ພົບການລະບາດໂລກອະຫິວາໝູອາຟຣິກາ ໃນ ສປປ.ລາວ ຄັ້ງທຳອິດຢູ່ສາລະວັນ ກຳຈັດໝູໄປແລ້ວ 973 ຕົວ

ພາບປະກອບຂ່າວ

ໃນວັນທີ 20 ມິຖຸນາ 2019 ທີ່ຜ່ານມາ ກົມລ້ຽງສັດ ແລະ ການປະມົງ,​ ກະຊວງກະສິກຳ ແລະ ປ່າໄມ້ ແຈ້ງການກ່ຽວກັບກໍລະນີ ກວດພົບເຊື້ອພະຍາດອະຫິວາໝູອາຟຣິກາ ຢູ່ເມືອງຕຸ້ມລານ ແຂວງສາລະວັນ ໂດຍແຈ້ງໃຫ້ຊາບວ່າ: ໃນວັນທີ 17 ມິຖຸນາ 2019 ສູນວິໄຈພະຍາດສັດ, ກົມລ້ຽງສັດ ແລະ ການປະມົງ ໄດ້ກວດພົບເຊື້ອພະຍາດອະຫິວາໝູອາຟຣິກາ ຈຳນວນ 8 ຕົວຢ່າງທັງໝົດ ທີ່ສົ່ງມາກວດຈາກ 7 ບ້ານທີ່ມີການລະບາດຄື: ບ້ານສາມັກຄີໄຊ, ດິນດາກ, ໂພນງາມ, ແກ້ງຮັງ, ນາລະຈາງ, ຫ້ວຍຫວ້າ ແລະ ບ້ານນາຮ່ອງໃຫຍ່ ທີ່ຂຶ້ນກັບເມືອງຕຸ້ມລານ ແຂວງສາລະວັນ.

ເຊື້ອພະຍາດອະຫິວາໝູອາຟຣິກາ ທີ່ກວດພົບໃນຄັ້ງນີ້ ແມ່ນເປັນຄັ້ງທຳອິດທີ່ກວດພົບຢູ່ ສປປ.ລາວ ແລະ ຜ່ານມາບໍ່ເຄີຍມີການລະບາດຂອງພະຍາດທີ່ເທື່ອ, ພະຍາດອະຫິວາໝູອາຟຣິກາ ເປັນພະຍາດທີ່ຮ້າຍແຮງ ສາມາດຕິດຕໍ່ໃສ່ໝູທຸກຊະນິດ ທຸກສາຍພັນ ທຸກອາຍຸ ແລະ ທຸກເພດໄວ ລວມທັງໝູປ່າ. ມີຄວາມທົນທານສູງຕໍ່ສະພາບແວດລ້ອມ ບໍ່ມີຢາກັນ ບໍ່ມີຢາປິ່ນປົວໂດຍກົງ ອັດຕາການຕາຍຂອງໝູທີ່ຕິດເຊື້ອພະຍາດນີ້ສູງເຖິງ 100% “ແຕ່ບໍ່ຕິດໃສ່ຄົນ”.

ໃນດ້ານຂອງອົງການໂລກລະບາດສັດສາກົນ (IOC) ທີ່ມີສຳນັກງານໃຫຍ່ຢູ່ນະຄອນຫຼວງປາຣີສ ປະເທດຝຣັ່ງ ກໍ່ໄດ້ອອກຖະແຫຼງການ ເມື່ອວັນພະຫັດທີ່ຜ່ານມາວ່າ: ໄດ້ຮັບແຈ້ງຈາກກະຊວງກະສິກຳ ແລະ ປ່າໄມ້ຂອງລາວ ກ່ຽວກັບການລະບາດຂອງໂລກອະຫິວາໝູອາຟຣິກາ ເປັນຄັ້ງທຳອິດໃນລາວ ຢູ່ແຂວງສາລະວັນ ແລະ ໄດ້ມີການກຳຈັດໝູທີ່ເປັນໂລກໄປແລ້ວ 973 ຕົວ.

