ທ່ານ ປູຕິນ ຈະເຂົ້າຮ່ວມ ແຕ່ທ່ານ ໂດໂນ ທຣຳ ບໍ່ເຂົ້າຮ່ວມກອງປະຊຸມສຸດຍອດອາຊຽນ ທີ່ສິງກະໂປ

ສຳນັກຂ່າວຕ່າງປະເທດລາຍງານ 13 ພະຈິກ 2018 ວ່າ: ທຳນຽບເຄຣມລິນ (ທຳນຽບປະທານປະເທດລັດເຊຍ) ອອກຖະແຫຼງວ່າ ທ່ານ ວະລາດິເມຍ ປູຕິນ ປະທານປະເທດລັດເຊຍ ມີກຳນົດເດີນທາງຢ້ຽມຢາມສິງກະໂປ ໃນລະຫວ່າງວັນທີ 13-15 ພະຈິກ ນີ້, ເພື່ອເຂົ້າຮ່ວມກອງປະຊຸມສຸດຍອດອາຊຽນ ຮ່ວມກັບຜູ້ນຳ 10 ປະເທດສະມາຊິກອາຊຽນ ແລະ ກອງປະຊຸມອາຊີຕາເວັນອອກ (EAS) ຄັ້ງທີ 13 ເຊິ່ງເປັນໜຶ່ງໃນການພົບປະຫາລືທີ່ປິ່ນອ້ອມລະຫວ່າງອາຊຽນກັບ 6 ປະເທດຄູ່ເຈລະຈາໄດ້ແກ່: ຍີ່ປຸ່ນ, ເກົາຫຼີໃຕ້, ອິນເດຍ, ອົດສະຕຣາລີ, ລັດເຊຍ ແລະ ສະຫະລັດ ອາເມຣິກາ.

ສຳລັບການເດີນທາງຢ້ຽມຢາມສິງກະໂປຂອງທ່ານ ປູຕິນ ໃນຄັ້ງນີ້ຖືເປັນຄັ້ງທຳອິດຢ່າງເປັນທາງການໃນຖານະຜູ້ນຳລັດເຊຍ, ຂະນະດຽວກັນຍັງເປັນການເຄື່ອນໄຫວທີ່ຕ້ອງໄດ້ຕິດຕາມ ເນື່ອງຈາກຕະຫຼອດໄລຍະເວລາຫຼາຍປີທີ່ຜ່ານມາ ທ່ານ ປູຕິນ ມັກທີ່ຈະເລືອກເຂົ້າຮ່ວມປະຊຸມສຸດຍອດຜູ້ນຳກັບຜູ້ປະເທດການຮ່ວມມືທາງເສດຖະກິດອາຊີ-ປາຊິຟິກ (ເອເປັກ) ເຊິ່ງຈັດຂຶ້ນໃນເວລາໃກ້ຄຽງກັນກັບກອງປະຊຸມອາຊຽນ ແລ້ວສົ່ງນາຍົກລັດຖະມົນຕີ ຫຼື ລັດຖະມົນຕີກະຊວງການຕ່າງປະເທດເຂົ້າຮ່ວມກິດຈະກຳຂອງອາຊຽນແທນ, ເຖິງຢ່າງໃດກໍ່ຕາມ ໃນປີນີ້ທ່ານ ປູຕິນ ໄດ້ມອບໝາຍໃຫ້ທ່ານ ເດິມິດຕຣີ ເມດເວດເດບ ນາຍົກລັດຖະມົນຕີໄປປະຊຸມເອເປັກ ທີ່ນະຄອນຫຼວງພໍມອສປີ ເມືອງຫຼວງຂອງປາປົວນິວກີນີ ທີ່ຈະຈັດຂຶ້ນໃນລະຫວ່າງວັນທີ 14-15 ພະຈິກນີ້ແທນ.

ການເຂົ້າຮ່ວມປະຊຸມອາຊຽນຂອງທ່ານ ປູຕິນ ຖືເປັນການບົ່ງບອກເຖິງຄວາມຕ້ອງການເພີ່ມຄວາມສຳຄັນຂອງລັດເຊຍໃນພູມມິພາກອາຊີຕາເວັນອອກສຽງໃຕ້ ໂດຍຫວຽດນາມເປັນປະເທດທຳອິດໃນອາຊຽນ ທີ່ໄດ້ລົງນາມໃນຂໍ້ຕົກລົງການຄ້າເສລີກັບສະຫະພາບເສດຖະກິດຢູເຣເຊຍ ເມື່ອປີ 2016 ແລະ ສິງກະໂປແມ່ນເຂົ້າໃກ້ການເປັນປະເທດທີສອງ, ຂະນະດຽວກັນ ອາຊຽນໄດ້ເປີດກວ້າງຫຼາຍຂຶ້ນສຳລັບສິນຄ້າດ້ານການທະຫານຈາກລັດເຊຍ ເຖິງແມ່ນວ່າສະຫະລັດ ອາເມຣິກາຂົ່ມຂູ່ຈະຂວ້ຳບາດ ແຕ່ອິນໂດເນເຊຍກໍ່ໄດ້ຢືນຢັນວ່າຂໍ້ຕົກລົງສັ່ງຊື້ຍົນຂັບໄລ່ຈຳນວນ 11 ລຳຈາກລັດເຊຍ ມູນຄ່າລວມປະມານ 1,140 ລ້ານໂດລາສະຫະລັດ ຈະຕ້ອງເດີນໜ້າຕໍ່ໄປ.

ໃນອີກດ້ານໜຶ່ງ ເປັນທີ່ໜ້າສັງເກດເຊັ່ນກັນເມື່ອທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ບໍ່ເຂົ້າຮ່ວມທັງການປະຊຸມອາຊຽນ ແລະ ເອເປັກ ແຕ່ສົ່ງຮອງປະທານປະເທດທ່ານ ໄມ ເພນ ເຂົ້າຮ່ວມແທນທັງສອງລາຍການ, ໃນຂະນະທີ່ທ່ານ ຫຼີ່ ເຄິສຽງ ນາຍົກລັດຖະມົນຕີຂອງຈີນ ເຂົ້າຮ່ວມກອງປະຊຸມອາຊຽນ ແລະ ທ່ານ ສີ ຈິ້ນຜິງ ປະທານປະເທດຈີນ ຈະເຂົ້າຮ່ວມກອງປະຊຸມເອເປັກ ວ່າຈະສະທ້ອນການໃຫ້ຄວາມສຳຄັນຂອງປະເທດມະຫາອຳນາດຕໍ່ພູມມິພາກອາຊີຕາເວັນອອກສຽງໃຕ້ ແລະ ຈະສົ່ງຜົນຕໍ່ທິດທາງນະໂຍບາຍໃນອະນາຄົດຫຼືບໍ່.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube