ພັກໄທຣັກສາຊາດອາດຖືກຍຸບ ພາຍຫຼັງເຈົ້າມະຫາຊີວິດໄທປະກາດ ເຈົ້າຍິງອຸບົນຣັດຢູ່ເໜືອການເມືອງເລືອກຕັ້ງບໍ່ໄດ້

(Photo by Krit Phromsakla Na SAKOLNAKORN / THAI NEWS PIX / AFP)

ສຳນັກຂ່າວຕ່າງປະເທດລາຍງານ 9 ກຸມພາ 2019 ວ່າ: ຈາກກໍລະນີທີ່ພັກໄທຣັກສາຊາດໄດ້ສະເໜີຊື່ເຈົ້າຍິງອຸບົນຣັດຕະນະ ມະຫິດົນ ເປັນຕົວແທນພັກໃນການລົງຊິງຕຳແໜ່ງນາຍົກລັດຖະມົນຕີໄທ ໃນການເລືອກຕັ້ງທົ່ວໄປທີ່ຈະຈັດຂຶ້ນໃນວັນທີ 24 ມີນານີ້, ສົມເດັດພະມະຫາວະຊິຣາລົງກອນ ເຈົ້າມະຫາຊີວິດໄທ ມີປະກາດສະຫຼຸບເນື້ອໃນໄດ້ວ່າ: ລາຊະວົງທຸກພະອົງ ດຳລົງຢູ່ເໜືອການເມືອງ ແລະ ຄວນເປັນກາງທາງການເມືອງ ບໍ່ສາມາດຳລົງຕຳແໜ່ງໃດໆໃນທາງການເມືອງໄດ້ ເພາະຈະເປັນການຂັດກັບລັດຖະທຳມະນູນ ແລະ ປະເພນີການປົກຄອງຕາມລະບອບປະຊາທິປະໄຕທີ່ມີພະມະຫາກະສັດເປັນປະມຸກ.

ເຊິ່ງໃນດ້ານຂອງພັກໄທຣັກສາຊາດ ກໍ່ໄດ້ແຈ້ງຍົກເລີກກຳນົດການ ທີ່ແຈ້ງໄວ້ວ່າຈະມີການລົງພື້ນທີ່ຫາສຽງໃນວັນເສົານີ້ ທີ່ນຳໂດຍທ່ານ ປຣີຊາພົນ ພົງພານິສ ຫົວໜ້າພັກ, ທ່ານ ນັດຖະວຸດ ໄສເກື້ອ ປະທານຄະນະກຳມະການຫາສຽງ ແລະ ຄະນະກຳມະການບໍລິຫານພັກ ລວມທັງແກນນຳພັກອີກຫຼາຍຄົນ.

ສ່ວນໃນດ້ານຂອງກຳມະການການເລືອກຕັ້ງແຫ່ງຊາດໄທ ຈະເລັ່ງພິຈາລະນາເປັນກໍລະນີເລັ່ງດ່ວນ ພາຍຫຼັງມີປະກາດຈາກເຈົ້າມະຫາຊີວິດ ເມື່ອຄືນວັນທີ 8 ກຸມພາ ທີ່ຜ່ານມາ, ໂດຍເນື້ອໃນຕອນໜຶ່ງລະບຸວ່າ: ການນຳສະມາຊິກຊັ້ນສູງໃນລາຊະວົງມາກ່ຽວຂ້ອງກັບລະບອບການເມືອງບໍ່ວ່າຈະໂດຍທາງໃດກໍ່ຕາມ ຈຶ່ງເປັນການກະທຳທີ່ຂັດຕໍ່ຮີດຄອງປະເພນີ, ຂະໜົບທຳນຽບ ແລະ ວັດທະນະທຳຂອງຊາດ ຖືເປັນການກະທຳທີ່ບໍ່ເໝາະບໍ່ຄວນເປັນຢ່າງຍິ່ງ.

