ເກົາຫຼີເໜືອ ຕ້ອນຮັບການຢ້ຽມຢາມຂອງທ່ານ ສີ ຈິ້ນຜິງ ຜູ້ນຳຈີນ ຢ່າງຍິ່ງໃຫຍ່ (ວິດີໂອ)

ສຳນັກຂ່າວຕ່າງປະເທດລາຍງານ 21 ມິຖຸນາ 2019 ໂດຍອີງຕາມການລາຍງານຂອງສຳນັກຂ່າວກາງເກົາຫຼີ (KCNA) ກະບອກສຽງຂອງລັດຖະບານເກົາຫຼີເໜືອວ່າ: ເມື່ອ 20 ມິຖຸນາ ທີ່ຜ່ານມາ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ແລະ ທ່ານ ນາງ ຣີ ຊອນ-ຈູ ພັນລະຍາ ໄດ້ໃຫ້ການຕ້ອນຮັບທ່ານ ສີ ຈິ້ນຜິງ ປະທານປະເທດຈີນ ແລະ ທ່ານ ນາງ ເຜິງ ລີຢວນ ພັນລະຍາ ພ້ອມດ້ວຍຄະນະຢ່າງສົມກຽດສູງສຸດ ໃນໂອກາດທີ່ທ່ານ ສີ ຈິ້ນຜິງ ເປັນຜູ້ນຳຈີນຄົນທີ 4 ແລະ ຄົນທຳອິດໃນຮອບ 14 ປີທີ່ເດີນທາງຢ້ຽມຢາມນະຄອນຫຼວງປຽງຢາງທາງເປັນທາງການ ຖັດຈາກອະດີດປະທານປະເທດ ຫູ ຈິນເທົາ ເມື່ອປີ 2005.

ເຊິ່ງລາຍງານຂອງ KCNA ລະບຸວ່າ: ໃນລະຫວ່າງການພົບປະຫາລືແບບຄົບຄະນະ ຜູ້ນຳທັງສອງປະເທດເຫັນດີຮ່ວມກັນວ່າ ສະຖານະການທາງການທູດທີ່ເຄັ່ງຕຶງ ແລະ ຊັບຊ້ອນຈາກພາຍນອກ ເປັນແຮງຊຸກດັນອັນດີໃຫ້ສາຍພົວກັນລະຫວ່າງເກົາຫຼີເໜືອ ແລະ ຈີນຮັດແໜ້ນຍິ່ງຂຶ້ນ ໂດຍທ່ານ ສີ ຈິ້ນຜິງ ແລະ ທ່ານ ຄິມ ຈອງ-ອຶນ ຕົກລົງຍົກລະດັບການສື່ສານທາງຍຸດທະສາດ ແລະ ການຂະຫຍາຍກອບການຮ່ວມມືສອງຝ່າຍໃນຫຼາຍດ້ານ.

ຂະນະທີ່ສື່ຂອງທາງການຈີນລາຍງານໄປໃນທິດທາງດຽວກັນວ່າ ລັດຖະບານເກົາຫຼີເໜືອໄດ້ດຳເນີນນະໂຍບາຍທາງບວກ ແລະ ສ້າງສັນມາໂດຍຕະຫຼອດ ນັບຕັ້ງແຕ່ການພົບປະຫາລືກັບທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາມາແລ້ວ 2 ຄັ້ງ ເພື່ອຫຼີກລ້ຽງສະຖານະການເຄັ່ງຕຶງ ເຊິ່ງເປັນສິ່ງທີ່ເກົາຫຼີເໜືອບໍ່ປາຖະໜາໃຫ້ເກີດຂຶ້ນ ແລະ ລະບຸອີກວ່າ ລັດຖະບານເກົາຫຼີເໜືອລໍຖ້າການຕອບສະໜອງທີ່ສ້າງສັນຈາກສະຫະລັດ ອາເມຣິກາ ເພື່ອໃຫ້ການເຈລະຈາເລື່ອງການປົດອາວຸດນິວເຄຼຍສາມາດເດີນໜ້າຕໍ່ໄປໄດ້ ເຊິ່ງທ່ານ ສີ ຈິ້ນຜິງ ສະແດງຄວາມຫວັງວ່າຜູ້ນຳເກົາຫຼີເໜືອບໍ່ຄວນຕັດຂາດການພົບປະຫາລືກັບຜູ້ນຳສະຫະລັດ ອາເມຣິກາ.

ໃນອີກດ້ານໜຶ່ງ, ຫຼາຍຝ່າຍວິເຄາະການຢ້ຽມຢາມນະຄອນຫຼວງປຽງຢາງຂອງທ່ານ ສີ ຈິ້ນຜິງ ໃນຄັ້ງນີ້ ທີ່ມີການປະກາດໃຫ້ສາທາລະນະຮັບຮູ້ລ່ວງໜ້າພຽງບໍ່ພໍເທົ່າໃດວັນ ຖືເປັນການຢ້ຽມຢາມທາງສັນຍາລັກ ທີ່ເປັນເຈດຕະນາສົ່ງສານເຖິງສະຫະລັດ ອາເມຣິກາຢ່າງຊັດເຈນວ່າ ຈີນຍັງມີອິດທິພົນເໜືອເກົາຫຼີເໜືອ ເພາະນອກເໜືອຈາກການພົບປະຫາລືຢ່າງເປັນທາງການແລ້ວ ຜູ້ນຳທັງສອງປະເທດບໍ່ໄດ້ລົງນາມຮ່ວມໃນເອກະສານສະບັບໃດ ຫຼື ເປັນສັກຂີພິຍານລົງນາມໃນຂໍ້ຕົກລົງໃດ, ໃນຂະນະທີ່ລັດຖະບານເກົາຫຼີເໜືອໄດ້ຈັດພິທີຕ້ອນຮັບຜູ້ນຳຈີນ ແລະ ພັນລະຍາ ພ້ອມດ້ວຍຄະນະຢ່າງຍິ່ງໃຫຍ່ອະລັງການ ຕາມແບບຂອງເກົາຫຼີເໜືອທີ່ປະຕິບັດໃນການຕ້ອນຮັບການຢ້ຽມຢາມຜູ້ນຳສູງສຸດຂອງປະເທດຕ່າງໆ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube