ສປປ.ລາວ – ລັດເຊຍ ຈະຊ້ອມຮົບຮ່ວມກັນໃນປີ 2019 ນີ້ ເພື່ອຮັກສາສັນຕິພາບ

ສຳນັກຂ່າວຕ່າງປະເທດລາຍງານ 3 ມັງກອນ 2019 ວ່າ: ກະຊວງປ້ອງກັນປະເທດລັດເຊຍ ໄດ້ປະກາດໃນການຖະແຫຼງຂ່າວ ເມື່ອທີ 2 ມັງກອນ ທີ່ຜ່ານມາວ່າ: ກອງກຳລັງທະຫານບົກຂອງລັດເຊຍໄດ້ວາງແຜນທີ່ຈະເຂົ້າຮ່ວມການຊ້ອມຮົບກັບກອງທັບຂອງຕ່າງປະເທດເຖິງ 7 ຄັ້ງໃນປີນີ້.

ກອງທັບລັດເຊຍຈະເຂົ້າຮ່ວມຊ້ອມຮົບໃນປະເທດເອຢິບ, ອິນເດຍ, ມົງໂກລີ ແລະ ຕັດຈິກິດສະຖານ ແລະ ຈະເຂົ້າວຮ່ວມການເຝິກຊ້ອມໃນ “Friendship Arrow 2019”, “Indra 2019”, “Selenga 2019” ແລະ “Brotherhood Unbreakable 2019”.

ໂດຍການເຝິກຊ້ອມຮົບຮ່ວມລະຫວ່າງລັດເຊຍ – ສປປ.ລາວ ທີ່ຈະຈັດຂຶ້ນໃນປີນີ້ ຖືເປັນການຊ້ອມຮົບຮ່ວມກັນຄັ້ງທຳອິດລະຫວ່າງສອງປະເທດ, ໂດຍກະຊວງປ້ອງກັນປະເທດລັດເຊຍກ່າວວ່າ: ການຊ້ອມຮົບຮ່ວມເຫຼົ່ານີ້ມີຈຸດປະສົງເພື່ອຮັກສາສັນຕິພາບ ໂດຍຜູ້ທີ່ເຂົ້າຮ່ວມການເຝິກຊ້ອມ ຈະຕ້ອງເຝິກຝົນການຕໍ່ສູ້ກັບກອງກຳລັງຕິດອາວຸດທີ່ຜິດກົດໝາຍໃນຫຼາກຫຼາຍຮູບແບບ.