ທາງການຈີນ ປັບໃໝຟ່ານ ປິງປິງ ດາລາດັງຂອງປະເທດ 219 ລ້ານໂດລາ ຂໍ້ຫາຫຼີກລ້ຽງພາສີ

AFP PHOTO / Anne-Christine POUJOULAT
AFP PHOTO / Anne-Christine POUJOULAT

ສຳນັກຂ່າວຕ່າງປະເທດລາຍງານ 3 ຕຸລາ 2018 ວ່າ: ສຳນັກຂ່າວ XINHUA ຂອງທາງການຈີນເຜີຍແຜ່ຖະແຫຼງການຂອງພະແນກພາສີມົນທົນຈຽງຊູ ເຊິ່ງມີເນື້ອໃນວ່າ: ນາງ ຟ່ານ ປິງປິງ ດາລາຊື່ດັງແຫ່ງວົງການບັນເທີງຈີນ ອາຍຸ 37 ປີ ມີຄວາມຜິດຈິງໃນຂໍ້ຫາເຈດຕະນາປົກປິດ ແລະ ບິດບຽນຂໍ້ມູນກ່ຽວກັບລາຍໄດ້ຈາກການເຮັດວຽກ ດ້ວຍການເຮັດສັນຍາທີ່ຮຽກວ່າ “ຢິນ-ຢາງ” ສ້າງຄວາມເສຍຫາຍໃຫຍ່ຫຼວງໃຫ້ແກ່ທຸກພາກສ່ວນທີ່ກ່ຽວຂ້ອງ ເນື່ອງຈາກເປັນພຶດຕິກຳຫຼີກລ້ຽງພາສີຢ່າງຊັດເຈນ.

AFP PHOTO / Anne-Christine POUJOULAT

ດ້ວຍເຫດນີ້, ນາງ ຟ່ານ ປິງປິງ ແລະ ຕົ້ນສັງກັດຂອງນາງ ຕ້ອງຮ່ວມກັນຊົດໃຊ້ຄ່າເສຍຫາຍເປັນຈຳນວນເງິນ 596 ລ້ານຢວນ ແລະ ຈ່າຍພາສີຄືນຫຼັງພ້ອມຄ່າທຳນຽມລວມອີກປະມານ 288 ລ້ານຢວນ ລວມທັງໝົດເປັນ 884 ລ້ານຢວນ (ປະມານ 129 ລ້ານໂດລາສະຫະລັດ) ໂດຍຫາກນາງ ຟ່ານ ປິງປິງ ຊຳລະເງິນທັງໝົດພາຍໃນໄລຍະເວລາທີ່ກຳນົດ ພະນັກງານສືບສວນສອບສວນຈະບໍ່ດຳເນີນຄະດີອາຍາກັບນາງ ແຕ່ບໍ່ມີການເປີດເຜີຍຢ່າງຊັດເຈນວ່າ ກຳນົດການນັ້ນແມ່ນເມື່ອໃດ.

ເຖິງຢ່າງໃດກໍ່ຕາມ, ຕໍ່ມາມີການເຜີຍແຜ່ຖະແຫຼງການຂອງນາງ ຟ່ານ ປິງປິງ ຜ່ານສື່ສັງຄົມອອນລາຍເວປໍຂອງຈີນ ເຊິ່ງມີຜູ້ຕິດຕາມຫຼາຍກວ່າ 62 ລ້ານຄົນ ມີເນື້ອໃນສຳຄັນວ່າ: ຖ້າບໍ່ມີພັກ ແລະ ນະໂຍບາຍທີ່ດີຂອງລັດ ຕະຫຼອດຮອດຄວາມຮັກຈາກປະຊາຊົນ ຄົງບໍ່ມີນາງໃນວັນນີ້ ແລະ ລົງທ້າຍດ້ວຍການກ່າວຂໍໂທດປະຊາຊົນ ລວມທັງຮູ້ສຶກລະອາຍໃຈເປັນຢ່າງຍິ່ງ ພ້ອມທັງຢືນຢັນຈະຈ່າຍຄ່າປັບໃໝທັງໝົດ.

ການເຄື່ອນໄຫວດັ່ງກ່າວຂອງພະແນກພາສີ ມົນທົນຈຽງຊູ ແລະ ການເຄື່ອນໄຫວຂອງນາງ ຟ່ານ ປິງປິງ ໃນສື່ສັງຄົມອອນລາຍ ເກີດຂຶ້ນໃນເວລາດຽວກັນກັບທີ່ກົມພາສີຂອງຈີນປະກາດເກັບພາສີຄືນຫຼັງຈາກບຸກຄົນໃດກໍ່ຕາມ ໃນອຸດສາຫະກຳບັນເທີງຂອງປະເທດ ທີ່ມີພຶດຕິກຳຫຼີກລ້ຽງພາສີຕາມກົດໝາຍ ໂດຍເປີດໂອກາດໃຫ້ສະແດງເອກະສານ ແລະ ຊຳລະເງິນພາຍໃນວັນທີ 31 ທັນວາ 2018 ນີ້.