UN ປະນາມ ສ.ອາເມຣິກາ ທີ່ຈຳກັດວິຊາຕໍ່ນັກການທູດອີຣານ ແລະ ລັດເຊຍ

ລາຍງານ 19 ທັນວາ 2019, ສະມັດຊາໃຫຍ່ສະຫະປະຊາຊາດ (UNGA) ມີມະຕີເປັນເອກະພາບ ໃນກອງປະຊຸມເມື່ອວັນພຸດ 18 ທັນວາ ທີ່ຜ່ານມາ ຮຽກຮ້ອງໃຫ້ “ປະເທດໜຶ່ງ” ເຊິ່ງເປັນສະຖານທີ່ຕັ້ງຂອງສຳນັກງານອົງການລະຫວ່າງປະເທດຫຼາຍແຫ່ງ ລວມເຖິງສຳນັກງານໃຫຍ່ອົງການສະຫະປະຊາຊາດ ທີ່ນະຄອນນິວຢອກ ຍົກເລີກການກຳຈັດວີຊາແບບສະເພາະເຈາະຈົງ ຕໍ່ເຈົ້າໜ້າທີ່ການທູດຂອງອີຣານ ແລະ ປະນາມການທີ່ “ປະເທດນັ້ນ” ປະຕິເສດການອອກວີຊາໃຫ້ກັບນັກການທູດຂອງລັດເຊຍຫຼາຍຄັ້ງ ຊັດເຈນທີ່ສຸດຄືລະຫວ່າງກອງປະຊຸມ UNGA ເມື່ອເດືອນກັນຍາ ທີ່ຜ່ານມາ.

ເຖິງແມ່ນວ່າມະຕິດັ່ງກ່າວ ທີ່ຮ່ວມກັນສະເໜີໂດຍໄຊປຣັດ, ການາດາ, ຄອດສະຕາຣິກາ ແລະ ກົດດີວົວ ບໍ່ຖືວ່າມີຜົນຜູກພັນທາງກົດໝາຍ ແຕກຕ່າງຈາກມະຕິຂອງສະພາຄວາມໝັ້ນຄົງແຫ່ງສະຫະປະຊາຊາດ (UNSC) ທີ່ປຽບດັ່ງກົດໝາຍລະຫວ່າງປະເທດໄປໃນຕົວ, ແຕ່ການລົງມະຕິຂອງ UNGA ທຸກໆຄັ້ງມີນ້ຳໜັກໃນທາງການເມືອງ ແລະ ການທູດລະຫວ່າງປະເທດ ເຊິ່ງເນື້ອໃນຂອງມະຕີບໍ່ມີການໃຊ້ຖ້ອຍຄຳລະບຸເຖິງ ສ.ອາເມຣິກາທັງທາງກົງ ແລະ ທາງອ້ອມ ແຕ່ເນື້ອໃນນັ້ນສື່ຊັດເຈນເຖິງລັດຖະບານ ສ.ອາເມຣິກາ.

ສາຍພົວພັນລະຫວ່າງ ສ.ອາເມຣິກາ ແລະ ອີຣານແມ່ນກັບມາເຄັ່ງຕຶງອີກຄັ້ງເມື່ອເດືອນພຶດສະພາ ປີທີ່ຜ່ານມາ ຫຼັງຈາກລັດຖະບານ ສ.ອາເມຣິກາພາຍໃຕ້ການນຳຂອງທ່ານ ໂດໂນ ທຣຳ ຖອນຕົວອອກຈາກຂໍ້ຕົກລົງນິວເຄຼຍ ແລະ ເດີນໜ້າຍົກລະດັບມາດຕະການຂວ້ຳບາດລັດຖະບານອີຣານ.

ຂະນະທີ່ໃນຊ່ວງຂອງກອງປະຊຸມ UNGA ປີນີ້ ກະຊວງການຕ່າງປະເທດ ສ.ອາເມຣິກາ ໄດ້ຈຳກັດການເຄື່ອນໄຫວຂອງທ່ານ ໂມຣຳໝັດ ຈາວາດ ຊາຣີບ ລັດຖະມົນຕີກະຊວງການຕ່າງປະເທດອີຣານ ໃຫ້ຢູ່ພາຍໃນລັດສະໜີສະເພາະໃນອາຄານສຳນັກງານສະຫະປະຊາຊາດ ກັບເຮືອນຮັບແຂກຂອງເອກອັກຄະລັດຖະທູດອີຣານປະຈຳສະຫະປະຊາຊາດເທົ່ານັ້ນ ອັນໄດ້ເຮັດໃຫ້ມີຄຳວິຈານຢ່າງໜັກຈາກລັດຖະມົນຕີຕ່າງປະເທດອີຣານ ວ່າເຮັດໃຫ້ບໍ່ສາມາດເດີນທາງໄປຢ້ຽມຢາມເອກອັກຄະລັດຖະທູດທີ່ບໍ່ສະບາຍ ແລະ ປິ່ນປົວຢູ່ໂຮງໝໍໄດ້.

HTML tutorial