ສ.ອາເມຣິກາ ຂົ່ມຂວັນອີຣານ ສົ່ງເຮືອບັນທຸກຍົນ ແລະ ຝູງຍົນຖິ້ມລະເບີດໄປຕາເວັນອອກກາງ

ສຳນັກຂ່າວຕ່າງປະເທດລາຍງານ 6 ພຶດສະພາ 2019 ວ່າ: ທ່ານ ຈອນ ໂບຕັນ ທີ່ປຶກສາດ້ານຄວາມໝັ້ນຄົງແຫ່ງຊາດສະຫະລັດ ອາເມຣິກາ ເປີດເຜີຍວ່າ: ສະຫະລັດ ອາເມຣິກາກຳລັງສົ່ງເຮືອບັນທຸກຍົນຮົບ USS Abraham Lincoln Carrier Strike Group ແລະ ກອງຍົນຖິ້ມລະເບີດໄປຍັງກອງບັນຊາການກາງສະຫະລັດ ອາເມຣິກາ ປະຈຳພູມມິພາກຕາເວັນອອກກາງ ເພື່ອສົ່ງສັນຍານເຕືອນວ່າ ຫາກຜົນປະໂຫຍດໃດໆຂອງສະຫະລັດ ອາເມຣິກາ ຫຼື ປະເທດພັນທະມິດຖືກໂຈມຕີ ອີຣານກໍ່ຈະຕ້ອງປະເຊີນກັບການຖືກຕອບໂຕ້ຢ່າງຮຸນແຮງ, ທ່ານ ຈອນ ໂບຕັນ ກ່າວອີກວ່າ ເຖິງແມ່ນວ່າສະຫະລັດ ອາເມຣິກາບໍ່ຕ້ອງການເຮັດສົງຄາມກັບອີຣານ ແຕ່ກໍ່ພ້ອມທີ່ຈະຮັບມືຫາກຖືກໂຈມຕີຈາກກອງກຳລັງປະຕິວັດອີຣານ ຫຼື ກອງກຳລັງອື່ນໆຂອງອີຣານ.

ໃນດ້ານຂອງທ່ານ ຮັສຊັນ ໂຣຮານີ ປະທານປະເທດອີຣານລະບຸວ່າ ສະຫະລັດ ອາເມຣິກາພະຍາຍາມທີ່ຈະຫຼຸດຜ່ອນລາຍໄດ້ທີ່ເປັນເງິນຕາຕ່າງປະເທດຂອງອີຣານ ໂດຍການບີບບັງຄັບໃຊ້ມາດຕະການຂວໍ້າບາດການສົ່ງອອກນ້ຳມັນ ແຕ່ອີຣານຈະຕ້ອງສົ່ງອອກນ້ຳມັນຕໍ່ໄປ.

ເຖິງຢ່າງໃດກໍ່ຕາມ ເມື່ອເດືອນເມສາທີ່ຜ່ານມາ ສະຫະລັດ ອາເມຣິກາ ໄດ້ປະກາດຢຸດຕິຂໍ້ຍົກເວັ້ນແກ່ 5 ປະເທດທີ່ນຳເຂົ້ານ້ຳມັນຈາກອີຣານໄດ້ແກ່ ຈີນ, ອິນເດຍ, ຍີ່ປຸ່ນ, ເກົາຫຼີໃຕ້ ແລະ ຕວັກກີ ເພື່ອຕັດແຫຼ່ງລາຍໄດ້ສຳຄັນຂອງອີຣານ ເຊິ່ງມີຜົນໃນວັນທີ 2 ພຶດສະພາທີ່ຜ່ານມາ ໂດຍປະລິມານການສົ່ງອອກນ້ຳມັນຂອງອີຣານ ໄດ້ຫຼຸດລົງເຄິ່ງໜຶ່ງຂອງປະລິມານການສົ່ງອອກເມື່ອປີຜ່ານມາ ແລະ ຄາດວ່າຈະຫຼຸດລົງຕື່ມອີກນັບແຕ່ເດືອນພຶດສະພານີ້.