ສ.ອາເມຣິກາ ສະເໜີ UNSC ຢຶດຊັບ ແລະ ຂຶ້ນບັນຊີດຳຜູ້ນຳເກົາຫຼີເໜືອ

ສຳນັກຂ່າວຕ່າງປະເທດລາຍງານເມື່ອວັນທີ 6 ກັນຍາ 2017 ທີ່ຜ່ານມາວ່າ: ທ່ານ ນາງ ນິກກີ້ ເຮລີ ເອກອັກຄະລັດຖະທູດສະຫະລັດ ອາເມຣິກາ ປະຈຳສະຫະປະຊາຊາດ (UN) ສະເໜີຮ່າງມາດຕະການຂວໍ້າບາດເກົາຫຼີເໜືອຮອບໃໝ່ເຂົ້າສູ່ການພິຈາລະນາຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດ (UNSC) ເພື່ອລົງໂທດທີ່ເກົາຫຼີເໜືອທົດລອງລະເບີດນິວເຄຼຍຄັ້ງທີ 6 ເຊິ່ງເປັນຄັ້ງທີ່ລະເບີດທີ່ມີຄວາມຮຸນແຮງທີ່ສຸດອີກດ້ວຍ ເມື່ອວັນທີ 3 ກັນຍາ 2017 ທີ່ຜ່ານມາ, ໂດຍທ່ານ ນາງ ເຮລີກ່າວວ່າ ຕ້ອງການໃຫ້ທີ່ປະຊຸມລົງມະຕິໃນວັນຈັນທີ 11 ກັນຍາ 2017 ນີ້.

ເຊິ່ງມີລາຍງານວ່າ ມາດຕະການຂວໍ້າບາດຕໍ່ເກົາຫຼີເໜືອຮອບໃໝ່ນີ້ຈະເປັນການເນັ້ນໄປທີ່ຂໍ້ຈຳກັດການຄ້າຂາຍນ້ຳມັນລະຫວ່າງປະຊາຄົມໂລກກັບເກົາຫຼີເໜືອ ໂດຍຂໍ້ມູນເບື້ອງຕົ້ນຂອງ UN ລະບຸວ່າຈີນເປັນປະເທດທີ່ໃຫ້ການຊ່ວຍເຫຼືອເກົາຫຼີເໜືອໃນດ້ານນີ້ຫຼາຍທີ່ສຸດ ດ້ວຍສະຖິຕິການສົ່ງອອກນ້ຳມັນດິບໄປເກົາຫຼີເໜືອປີລະ 500,000 ໂຕນ ແລະ ຜະລິດຕະພັນຈາກປີໂຕຣລຽມອີກປະມານ 200,000 ໂຕນຕໍ່ປີ ຮອງລົງມາຄືລັດເຊຍທີ່ສົ່ງອອກນ້ຳມັນດິບໄປເກົາຫຼີເໜືອປີລະປະມານ 40,000 ໂຕນ.

ໃນຂະນະດຽວກັນແຜນການຂວໍ້າບາດທີ່ສະເໜີໂດຍສະຫະລັດ ອາເມຣິການັ້ນມີຄວາມຍາວ 13 ໜ້າ ຍັງລວມໄປເຖິງການຈຳກັດການສົ່ງອອກສິນຄ້າປະເພດເຄື່ອງນຸ່ງຫົ່ມສຳເລັດຮູບຂອງເກົາຫຼີເໜືອອີກດ້ວຍ ແຕ່ເປັນທີ່ໜ້າສົນໃຈທີ່ສຸດຄື ການກຽມຂຶ້ນບັນຊີດຳທ່ານ ຄິມ ຈອງ-ອຶນ ຜູ້ນຳສູງສຸດ ແລະ ເຈົ້າໜ້າທີ່ລະດັບສູງໃນພັກແຮງງານເກົາຫຼີເໜືອ 4 ຄົນ ໂດຍຈະມີການຢຶດຊັບໃນຕ່າງປະເທດ ແລະ ຫ້າມເດີນທາງອອກນອກປະເທດ ນອກຈາກນີ້ ສາຍການບິນແຫ່ງຊາດຂອງເກົາຫຼີເໜືອ, ກອງທັບປະຊາຊົນເກົາຫຼີ ແລະ ໜ່ວຍງານລັບອີກ 8 ແຫ່ງຈະຢູ່ໃນບັນຊີດຳເຊັ່ນກັນ.

ທີ່ຜ່ານມາ UNSC ອອກມາດຕະການຂວໍ້າບາດເກົາຫຼີເໜືອມາແລ້ວ 8 ຄັ້ງ ນັບຕັ້ງແຕ່ການທົດສອບລະເບີດນິວເຄຼຍຄັ້ງທຳອິດຂອງເກົາຫຼີເໜືອ ເມື່ອປີ 2006 ແລະ ສະບັບຫຼ້າສຸດປະກາດເມື່ອວັນທີ 5 ສິງຫາ 2017 ທີ່ຜ່ານມາ ເພື່ອລົງໂທດທີ່ເກົາຫຼີເໜືອທົດລອງຂີປະນາວຸດຂ້າມທະວີບ (ICBM) 2 ຄັ້ງ ເມື່ອເດືອນກໍລະກົດທີ່ຜ່ານມາ ໂດຍເນັ້ນໄປທີ່ການສົ່ງອອກແຮ່ທາດ ແລະ ອາຫານທະເລ ທີ່ອາດສ້າງຄວາມເສຍຫາຍທາງເສດຖະກິດໃຫ້ແກ່ເກົາຫຼີເໜືອຫຼາຍເຖິງປີລະ 1,000 ລ້ານໂດລາສະຫະລັດ.

- Advertisement -