ກຸ່ມປະເທດ NATO ເປີດສາກເຝິກຊ້ອມຮົບ ຄັ້ງຍິ່ງໃຫຍ່ທີ່ສຸດນັບແຕ່ສິ້ນສຸດສົງຄາມເຢັນ

(U.S. Marine Corps photo by Sgt. Devin J. Andrews/Released)

ສຳນັກຂ່າວຕ່າງປະເທດລາຍງານ 26 ຕຸລາ 2018 ວ່າ: ສະມາຊິກທັງ 29 ປະເທດຂອງອົງການສົນທິສັນຍາອາກລັງຕິກເໜືອ (NATO) ທັງ 29 ປະເທດ ພ້ອມທັງພັນທະມິດ ໄດ້ເປີດສາກປະຕິບັດການຊ້ອມຮົບພາຍໃຕ້ລະຫັດ Trident Juncture 18 ເມື່ອວັນພະຫັດ ທີ່ຜ່ານມາ ໂດຍການເຝິກຊ້ອມຮົບພາກສະໜາມຈະດຳເນີນໄປຈົນເຖິງວັນທີ 7 ພະຈິກ 2018 ນີ້ ໃນຫຼາຍພື້ນທີ່ທັງພາກກາງ ແລະ ພາກຕາເວັນອອກຂອງນອກເວ, ທະເລເໜືອ ແລະ ທະເລບໍຕິກ.

PHOTO: NATO

ພາຍຫຼັງສຳເລັດປະຕິບັດການເຝິກຊ້ອມພາກສະໜາມຈະມີການພັກກຳລັງພົນປະມານ 1 ອາທິດ ແລະ ເພື່ອກຽມຄວາມພ້ອມສຳລັບການເຝິກຊ້ອມຖານບັນຊາການ ລະຫວ່າງວັນທີ 13-24 ພະຈິກ 2018 ນີ້ ໂດຍຖະແຫຼງການຂອງ NATO ລະບຸວ່າ: ສະມາຊິກທັງໝົດຂອງ NATO ແລະ ພັນທະມິດໄດ້ສົ່ງເຈົ້າໜ້າທີ່ເຂົ້າຮ່ວມລວມກັນປະມານ 50,000 ຄົນ, ຍານພາຫະນະທາງອາກາດ 250 ລຳ ແລະ ຍານພາຫະນະຫຸ້ມເກາະ 10,000 ຄັນ ຕະຫຼອດຮອດເຮືອຮົບ ແລະ ເຮືອຍົກພົນຂຶ້ນຝັ່ງລວມ 65 ລຳ ຖືເປັນການເຝິກຝົນກຳລັງພົນຄັ້ງໃຫຍ່ທີ່ສຸດຂອງ NATO ນັບຕັ້ງແຕ່ການລົ້ມສະຫຼາຍຂອງສະຫະພາບໂຊວຽດ ເມື່ອປີ 1991.

ການເຄື່ອນໄຫວດັ່ງກ່າວຂອງ NATO ເກີດຂຶ້ນປະມານ 1 ເດືອນ ພາຍຫຼັງທີ່ກອງທັບລັດເຊຍເຝິກຊ້ອມຮົບໃນຊື່ Vostok-2018 ຫຼື ຕາເວັນອອກ-2018 ໂດຍມີການລະດົມກຳລັງພົນເຂົ້າຮ່ວມຫຼາຍເຖິງ 300,000 ຄົນ ພ້ອມທັງໄດ້ຮັບການສະໜັບສະໜູນດ້ານກຳລັງພົນ ແລະ ອາວຸດຍຸດໂທປະກອນເຝິກຊ້ອມອີກຈຳນວນໜຶ່ງຈາກຈີນ ແລະ ມົງໂກລີ.

ນອກຈາກນີ້, ທ່ານ ໂດໂນ ທຣຳ ປະທານປະເທດ ສະຫະລັດ ອາເມຣິກາ ປະກາດເມື່ອຕົ້ນອາທິດນີ້ ວ່າຈະນຳສະຫະລັດ ອາເມຣິກາອອກຈາກການເປັນພາຄີຂອງສົນທິສັນຍາອາວຸດນິວເຄຼຍທີ່ມີໄລຍະການຍິງລະດັບກາງ (INF) ເຊິ່ງເປັນຂໍ້ຕົກລົງສອງຝ່າຍທີ່ໄດ້ລົງນາມຮ່ວມກັບລັດເຊຍມາຕັ້ງແຕ່ສະໄໝສະຫະພາບໂຊວຽດ ເມື່ອປີ 1987 ທີ່ມີເນື້ອໃນສຳຄັນຄືການຫ້າມທັງສອງປະເທດຜະລິດ ແລະ ທົດລອງຂີປະນາວຸດທີ່ມີໄລຍະການຍິງລະຫວ່າງ 500-5,500 ກິໂລແມັດ, ຂະນະທີ່ທ່ານ ປູຕິນ ກ່າວວ່າຫາກສະຫະລັດ ອາເມຣິກາຖອນຕົວຈິງ ລັດເຊຍພ້ອມຈະຕອບໂຕ້ຕາມຄວາມເໝາະສົມ.

PHOTO: NATO
PHOTO: NATO
PHOTO: NATO
PHOTO: NATO