ນອກຈາກນີ້, ໃນຕອນທ້າຍຂອງປະກາດຍັງລະບຸວ່າ: ດັ່ງນັ້ນ, ພະລາຊິນີ, ພະລາຊະທາຍາດ ແລະ ລາຊະວົງທຸກພະອົງ ຈຶ່ງຢູ່ໃນຫຼັກການກ່ຽວກັບການດຳລົງຢູ່ເໜືອການເມືອງ ແລະ ຄວາມເປັນກາງທາງການເມືອງຂອງພະມະຫາກະສັດ ແລະ ບໍ່ສາມາດດຳລົງຕຳແໜ່ງໃດໆໃນທາງການເມືອງໄດ້.

ເຊິ່ງກຳມະການການເລືອກຕັ້ງແຫ່ງຊາດໄທ ຈະພິຈາລະຈາຈາກລະບຽບການເລືອກຕັ້ງ ວ່າດ້ວຍການຫາສຽງຂໍ້ທີ 17 ທີ່ລະບຸວ່າ: ຫ້າມຜູ້ສະໝັກພັກການເມືອງ ຫຼື ຜູ້ໃດນຳສະຖາບັນພະມະຫາກະສັດມາກ່ຽວຂ້ອງກັບການຫາສຽງເລືອກຕັ້ງ ໂດຍອີງໃສ່ກົດໝາຍວ່າດ້ວຍພັກການເມືອງ ມາດຕາ 90 ທີ່ລະບຸວ່າ: ພັກການເມືອງຈະສິ້ນສຸດລົງ ເມື່ອສານລັດຖະທຳມະນູນສັ່ງຍຸບພັກການເມືອງຕາມມາດຕາ 92 ທີ່ລະບຸວ່າ: ເມື່ອກຳມະການການເລືອກຕັ້ງ ມີຫຼັກຖານທີ່ເຊື່ອຖືໄດ້ວ່າ ພັກການເມືອງກະທຳບໍ່ເໝາະສົມ ອັນເປັນປໍລະປັກຕໍ່ການປົກຄອງຕາມລະບອບປະຊາທິປະໄຕ ທີ່ມີພະມະຫາກະສັດເປັນປະມຸກ ໃຫ້ຍື່ນສານລັດຖະທຳມະນູນເພື່ອສັ່ງຍຸບພັກ.

ໃນດ້ານຂອງເຈົ້າຍິງອຸບົນຣັດຕະນະ ມະຫິດົນ ພາຍຫຼັງມີປະກາດຈາກເຈົ້າມະຫາຊີວິດ ກໍ່ໄດ້ລົງຂໍ້ຄວາມຜ່ານ Instagram ວ່າ: “ຂໍຂອບໃຈຄົນໄທທຸກຄົນ ສຳລັບຄວາມຮັກ ແລະ ນ້ຳໃຈທີ່ມີຕໍ່ກັນຜ່ານໆມາ ແລະ ຂອບໃຈທີ່ໃຫ້ກຳລັງໃຈ ແລະ ໃຫ້ການສະໜັບສະໜູນມາໂດຍຕະຫຼອດ, ເຖິງຢ່າງໃດກໍ່ຕາມ ຂໍຂອບໃຈອີກຄັ້ງດ້ວຍຄວາມຈິງໃຈວ່າ ຢາກເຫັນປະເທດໄທກ້າວໄປຂ້າງໜ້າ ເປັນທີ່ຍອມຮັບຂອງນານາປະເທດ, ຢາກເຫັນຄົນໄທທຸກຄົນມີສິດ ແລະ ມີໂອກາດທີ່ຈະໄດ້ກິນດີຢູ່ດີ, ມີຄວາມສຸກທົ່ວໜ້າ ແລະ ຂໍຂອບໃຈດ້ວຍຄວາມຮັກຢ່າງຈິງໃຈມາຍັງທຸກຄົນ, ຂໍອວຍພອນໃຫ້ທຸກຄົນໂຊກດີມີຄວາມສຸກ”.