ເຈ້ນາງ ເຄື່ອນໄຫວແລ້ວ ພາຍຫຼັງທີ່ສາມີຖືກຈັບຂໍ້ຫາພົວພັນຢາເສບຕິດຢູ່ຝັ່ງໄທ

ລາຍງານ 19 ກັນຍາ 2019, ຈາກກໍລະນີທີ່ເຈົ້າໜ້າທີ່ຕຳຫຼວດຂອງໄທ ໄດ້ຈັບກຸມແກ້ງເຄືອຂ່າຍຢາເສບຕິດລາຍໃຫຍ່ຂອງພາກອີສານ ປະເທດໄທ ຊື່ທ້າວ ຣັດຊະພູມ ສຸດຫຼ້າ (ສາມີ ເຈ້ນາງ ພໍໃຈ ຜູ້ໂດ່ງດັງໃນໂລກອອນລາຍ) ທີ່ຕົກເປັນຜູ້ຕ້ອງຫາເຮັດໜ້າທີ່ຮັບໂອນເງິນໃນບັນຊີຕົວການໃຫຍ່ທີ່ຕິດຕໍ່ກັບເຄືອຂ່າຍໃນ ສປປ.ລາວ, ຂະນະທີ່ການຂະຫຍາຍຜົນກວດສອບບັນຊີທະນາຄານຂອງຕົວການໃຫຍ່ທີ່ຫຼາຍກວ່າ 10 ບັນຊີ ພົບວ່າໃນໄລຍະ 4 ເດືອນ ມີເງິນໝຸນວຽກກວ່າ 200 ລ້ານບາດ ຕາມການລະບຸຂອງເຈົ້າໜ້າທີ່ໄທ.

ນອກຈາກນີ້, ຕຳຫຼວດໄທກໍ່ອ້າງວ່າມີຫຼັກການແໜ້ນໜາ ວ່າທ້າວ ຣັດຊະພູມ ມີສ່ວນກ່ຽວຂ້ອງກັບເງິນຄ້າຢາເສບຕິດ ລັກສະນະເປັນຂະບວນການຟອກເງິນຜິດກົດໝາຍ ເບື້ອງຕົ້ນເຈົ້າໜ້າທີ່ແຈ້ງຂໍ້ຫາສົມຄົບໂດຍຕົກລົງກັນຕັ້ງແຕ່ 2 ຄົນຂຶ້ນໄປ ເພື່ອກະທຳຄວາມຜິດຖານຟອກເງິນ ພ້ອມສົ່ງຕົວດຳເນີນຄະດີຕາມກົດໝາຍ ແລະ ຍຶດຂອງກາງເປັນເງິນສົດ 1.5 ລ້ານບາດ ແລະ ເງິນກີບ 5 ລ້ານກີບ, ບັນຊີທະນາຄານ 4 ເຫຼັ້ມ, ລົດກະບະ, ສາຍຄໍຄຳໜັກ 5 ບາດ, ແຫວນເພັດ 1.8 ກະລັດ ແລະ ຊັບສິນອື່ນໆລວມ 24 ລາຍການ.

ຫຼ້າສຸດ, ເຈ້ ນາງ ພໍໃຈ ໄດ້ລົງຂໍ້ຄວາມຜ່ານເຟສບຸກສ່ວນຕົວວ່າ:ປັດຈຸບັນສາມີເຈ້ ຖືກກ່າວຫາ (ບໍ່ແມ່ນຜູ້ຕ້ອງຫາ) ວ່າມີສ່ວນຮ່ວມຂະບວນການ, ຕອນນີ້ຕຳຫຼວດກຳລັງສືບສວນຢູ່ ຕ້ອງໃຫ້ຕຳຫຼວດທຳຕາມໜ້າທີ່ຢ່າງເຕັມທີ່ ສ່ວນຜົນຈະອອກມາແນວໃດນັ້ນຈຶ່ງມາຕັດສິນກັນທີ່ຫຼັງ, ພ້ອມລະບຸອີກວ່າ: ທາງເຮົາກໍ່ໝັ້ນໃຈຂອງເຮົາ ວ່າບໍ່ໄດ້ມີສ່ວນຮ່ວມ ແລະ ທະນາຍທາງເຮົາກຳລັງປະກອບເອກະສານຫຼັກຖານ ເພື່ອເຂົ້າໄປສະແດງ ຢັ້ງຢືນຄວາມບໍລິສຸດຕໍ່ເຈົ້າໜ້າທີ່ ແລະ ກ່າວອີກວ່າ ບໍ່ຂໍລົງລາຍລະອຽດ ເພື່ອບໍ່ໃຫ້ເສຍຮູບຄະດີ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube