ອີຣານວ່າ ການຕີຖານທັບ ສ.ອາເມຣິກາ 2 ແຫ່ງໃນອິຣັກ ຄືການປ້ອງກັນຕົນເອງຕາມກົດບັດ UN

ລາຍງານ 8 ມັງກອນ 2020, ທຳນຽບຂ່າວອອກຖະແຫຼງການວ່າ ທ່ານ ໂດໂນ ທຣຳ ປະທານປະເທດ ສ.ອາເມຣິກາ ໄດ້ເຊີນເຈົ້າໜ້າທີ່ລະດັບສູງດ້ານຄວາມໝັ້ນຄົງປຶກສາຫາລືຮ່ວມກັນທີ່ທຳນຽບຂາວ ພາຍຫຼັງທີ່ກອງທັບປະຕິວັດອີຣານ ລະດົມຍິງຈະຫຼວດຫຼາຍກວ່າ 20 ລູກໂຈມຕີຖານທັບ ສ.ອາເມຣິກາ 2 ແຫ່ງໃນອິຣັກ ທີ່ແຂວງອັນບາ ທາງພາກຕາເວັນຕົກ ແລະ ເມືອງເອີບິວ ເຊິ່ງເປັນເມືອງເອກຂອງເຂດປົກຄອງຕົນເອງເຄີດິດສະຖານ ຕັ້ງຢູ່ທາງພາກເໜືອຂອງອິຣັກ.

ເຖິງຢ່າງໃດກໍ່ຕາມ, ສ.ອາເມຣິກາຍັງບໍ່ມີຄຳຖະແຫຼງ ຫຼື ການສະແດງຈຸດຢືນຢ່າງເປັນທາງການໃນມື້ນີ້ ແຕ່ຢືນຢັນວ່າຈະມີການຖະແຫຼງໃນຕອນເຊົ້າຂອງວັນພຸດ 9 ມັງກອນ ທີ່ຈະມາເຖິງຕາມເວລາທ້ອງຖິ່ນ, ຂະນະທີ່ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ໄດ້ສົ່ງຈົດໝາຍການທູດໄປຍັງສຳນັກງານທົ່ວໂລກ ຫ້າມນັກການທູດອາເມຣິກາພົບກັບບຸກຄົນ ແລະ ອົງກອນທີ່ມີຈຸດຢືນກົງກັນຂ້າມກັບອີຣານໂດຍບໍ່ໄດ້ຮັບອະນຸຍາດ ເພື່ອປ້ອງກັນບໍ່ໃຫ້ສະຖານະການບານປາຍໄປກວ່ານີ້.

ໃນດ້ານຂອງທ່ານ ໂມຮຳໝັດ ຈາວາດ ຊາຣີບ ລັດຖະມົນຕີກະຊວງການຕ່າງປະເທດອີຣານ ກ່າວເຖິງປະຕິບັດການທາງທະຫານຂອງກອງທັບປະຕິວັດອີຣານວ່າ ເປັນການປ້ອງກັນຕົນເອງ ໂດຍອ້າງອີງຕາມມາດຕາ 51 ຂອງກົດບັດສະຫະປະຊາຊາດ ພ້ອມທັງຢືນຢັນວ່າອີຣານບໍ່ມີຈຸດປະສົງເຂົ້າສູ່ສົງຄາມກັບ ສ.ອາເມຣິກາ, ສ່ວນກະຊວງປ້ອງກັນປະເທດ ສ.ອາເມຣິກາ ແລະ ກອງທັບ ສ.ອາເມຣິກາ ຍັງບໍ່ສະແດງຂໍ້ມູນກ່ຽວກັບຂອບເຂດຂອງຄວາມເສຍຫາຍທີ່ຖານທັບທັງສອງແຫ່ງ.