ເຊິ່ງໂລກອະຫິວາໝູອາຟຣິກາໄດ້ແຜ່ລະບາດຢ່າງໄວວາ ນັບຕັ້ງແຕ່ມີການພົບການລະບາດເປັນຈຸດທຳອິດ ທີ່ຟາມໝູແຫ່ງໜຶ່ງ ໃນມົນທົນຫຼຽວໜິງ ທາງພາກຕາເວັນອອກສຽງເໜືອຂອງຈີນ ໂດຍໃນຂະນະນັ້ນລັດຖະບານຈີນໄດ້ສັ່ງກຳຈັດໝູໃນພື້ນທີ່ແຜ່ລະບາດຫຼາຍກວ່າ 38,000 ໂຕ ແລະ ອອກມາດຕະກາເຂັ້ມງວດຈຳກັດການເຄື່ອນຍ້າຍໝູທຸກຮູບແບບທັງເປັນໂຕ ແລະ ເປັນຜະລິດຕະພັນ ແຕ່ກໍ່ບໍ່ສາມາດຄວບຄຸມສະຖານະການໄດ້ ຈົນເຊື້ອໄວຣັສດັ່ງກ່າວແຜ່ລະບາດໄປທົ່ວປະເທດ ແລະ ຂ້າມແດນໄປຍັງເກົາຫຼີເໜືອ ແລະ ສົ່ງຜົນໃຫ້ເກົາຫຼີເໜືອເພີ່ມມາດຕະການເຝົ້າລະວັງຕາມເຂດຊາຍແດນເຊັ່ນກັນ.

ຂະນະດຽວກັນຍັງມີລາຍງານການແຜ່ລະບາດຂອງໂລກອະຫິວາໝູອາຟຣິກາເປັນໄລຍໆເຊັ່ນໃນ ຮົງກົງ, ໄຕ້ຫວັນ, ມົງໂກລີ ແລະ ບາງປະເທດໃນເອີຣົບ ແຕ່ສຳລັບສະຖານະການໃນອາຊີຕາເວັນອອກສຽງໃຕ້ນັ້ນ ມີລາຍງານການແຜ່ລະບາດໃນກຳປູເຈຍຄັ້ງໜຶ່ງ ເມື່ອເດືອນເມສາ ທີ່ຜ່ານມາ ເຊິ່ງເຈົ້າໜ້າທີ່ໄດ້ກຳຈັດໝູໄປຫຼາຍກວ່າ 500 ຕົວ ແລະ ໃນເວລານັ້ນລັດຖະບານຈີນກໍ່ໄດ້ລະງັບການນຳເຂົ້າຜະລິດຕະພັນທຸກປະເທດຈາກໝູທີ່ສົ່ງອອກຈາກກຳປູເຈຍ ຈຶ່ງຍັງບໍ່ເປັນທີ່ຊັດເຈນວ່າການແຜ່ລະບາດຄັ້ງນີ້ເກີດຂຶ້ນຢູ່ປະເທດໃດເປັນແຫ່ງທຳອິດແທ້, ແມ່ອົງການອາຫານ ແລະ ກະສິກຳແຫ່ງສະຫະປະຊາຊາດ (FAO) ລາຍງານວ່າສາຍພັນຂອງເຊື້ອໄວຣັສອະຫິວາໝູອາຟຣິກາໃນຄັ້ງນີ້ ເປັນສາຍພັນດຽວກັບທີ່ແຜ່ລະບາດໃນລັດເຊຍເມື່ອປີທີ່ຜ່ານມາ ແຕ່ຍັງບໍ່ມີລາຍງານທາງເປັນທາງການຕໍ່ບັນຫາດັ່ງກ່າວຈາກລັດເຊຍ.

ຂະນະນີ້ຫວຽດນາມ ເປັນປະເທດທີ່ປະເຊີນກັບວິກິດການແຜ່ລະບາດຂອງເຊື້ອໄວຣັດດັ່ງກ່າວຮຸນແຮງທີ່ສຸດໃນພູມມິພາກ ໂດຍນັບຕັ້ງແຕ່ກາງເດືອນພຶດສະພາ ທີ່ຜ່ານມາ ລັດຖະບານຫວຽດນາມໄດ້ກຳຈັດໝູໄປແລ້ວກວ່າ 2 ລ້ານຕົວ ແລະ ມີການປະເມີນວ່າຜົນຜະລິດໝູຫວຽດນາມໃນປີນີ້ຈະຫຼຸດລົງຫຼາຍເຖິງ 10% ຈາກປີທີ່ຜ່ານມາ ເພາະມີການພົບໂລກລະບາດໃນແຂວງດົ່ງນາຍ ເຊິ່ງເປັນແຫຼ່ງລ້ຽງ ແລະ ສົ່ງອອກໝູລາຍໃຫຍ່ທີ່ສຸດຂອງຫວຽດນາມ.