ສ.ອາເມຣິກາ – ອີຣານ ເປີດສາກສົງຄາມໄຊເບີຢ່າງເປັນທາງການ

ສຳນັກຂ່າວຕ່າງປະເທດລາຍງານເມື່ອວັນທີ 22​ ມິຖຸນາ 2019 ທີ່ຜ່ານມາວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ໄດ້ອອກຄຳສັ່ງໄປຍັງສູນໄຊເບີ ກອງທັບສະຫະລັດ ອາເມຣິກາ ໃຫ້ເປີດສາກປະຕິບັດການໂຈມຕີລະບົບຄວບຄຸມຂີປະນາວຸດ ແລະ ເຄືອຂ່າຍຂ່າວກອງຂອງອີຣານ ພາຍໃນໄລຍະເວລາບໍ່ພໍເທົ່າໃດຊົ່ວໂມງ ພາຍຫຼັງທີ່ກອງກຳລັງປະຕິວັດອີຣານຍິງໂດຣນລຸ້ນ RQ-4 Global Hawk ຂອງກອງທັບສະຫະລັດ ອາເມຣິກາຕົກໃນອານາເຂດແຂວງຮໍມອສກັນ ພາກໃຕ້ຂອງອີຣານ ໃກ້ກັບຊ່ອງແຄບຮໍມຸສ ເມື່ອວັນພະຫັດທີ່ຜ່ານມາ.

ຂະນະດຽວກັນ ແຫຼ່ງຂ່າວໃນບໍລິສັດໄຊເບີຫຼາຍແຫ່ງຂອງສະຫະລັດ ອາເມຣິກາ ລວມເຖິງ FireEye ແລະ CrowdStrike ລາຍງານໄດ້ໃນທິດທາງດຽວກັນວ່າ ອີຣານໄດ້ຍົກລະດັບພາລະກິດໂຈມຕີທາງໄຊເບີຕໍ່ລະບົບຄອມພິວເຕີຂອງໜ່ວຍງານໃນສັງກັດລັດຖະບານສະຫະລັດ ອາເມຣິກາ ແລະ ລະບົບໂຄງສ້າງພື້ນຖານສຳຄັນຫຼາຍແຫ່ງໃນສະຫະລັດ ອາເມຣິກາ ໂດຍເນັ້ນດ້ານພະລັງງານ.

ໃນດ້ານຂອງທ່ານ ໂດໂນ ທຣຳ ປະກາດວ່າຕົນຈະປະກາດມາດຕະການຂວໍ້າບາດທາງເສດຖະກິດຄັ້ງໃໝ່ຕໍ່ອີຣານ ໃນອາທິດນີ້, ໂດຍຍັງຄົງຢືນຢັນວ່າສະຫະລັດ ອາເມຣິກາ ບໍ່ຕ້ອງການເຮັດສົງຄາມເຕັມຮູບແບບກັບອີຣານ ແລະ ສັດຕູສາມາດປ່ຽນສະຖານະເປັນມິດໄດ້ ຫາກລັດຖະບານອີຣານເຈລະຈາກັບລັດຖະບານສະຫະລັດ ອາເມຣິກາ ແລະ ບັນລຸຂໍ້ຕົກລົງທີ່ໜ້າເພິ່ງພໍໃຈຮ່ວມກັນ.

ເຖິງຢ່າງໃດກໍ່ຕາມ, ທ່ານ ໂດໂນ ທຣຳ ເປັນຝ່າຍນຳສະຫະລັດ ອາເມຣິກາຖອນຕົວອອກຈາກຂໍ້ຕົກລົງນິວເຄຼຍ ເມື່ອເດືອນພຶດສະພາ ປີທີ່ຜ່ານມາ ແລະ ໄດ້ກັບຄືນມາເພີ່ມມາດຕະການກົດດັນທາງເສດຖະກິດຕໍ່ອີຣານຢ່າງຕໍ່ເນື່ອງ ເຊັ່ນດຽວກັບສົງຄາມຈິດຕະສາດທາງການທະຫານ ທີ່ໄດ້ສົ່ງກອງເຮືອບັນທຸກຍົນຮົບ ອາວຸດຍຸດໂທປະກອນ ແລະ ໄດ້ເພີ່ມກຳລັງທະຫານໃນຕາເວັນອອກກາງ, ຂະນະທີ່ອົງການພະລັງງານນິວເຄຼຍອີຣານປະກາດເມື່ອວັນທີ 17 ມິຖຸນາ ທີ່ຜ່ານມາວ່າ ພາຍໃນອີກ 10 ວັນຂ້າງໜ້າ ປະລິມານຢູເຣນຽມຂອງອີຣານຈະເກີນເກນ 300 ກິໂລກຣາມ ຕາມທີ່ອົງການພະລັງງານນິວເຄຼຍລະຫວ່າງປະເທດ (IAEA) ກຳນົດໄວ້ໃນຂໍ້ຕົກລົງນິວເຄຼຍ ແລະ ລັດຖະບານອີຣານຈະເດີນໜ້າໂຄງການດັ່ງກ່າວຕໍ່ໄປ ຈົນກວ່າຄູ່ຮ່ວມຂໍ້ຕົກລົງທີ່ຍັງເຫຼືອ ນັ້ນກໍ່ຄືລັດເຊຍ, ຈີນ, ອັງກິດ, ຝຣັ່ງ, ເຢຍລະມັນ ແລະ ສະຫະພາບເອີຣົບ ຈະສາມາດຫາແນວທາງແກ້ໄຂອື່ນທີ່ດີກວ່ານີ້ໄດ້ ເພື່ອຫຼຸດຜ່ອນຄວາມເຄັ່ງຕຶງຂອງສະຖານະການ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube