ລັດເຊຍເປີດສາກການເຝິກຊ້ອມຮົບ ຄັ້ງຍິ່ງໃຫຍ່ທີ່ສຸດ ນັບຕັ້ງແຕ່ສິ້ນສຸດສົງຄາມເຢັນ

ສຳນັກຂ່າວຕ່າງປະເທດລາຍງານ 12 ກັນຍາ 2018 ວ່າ: ກອງທັບລັດເຊຍ ໄດ້ເປີດສາກການຊ້ອມຮົບຄັ້ງຍິ່ງໃຫຍ່ຂຶ້ນ ພາຍໃຕ້ລະຫັດ Vostok-2018 ຫຼື ຕາເວັນອອກ-2018 ຢ່າງເປັນທາງການຢູ່ພາກຕາເວັນອອກໄກຂອງລັດເຊຍ ເມື່ອວັນອັງຄານ 11 ກັນຍາ ທີ່ຜ່ານມາ. ການຊ້ອມຮົບດັ່ງກ່າວເປັນການຮ່ວມມືລະຫວ່າງລັດເຊຍ, ຈີນ ແລະ ມົງໂກລີ ໂດຍຈະໃຊ້ເວລາ 1 ອາທິດເຕັມໃນການເຝິກຊ້ອມ ລະຫວ່າງວັນທີ 11-17 ກັນຍາ ມີທະຫານລັດເຊຍຈາກທຸກເຫຼົ່າທັບເຂົ້າຮ່ວມທັງໝົດ 300,000 ຄົນ ຫຼື 1 ໃນ 3 ຂອງກຳລັງພົນທັງໝົດ, ກອງທັບປົດປ່ອຍປະຊາຊົນຈີນ ສົ່ງທະຫານເຂົ້າຮ່ວມ 3,500 ຄົນ ສ່ວນທີ່ເຫຼືອອີກຈຳນວນໜຶ່ງເປັນທະຫານຈາກມົງໂກລີ.

ຂະນະດຽວກັນ, ໃນການເຝິກຊ້ອມຄັ້ງນີ້ຍັງຈະເປັນການສະແດງເຖິງຄວາມອາດສາມາດຂອງລົດຕັງ 36,000 ຄັນ, ຍົນຮົບອີກຫຼາຍກວ່າ 1,000 ລຳ ແລະ ເຮືອຮົບອີກ 80 ລຳ ເຊິ່ງຂໍ້ມູນຈາກກະຊວງປ້ອງກັນປະເທດລັດເຊຍລະບຸວ່າ Vostok-2018 ເປັນການເຝິກຊ້ອມຮົບຄັ້ງຍິ່ງໃຫຍ່ທີ່ສຸດຂອງລັດເຊຍ ນັບຕັ້ງແຕ່ປະຕິບັດການຊາປັດ-1981 ຫຼື ຕາເວັນຕົກ 1981 ຫຼື ໃນສະໄໝສະຫະພາບໂຊວຽດ ເຊິ່ງເປັນຊ່ວງໄລຍະຂອງສົງຄາມເຢັນ.

ເຊິ່ງການເຝິກຊ້ອມຮົບ Vostok-2018 ຍັງເກີດຂຶ້ນໃນຊ່ວງໄລຍະເວລາດຽວກັນກັບທີ່ທ່ານ ສີ ຈິ້ນຜິງ ປະທານປະເທດຈີນ ເດີນທາງຢ້ຽມຢາມເມືອງວະລາດິວອສຕັອກ ທີ່ຢູ່ທາງພາກຕາເວັນອອກຂອງລັດເຊຍ ເພື່ອເຂົ້າຮ່ວມການປະຊຸມເສດຖະກິດຕາເວັນອອກ ເຊິ່ງປີນີ້ຖືເປັນຄັ້ງທີ 4 ໂດຍຜູ້ນຳທັງສອງປະເທດຢືນຢັນການເປັນຮຸ້ນສ່ວນທາງຍຸດທະສາດ ເພື່ອຕໍ່ສູ້ກັບຂົ້ວອຳນາດດຽວ ທີ່ໝາຍເຖິງສະຫະລັດ ອາເມຣິກາ, ໃນດ້ານຂອງທ່ານ ພົນເອກ ເຈມ ແມັດທິສ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກ່າວເຖິງການທີ່ຈີນສົ່ງທະຫານ ແລະ ໃຫ້ການສະໜັບສະໜູນດ້ານອາວຸດຍຸດໂທປະກອນບາງສ່ວນໃນປະຕິບັດການຄັ້ງນີ້ວ່າ ເປັນໄປເພື່ອການປົກປ້ອງຜົນປະໂຫຍດຂອງປະເທດ ແລະ ຕີລາຄາວ່າບໍ່ອາດສົ່ງຜົນໃນໄລຍະຍາວ ແຕ່ທ່ານ ພົນເອກ ຣັອບ ແມນນິງ ໂຄສົກກະຊວງປ້ອງກັນປະເທດສະຫະລັດ ອາເມຣິກາ ກ່າວວ່າຈະຕິດຕາມການຊ້ອມຮົບຄັ້ງນີ້ຢ່າງໃກ້ຊິດ.