ຍີ່ປຸ່ນຊ່ວຍເຫຼືອລ້າມູນຄ່າ 13 ກວ່າລ້ານໂດລາ ໃຫ້ ສປປ.ລາວ ຈັດຊື້ອຸປະກອນທາງການແພດ

ລາຍງານ 6 ມິຖຸນາ 2020, ໂດຍອີງຕາມການລາຍງານຂອງສະຖານທູດຍີ່ປຸ່ນປະຈຳ ສປປ.ລາວ ໃຫ້ຮູ້ວ່າ: ໄດ້ມີພິທີລົງນາມເອກະສານແລກປ່ຽນສຳລັບໂຄງການຊ່ວຍເຫຼືອລ້າທີ່ມີຊື່ວ່າ ໂຄງການພັດທະນາເສດຖະກິດ ແລະ ສັງຄົມ ທີ່ຈັດຂຶ້ນຢູ່ກະຊວງການຕ່າງປະເທດ ເມື່ອວັນສຸກ (5 ມິຖຸນາ) ທີ່ຜ່ານມາ, ທີ່ລົງນາມໂດຍທ່ານ ທາເກວາກະ ເຄໂຊ ເອກອັກຄະລາຊະທູດຍີ່ປຸ່ນ ປະຈຳ ສປປ.ລາວ ແລະ ທ່ານ ທອງສະຫວັນ ພົມວິຫານ ຮອງລັດຖະມົນຕີກະຊວງການຕ່າງປະເທດ ໂດຍມີໂຕແທນຈາກບັນດາກະຊວງເຂົ້າຮ່ວມເປັນສັກຂີພະຍານ.

ໂຄງການຊ່ວຍເຫຼືອລ້າດັ່ງກ່າວມີມູນຄ່າ 1,500 ລ້ານເຢັນ (ປະມານ 13.7 ລ້ານໂດລາສະຫະລັດ) ຈະຖືກນຳໃຊ້ເຂົ້າໃນການຈັດຊື້ອຸປະກອນທາງການແພດເຊັ່ນ: ລົດໂຮງໝໍ ແລະ ຕຽງສຳລັບຄົນເຈັບ ເພື່ອມອບໃຫ້ແກ່ລັດຖະບານລາວ ໃນການຕອບໂຕ້ກັບພະຍາດໂຄວິດ-19, ໃນຂະນະທີ່ປັດຈຸບັນ ສປປ.ລາວ ສາມາດຈຳກັດການແຜ່ລະບາດຂອງພະຍາດໂຄວິດ-19 ໄດ້ຢ່າງມີປະສິດທິພາບ ການສືບຕໍ່ຍົກລະດົບລະບົບສາທາລະນະສຸກຂອງຊາດເອງກໍ່ມີຄວາມສຳຄັນ ໃນການກຽມພ້ອມຮັບມືກັບຄວາມເປັນໄປໄດ້ຂອງການແຜ່ລະບາດຮອບໃໝ່.

ໂດຍສະຖານທູດຍີ່ປຸ່ນລະບຸວ່າ: ຍີ່ປຸ່ນຈະສືບຕໍ່ຄວາມພະຍາຍາມເຮັດໃຫ້ການປະກັນສຸຂະພາບທົ່ວໜ້າ ເຊິ່ງເປັນໜຶ່ງໃນເປົ້າໝາຍການພັດທະນາແບບຍືນຍົງໃຫ້ປະກົດຜົນເປັນຈິງ ໂດຍຖືເອົາຫຼັກການ “ບໍ່ຖິ້ມໃຜໄວ້ທາງຫຼັງ” ອຸປະກອນການແພດທີ່ຖືກມອບພາຍໃຕ້ໂຄງການດັ່ງກ່າວນີ້ ຄາດວ່າຈະໄດ້ຮັບການນຳໃຊ້ຢ່າງມີປະສິດທິພາບທົ່ວປະເທດລາວ ໂດຍສະເພາະໃນລະດັບຊຸມຊົນທ້ອງຖິ່ນ ທີ່ເປັນເຂດລະບົບສາທາລະນະສຸກທີ່ມີຄວາມສ່ຽງ.

ນອກຈາກນີ້, ປີນີ້ຍັງເປັນປີທີ່ກ້າວເຂົ້າສູ່ວັນຄົບຮອບ 65 ປີສາຍພົວພັນທາງການທູດລະຫວ່າງ ສປປ.ລາວ ກັບ ຍີ່ປຸ່ນ ແລະ ຄົບຮອບ 5 ປີ ການເປັນຄູ່ຮ່ວມຍຸດທະສາດລະຫວ່າງສອງປະເທດ, ທ່ານທູດຍີ່ປຸ່ນໄດ້ກ່າວໃນພິທີວ່າ: ປະເທດຍີ່ປຸ່ນເອງໃນຖານະຄູ່ຮ່ວມຍຸດທະສາດຂອງ ສປປ.ລາວ ຂໍສະແດງຄວາມເຄົາລົບ ແລະ ໃຫ້ການສະໜັບສະໜູນຄວາມພາຍະຍາມຂອງລັດຖະບານລາວ ເພື່ອກ້າວຂ້າມສະຖານະການທີ່ຫຍຸ້ງຍາກໃນຄັ້ງນີ້ ໂດຍຜ່ານການຊ່ວຍເຫຼືອລ້າໃນຄັ້ງນີ້ ພວກເຮົາມີຄວາມຫວັງທີ່ຈະຈັບມືກັນຍ່າງກ້າວຂ້າມອຸປະສັກໃນຄັ້ງນີ້ໃຫ້ໄດ້.

HTML tutorial