ສປປ.ລາວ ຈະເປັນຕົວແທນອາຊຽນ ປະສານງານກັບ ສ.ອາເມຣິກາ, ໃນຂະນະທີ່ຄູ່ເຈລະຈາອາຊຽນພ້ອມໃຫ້ການຊ່ວຍເຫຼືອລາວບັນເທົາທຸກເຂື່ອນແຕກ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEgmGlSz8L-FJYi9K165plDc_yWftJPczInA_5FG0Tv_GCI6VJJ5gVhd7h7v2ebFNC17GZVo71PJ8Bru4ksiTrgHIh5bwb2StqRom7_Pc-0nnbey3zaMEBS6VLJtwMwRsHxos-iuf8HbfOA/s1600/1941.jpg)
ເມື່ອວັນທີ 3 ສິງຫາ 2018 ທີ່ຜ່ານມາ, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ພົບປະກັບທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດຂອງສະຫະລັດ ອາເມຣິກາ ໃນລະຫວ່າງການປະຊຸມລັດຖະມົນຕີການຕ່າງປະເທດອາຊຽນ ທີ່ປະເທດສິງກະໂປ, ໂດຍລັດຖະມົນຕີທັງສອງໄດ້ເນັ້ນຢ້ຳເຖິງສາຍພົວພັນທີ່ນັບມື້ນັບເພີ່ມທະວີ ແລະ ໄດ້ຍົກໃຫ້ເຫັນເຖິງໝາກຜົນອັນດີງາມຂອງການຮ່ວມມືໃນດ້ານການຊ່ວຍເຫຼືອການພັດທະນາ ບໍ່ວ່າຈະເປັນການເກັບກູ້ລະເບີດທີ່ບໍ່ທັນແຕກ, ການຊ່ວຍເຫຼືອຂອງສະຫະລັດ ອາເມຣິກາ ດ້ານມະນຸດສະທຳ ຕໍ່ຜູ້ປະສົບໄພພິບັດເຂື່ອນເຊປຽນ-ເຊນ້ຳນ້ອຍແຕກ.
![](https://blogger.googleusercontent.com/img/b/R29vZ2xl/AVvXsEgt3E1qVz5EVSgNZT97iPki2_HiPqp7hsrtx6OfvR0thW7JN3rxKvwPMP4im24sIOS0Ap3PR7BJxB2JLNTFN4CnAS4_xTlXxwJn1ow7FkXM6SiNkY1KfX0jziB6YMOe0u-UZ2zfEgXlwsQ/s1600/1940.jpg)
![](https://blogger.googleusercontent.com/img/b/R29vZ2xl/AVvXsEi2YZvf9_67LEATI0lJrl-86Ik6WeVaeKk2Fj9UHkc9KBv_w7Kp8ez5n1pGTv27AL3X6-gFOPHHPHy5jkHUkNDl4QoI_tAnTyFboug2kQd_7tM6zactL0BMwImx5iSwOaufQB1frRUe7Yc/s1600/1942.jpg)
ເຊິ່ງໃນໄລຍະແຕ່ປີ 2018-2021 ສປປ.ລາວ ຈະໄດ້ເຮັດໜ້າທີ່ໃນຖານະປະເທດປະສານງານໃຫ້ແກ່ການພົວພັນລະຫວ່າງອາຊຽນ-ສະຫະລັດ ອາເມຣິກາ ແລະ ຈະສືບຕໍ່ເຮັດວຽກຮ່ວມກັບບັນດາປະເທດສະມາຊິກອາຊຽນ ແລະ ສະຫະລັດ ອາເມຣິກາ ເພື່ອຮັດແໜ້ນການຮ່ວມມືອາຊຽນ-ສະຫະລັດ ອາເມຣິກາ ໃຫ້ສຳເລັດຜົນໃນຕໍ່ໜ້າ ໂດຍລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກໍ່ໄດ້ກ່າວສະແດງຄວາມຍິນດີຕ້ອນຮັບ ສປປ.ລາວ ໃນຖານະຕົວແທນອາຊຽນ ເພື່ອເປັນຜູ້ປະສານງານລະຫວ່ງກັນ.
ນອກຈາກນີ້ແລ້ວ, ໃນໂອກາດກອງປະຊຸມລັດຖະມົນຕີຕ່າງປະເທດອາຊຽນ ກັບ ບັນດາປະເທດຄູ່ເຈລະຈາຕ່າງໆ ຢູ່ປະເທດສິງກະໂປ ໂດຍສະເພາະຈີນ, ຍີ່ປຸ່ນ, ເກົາຫຼີໃຕ້, ສະຫະລັດ ອາເມຣິກາ, ອົດສະຕຣາລີ ແລະ ນິວຊີແລນ ໄດ້ສະແດງຄວາມເສຍໃຈ ແລະ ຄວາມເຫັນໃຈຕໍ່ ສປປ.ລາວ ທີ່ໄດ້ຮັບຜົນກະທົບຈາກໄພນ້ຳຖ້ວມທີ່ເກີດຈາກເຫດການເຂື່ອນໄຟຟ້າເຊປຽນ-ເຊນ້ຳນ້ອຍແຕກ ຢູ່ເມືອງສະໜາມໄຊ ແຂວງອັດຕະປື ແລະ ຢືນຢັນຄວາມພ້ອມໃນການໃຫ້ການຊ່ວຍເຫຼືອບັນເທົາທຸກຈາກໄພພິບັດດັ່ງກ່າວໃຫ້ແກ່ ສປປ.ລາວ ແລະ ທ່ານ ສະເຫຼີມໄຊ ກົມມະສິດ ໃນນາມຕົວແທນລັດຖະບານ ກໍ່ຄືປະຊາຊົນລາວ ກໍ່ໄດ້ຖືໂອກາດດັ່ງກ່າວນັ້ນສະແດງຄວາມຂອບອົກຂອບໃຈບັນດາປະເທດສະມາຊິກອາຊຽນ ແລະ ບັນດາປະເທດຄູ່ເຈລະຈາອາຊຽນຕໍ່ຄວາມເຫັນໃຈ ແລະ ການຊ່ວຍເຫຼືອແກ່ ສປປ.ລາວ ໃນຄວາມພະຍາຍາມບັນເທົາທຸກໃຫ້ປະຊາຊົນລາວຜູ້ປະສົບໄພໃນຄັ້ງນີ້.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