 ພຶດສະພາ 2020, ກະຊວງປ້ອງກັນປະເທດເກົາຫຼີໃຕ້ອອກຖະແຫຼງການວ່າ: ທະຫານເກົາຫຼີເໜືອໄດ້ຍິງປືນຫຼາຍນັດມາຍັງຈຸດສັງເກດການທາງທະຫານຂອງເກົາຫຼີໃຕ້ ພາຍໃນເຂດປອດທະຫານ (DNZ) ບໍລິເວນເຂດຊໍວອນ ໃນແຂວງຄັງວອນ ທີ່ຢູ່ທາງທິດຕາເວັນອອກສຽງເໜືອສຸດຂອງເກົາຫຼີໃຕ້ ແລະ ມີຊາຍແດນຕິດກັບເກົາຫຼີເໜືອ ເມື່ອເວລາ 07:41 ນາທີ ຕາມເວລາທ້ອງຖິ່ນຂອງວັນອາທິດນີ້.

ພາຍຫຼັງເກີດເຫດກອງທັບເກົາຫຼີໃຕ້ປະກາດເຕືອນອີກຝ່າຍຫຼາຍຄັ້ງຜ່ານເຄື່ອງກະຈາຍສຽງ ແລະ ຍິງປືນຕອບໂຕ້ຄືນ 2 ນັດ ເບື້ອງຕົ້ນເກົາຫຼີໃຕ້ຢືນຢັນຍັງບໍ່ມີຄວາມເສຍຫາຍເກີດຂຶ້ນກັບໂຄງສ້າງພື້ນຖານ ແລະ ບໍ່ມີລາຍງານເຈົ້າໜ້າທີ່ເສຍຊີວິດ ຫຼື ໄດ້ຮັບບາດເຈັບ ຕະຫຼອດຮອດປະຊາຊົນທີ່ອາໄສຢູ່ຕາມເຂດຊາຍແດນ.

ຂະນະທີ່ຕອນນີ້ສະຖານະການໄດ້ສະຫງົບລົງແລ້ວ ແຕ່ຍັງບໍ່ຊັດເຈນວ່າມີຄວາມເສຍຫາຍເກີດຂຶ້ນຕາມເຂດຊາຍແດນຂອງເກົາຫຼີເໜືອຫຼືບໍ່ ແລະ ຍັງບໍ່ມີການຢືນຢັນຈາກຝ່າຍໃດກ່ຽວກັບເຫດຜົນທີ່ເກົາຫຼີເໜືອເປັນຝ່າຍິງປືນຂ້າມຊາຍແດນກ່ອນ.

ເຖິງຢ່າງໃດກໍ່ຕາມ, ການເຄື່ອນໄຫວດັ່ງກ່າວເກີດຂຶ້ນພຽງວັນດຽວ, ພາຍຫຼັງທີ່ສຳນັກຂ່າວກາງເກົາຫຼີ (KCNA) ກະບອກສຽງຂອງລັດຖະບານເກົາຫຼີເໜືອ ລາຍງານວ່າທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອປາກົດຕົວຢ່າງເປັນທາງການຄັ້ງທຳອິດໃນຮອບ 3 ອາທິດ ດ້ວຍການເປັນປະທານເປີດໂຮງງານຜະລິດປຸ໋ຍແຫ່ງໃໝ່ ທີ່ເມືອງຊັນຊອນ ໃນແຂວງພະຢອງອັນໃຕ້ ເມື່ອວັນສຸກທີ່ຜ່ານມາ ຖືເປັນການຢຸດຕິກະແສຂ່າວທີ່ວ່າທ່ານ ຄິມ ຈອງ-ອຶນ ປ່ວຍໜັກ ແລະ ມີບາງຂໍ້ມູນລະບຸວ່າໄດ້ຈາກໂລກນີ້ໄດ້ແລ້ວ.