ແຜ່ນດິນຍັງໄຫວຢ່າງຕໍ່ເນື່ອງ ເຖິງ 45 ຄັ້ງແລ້ວ, ປະຊາຊົນໄຊຍະບູລີຍັງແຕກຕື່ນບໍ່ກ້າເຂົ້ານອນເຮືອນ

ລາຍງານເຫດການແຜ່ນດິນໄຫວທີ່ແຂວງໄຊຍະບູລີ ໂດຍອີງຕາມການລາຍງານຂອງກົມອຸຕຸນິຍົມວິທະຍາ ປະເທດໄທ, ນັບຕັ້ງແຕ່ເວລາ 23 ໂມງ 49 ນາທີ ວັນທີ 20 ພະຈິກ ເຖິງ ເວລາ 20 ໂມງ 08 ນາທີ ວັນທີ 21 ພະຈິກ 2019 ເກີດແຜ່ນດິນໄຫວແລ້ວ 45 ຄັ້ງ ໂດຍຄັ້ງຫຼ້າສຸດມີຄວາມຮຸນແຮງ 3.4 ຣິກເຕີ.

ຄັ້ງທີ່ຮຸນແຮງທີ່ສຸດຂະໜາດ 6.4 ຣິກເຕີ ເກີດຂຶ້ນເມື່ອເວລາ 06 ໂມງ 50 ນາທີ ວັນທີ 21 ພະຈິກນີ້, ເຊິ່ງແຮງສັ່ນສະເທືອນສາມາດຮັບຮູ້ໄດ້ເຖິງນະຄອນຫຼວງວຽງຈັນ, ນະຄອນຫຼວງບາງກອກ ປະເທດໄທ ແລະ ນະຄອນຫຼວງຮ່າໂນ້ຍ ປະເທດຫວຽດນາມ ແລະ ຍັງມີການສັ່ນໄຫວທີ່ຮຸນແຮງອີກຫຼາຍຄັ້ງດັ່ງນີ້:

  • 5.9 ຣິກເຕີ ເວລາ 04 ໂມງ 03 ນາທີ, 21 ພະຈິກ 2019
  • 4.3 ຣິກເຕີ ເວລາ 04 ໂມງ 19 ນາທີ, 21 ພະຈິກ 2019
  • 4.8 ຣິກເຕີ ເວລາ 07 ໂມງ 57 ນາທີ, 21 ພະຈິກ 2019
  • 4.4 ຣິກເຕີ ເວລາ 08 ໂມງ 14 ນາທີ, 21 ພະຈິກ 2019
  • 4.1 ຣິກເຕີ ເວລາ 14 ໂມງ 00 ນາທີ, 21 ພະຈິກ 2019

ເຖິງຢ່າງໃດກໍ່ຕາມ, ຍັງບໍ່ມີການລາຍງານຄວາມເສຍຫາຍຢ່າງເປັນທາງການ, ແຕ່ຈາກການເຜີຍແຜ່ພາບ ແລະ ວິດີໂອຄວາມເສຍຫາຍຜ່ານສື່ອອນລາຍ ຖືວ່າໝັກສົມຄວນ ໂດຍມີຫຼາຍເມືອງຂອງແຂວງໄຊຍະບູລີໄດ້ຮັບຜົນກະທົບເຊັ່ນ: ເມືອງໄຊຍະບູລີ, ຫົງສາ ແລະ ໄຊສະຖານ.

ເຊິ່ງໂຮງໄຟຟ້າຖ່ານຫິນຫົງສາ ກໍ່ໄດ້ຮັບຄວາມເສຍຫາຍສົມຄວນ ແລະ ກໍ່ໄດ້ມີການຢຸດການເດີນເຄື່ອງໂຮງໄຟຟ້າເປັນການຊົ່ວຄາວ ເພື່ອກວດສອບຄວາມເສຍຫາຍ.

ສຳລັບເຂື່ອນໄຊຍະບູລີ (ເຂື່ອນແມ່ນ້ຳຂອງ) ບໍລິສັດ ຊີເຄ ພາວເວີ ຈຳກັດ (ມະຫາຊົນ) ເຈົ້າຂອງໂຄງການ ໄດ້ອອກຖະແຫຼງການວ່າ: ໂຮງໄຟຟ້າພະລັງນ້ຳໄຊຍູລີ ຍັງຄົງເດີນເຄື່ອງຜະລິດ ແລະ ຈ່າຍໄຟຟ້າໃຫ້ກັບການໄຟຟ້າຝ່າຍຜະລິດແຫ່ງປະເທດໄທ ແລະ ລັດວິສາຫະກິດໄຟຟ້າລາວຕາມສັນຍາໄດ້ຢ່າງຕໍ່ເນື່ອງຕາມປົກກະຕິ, ພ້ອມລະບຸວ່າໄດ້ມີການຕິດຕາມສະຖານະການ ແລະ ຜົນກະທົບຈາກແຜ່ນດິນໄຫວຢ່າງໃກ້ຊິດ ທັງຮັບປະກັນວ່າໂຮງໄຟຟ້າມີມາດຕະການຄວາມປອດໄພສູງສຸດ.

ນອກຈາກນີ້, ປະຊາຊົນຍັງຢູ່ໃນຄວາມແຕກຕື່ນ ບໍ່ກ້າເຂົ້ານອນເຮືອນ ໃນຄ່ຳຄືນວັນທີ 21 ພະຈິກນີ້ ໄດ້ພາກັນອອກມານອນຢູ່ກາງເດີ່ນໂລ່ງແຈ້ງ, ຕາມເດີນກິລາ ເພື່ອຄວາມສະບາຍໃຈ ແລະ ເພື່ອຄວາມປອດໄພ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube