ກອງທັບລາວ-ຈີນ ເຝິກແອບການຊ່ວຍເຫຼືອດ້ານມະນຸດສະທຳ ໃນຊື່ລະຫັດ ຂະບວນລົດໄຟສັນຕິພາບ 2019

ເມື່ອວັນທີ 15 ສິງຫາ 2019 ທີ່ກອງຮ້ອຍກວດກູ້ລະເບີດເພື່ອມະນຸດສະທໍາ 58 ກົມຊ່າງແສງ ກົມໃຫຍ່ເສນາທິການກອງທັບປະຊາຊົນລາວ, ຄະນະແພດກອງທັບປະຊາຊົນລາວ ແລະ ກອງທັບປົດປ່ອຍປະຊາຊົນຈີນ ໄດ້ເປີດການຫັດແອບຮ່ວມໃນການກອບກູ້ໄພພິບັດຊ່ວຍເຫຼືອມະນຸດສະທຳ ດ້ານການແພດ ແລະ ກິດຈະກຳບໍລິການດ້ານການແພດ “ຂະບວນລົດໄຟສັນຕິພາບ 2019” ໃນລະຫວ່າງວັນທີ 15-26 ສິງ ຫາ 2019 ໂດຍການເປັນປະທານຮ່ວມຂອງ ທ່ານ ພົນຈັດຕະວາ ບົວສິງ ອິນທະວົງ ຫົວໜ້າກົມເສນາຮັກ ກົມໃຫຍ່ພະລາທິການກອງທັບປະຊາຊົນລາວ ແລະ ປະທານຮ່ວມຝ່າຍຈີນທ່ານ ພັນເອກພິເສດ ຊົງຢູຍ ຮອງກົມປະຕິບັດກົດໝາຍກົມໃຫຍ່ພະລາທິການ, ຄະນະກຳມະການທະຫານສູນກາງກອງທັບປົດປ່ອຍປະຊາຊົນຈີນ ລວມທັງບັນດາແຂກການນຳກອງທັບ ແລະ ອື່ນໆເຂົ້າຮ່ວມ.

ພົນຈັດຕະວາ ບົວສິງ ອິນທະວົງ ຂຶ້ນກ່າວວ່າ ການຫັດແອບຄັ້ງນີ້ເປັນຄັ້ງທີ 2 ແລ້ວ ເພື່ອການຍົກລະດັບຂີດຄວາມສາມາດໃນການແກ້ໄຂເຫດການໄພພິບັດທໍາມະຊາດຮ່ວມກັນ ລະຫວ່າງສອງເຫລົ່າຮົບເສນາຮັກ ກອງທັບລາວ-ຈີນ. ໂດຍສະເພາະແມ່ນການຊ່ວຍເຫຼືອຜູ້ຖືກຜົນກະທົບໄພພິບັດທາງທຳມະຊາດ, ເປັນການຍົກລະດັບໃນການກູ້ໄພ, ການແກ້ໄຂສຸກເສີນ ໃນເຫດການໄພພິບັດທາງທຳມະຊາດຂອງພະນັກງານແພດໝໍໃຫ້ສູງຂຶ້ນ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການໃນສະພາບສຸກເສີນ ແລະ ຕໍ່ກັບໄພພິບັດຕ່າງໆທີ່ນັບມື້ເກີດຂຶ້ນຫຼາຍ ພ້ອມທັງມີແນວໂນ້ມຮຸນແຮງຂຶ້ນ ລວມທັງເປັນການທົດສອບຄວາມສາມາດໃນການນຳໃຊ້ພາຫະນະເຕັກນິກທາງການແພດຊະນິດຕ່າງໆ ເຂົ້າໃນພາລະກິດກອບກູ້ຊີວິດຂອງຜູ້ບາດເຈັບ ໃນເຫດການໄພພິບັດ ແລະ ສຸກເສີນຕ່າງໆໃຫ້ທັນການ.

ການຫັດແອບການຮຽນຮູ້ກັບອຸປະກອນການແພດ ທີ່ນໍາໃຊ້ໃນການຊ່ວຍເຫຼືອຜູ້ຖືກຜົນກະທົບໄພພິບັດທໍາມະຊາດເຊັ່ນ: ວິທີແກ້ໄຂຄົນເຈັບ ແລະ ຊ່ວຍເຫຼືອຜູ້ບາດເຈັບໃນພາກສະໜາມ ແລະ ການເຄື່ອນຍ້າຍຜູ້ບາດເຈັບ, ແບ່ງປະເພດຜູ້ບາດເຈັບ ແລະ ນໍາສົ່ງ, ການກໍາຈັດຕໍ່ສານເຄມີຮົ່ວໄຫຼອອກຈາກໂຮງງານ, ປ້ອງກັນ ແລະ ຄວບຄຸມພະຍາດອະຫິວາ ແລະ ພະຍາດອື່ນໆ, ການເຄື່ອນຍ້າຍຜູ້ບາດເຈັບທາງອາກາດ, ການປ້ອງກັນພະຍາດ, ການຈັດການຕໍ່ຊາກສົບຂອງຄົນ ແລະ ສັດ, ການເກັບຕົວຢ່າງ ແລະ ວິໄຈໃນພາກສະໜາມ, ການຕິດຕາມກວດກາແຫຼ່ງນໍ້າ ແລະ ຄຸນນະພາບຂອງນໍ້າ, ການກໍາຈັດສະພາບແວດລ້ອມທີ່ປົນເປື້ອນເຊື້ອໂລກຕ່າງໆ.

ພາຍຫຼັງການຮ່ວມຫັດແອບເຝິກຊ້ອມສໍາເລັດແລ້ວ ແມ່ນຈະໄດ້ສົ່ງທີມແພດກອງທັບລາວ-ຈີນດໍາເນີນການບໍລິການ ດ້ານການແພດຢູ່ແຂວງຊຽງຂວາງ (ໂຮງໝໍ 101), ແຂວງຈຳປາສັກ (ກອງພົນທີ 5), ແຂວງອັດຕະປື ( ເມືອງສະໜາມໄຊ) ແລະ ນະຄອນຫຼວງວຽງຈັນ (ໂຮງໜໍ 103) ຈາກນັ້ນ, ຄະນະແພດກອງທັບ ລາວ-ຈີນກໍ່ໄດ້ພ້ອມກັນລົງກວດກາສະຖານທີ່ ແລະ ວັດຖຸອຸປະກອນກການແພດໃນການຕິດຕັ້ງ ເພື່ອຮັບປະກັນ ການຫັດແອບຮ່ວມໃນການຊ່ວຍ ເຫຼືອມະນຸດສະທໍາດ້ານການແພດ ແລະ ກິດຈະກໍາບໍລິການດ້ານການແພດ “ຂະບວນລົດໄຟ ສັນຕິພາບ ປີ 2019” ກອງທັບລາວ-ຈີນ ຄັ້ງນີ້ໄດ້ຮັບໝາກຜົນສູງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube