ລັດເຊຍຕອບໂຕ້ຜູ້ນຳອິນໂດເນເຊຍ ທີ່ກ່າວວ່າມີຂະບວນການແຊກແຊງການເລືອກຕັ້ງແບບລັດເຊຍ

Presidential candidate incumbent President Joko Widodo (L) (Photo by BAY ISMOYO / AFP)

ສຳນັກຂ່າວຕ່າງປະເທດລາຍງານ 5 ກຸມພາ 2019 ວ່າ: ສະຖານເອກອັກຄະລັດຖະທູດລັດເຊຍ ປະຈຳນະຄອນຫຼວງຈາກາຕາ ປະເທດອິນໂດເນເຊຍ ອອກຖະແຫຼງການ ເມື່ອວັນຈັນທີ່ຜ່ານມາ, ໂດຍມີເນື້ອໃນສຳຄັນວ່າ: ນິຍາມ “ໂຄສະນາຊວນເຊື່ອໂດຍລັດເຊຍ” ເກີດຂຶ້ນໃນໄລຍະຫາສຽງການເລືອກຕັ້ງປະທານປະເທດສະຫະລັດ ອາເມຣິກາ ເມື່ອປີ 2016 ນັ້ນ ບໍ່ໄດ້ຕັ້ງຢູ່ບົນພື້ນຖານຂອງຄວາມເປັນຈິງແຕ່ຢ່າງໄດ້.

(Photo by ADEK BERRY / AFP)

ເຊິ່ງລັດຖະບານລັດເຊຍ ມີຈຸດຢືນຢ່າງຊັດເຈນ ໃນການຢຶດໝັ້ນຕໍ່ນະໂຍບາຍບໍ່ແຊກແຊງວຽກງານພາຍໃນຂອງຝ່າຍໃດຝ່າຍໜຶ່ງ ທີ່ລວມເຖິງຂະບວນການເລືອກຕັ້ງຂອງທຸກປະເທດ ລວມທັງອິນໂດເນເຊຍ ເຊິ່ງຖືເປັນໜຶ່ງໃນພັນທະມິດຂອງລັດເຊຍ ແລະ ເປັນຮຸ້ນສ່ວນສຳຄັນທາງຍຸດທະສາດຫຼາຍດ້ານ.

ການເຄື່ອນໄຫວດັ່ງກ່າວຂອງລັດຖະບານລັດເຊຍ ເກີດຂຶ້ນພາຍຫຼັງທີ່ທ່ານ ໂຈໂຄ ວິໂດໂດ ປະທານປະເທດອິນໂດເນເຊຍ ກ່າວໃນລະຫວ່າງການລົງພື້ນທີ່ປາໄສຫາສຽງເລືອກຕັ້ງ ທີ່ເມືອງສຸຣາບາຢາ ທາງພາກຕາເວັນອອກຂອງເກາະຊວາ ເມື່ອວັນເສົາທີ່ຜ່ານມາວ່າ: ກຳລັງມີບາງກຸ່ມຄົນສ້າງກິດຈະກຳທີ່ຮຽກວ່າ: “ໂຄສະນາຊວນເຊື່ອແບບລັດເຊຍ” ເພື່ອເຜີຍແຜ່ຂ່າວສານທີ່ບໍ່ມີມູນຄວາມຈິງ ແລະ ສ້າງຄວາມແຕກແຍກໃນໄລຍະກ່ອນການເລືອກຕັ້ງ, ເຊິ່ງກໍ່ມີບາງທັດສະນະທີ່ຕີລາຄາວ່າ ການທີ່ທ່ານ ໂຈໂຄ ວິໂດໂດ ໃຊ້ຄຳໃນລັກສະນະນັ້ນ ອາດບໍ່ໄດ້ໝາຍຄວາມວ່າຈະເປັນການເຈາະຈົງວິຈານລັດເຊຍ ແຕ່ຜູ້ນຳອິນໂດເນເຊຍ ອາດຈະໝາຍເຖິງການໃຊ້ສົງຄາມສື່ໃນໄລຍະການຫາສຽງເລືອກຕັ້ງ ຕາມທີ່ສະຫະລັດ ອາເມຣິກາຍັງຄົງກ່າວຫາລັດເຊຍຈົນເຖິງທຸກວັນນີ້.

ສຳລັບການເລືອກຕັ້ງທົ່ວໄປຂອງອິນໂດເນເຊຍ ຈະຈັດຂຶ້ນໃນວັນທີ 17 ເມສາ 2019 ໂດຍມີຈຳນວນຜູ້ມີສິດເລືອກຕັ້ງ 186 ລ້ານຄົນ ຈາກຈຳນວນປະຊາກອນທັງໝົດ 260 ລ້ານຄົນ ແລະ ຖືເປັນຄັ້ງທຳອິດໃນປະຫວັດສາດຂອງອິນໂດເນເຊຍ ທີ່ຈະເປັນການເລືອກຕັ້ງປະທານປະເທດ ແລະ ສະມາຊິກສະພາພ້ອມກັນ ເຊິ່ງໃນສ່ວນຂອງການເລືອກຕັ້ງສະມາຊິກສະພາແບ່ງເປັນ 560 ສຽງໃນສະພາລຸ່ມ ແລະ 132 ໃນສະພາສູງ, ສ່ວນການເລືອກຕັ້ງປະທານປະເທດນັ້ນ ຜົນສຳຫຼວດຈາກເກືອບທຸກສຳນັກເປັນໄປໃນທາງດຽວກັນວ່າ ທ່ານ ໂຈໂຄ ວິໂດໂດ ເຊິ່ງລົງສະໝັກໃນນາມພັກປະຊາທິປະໄຕອິນໂດເນເຊຍ-ການຕໍ່ສູ້ ຈະຍັງຄົງຊະນະຄູ່ແຂ່ງຄົນເດີມຈາກການເລືອກຕັ້ງເມື່ອປີ 2014 ຄືທ່ານ ພົນໂທ ປຣາໂບໂວ ຊູບຽນໂຕ ຈາກພັກຂະບວນການອິນໂດເນເຊຍຍິ່ງໃຫຍ່ ເຊິ່ງເປັນພັກແກນນຳຝ່າຍຄ້ານ.