ທ່ານນາຍົກລັດຖະມົນຕີ ພົບປະກັບການນຳຂັ້ນສູງຂອງຫວຽດນາມ

Laos Prime Minister Thongloun Sisoulith, (L), and Vietnam's Prime Minister Nguyen Xuan Phuc / AFP PHOTO / POOL / Nhac NGUYEN
AFP PHOTO / POOL / Nhac NGUYEN

ສຳນັກຂ່າວສານປະເທດລາວລາຍງານ 13 ກັນຍາ 2018 ວ່າ: ໃນໂອກາດທີ່ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ເດີນທາງເຂົ້າຮ່ວມກອງປະຊຸມເວທີປຶກສາຫາລືເສດຖະກິດໂລກ ກ່ຽວກັບອາຊຽນ ຄັ້ງທີ 27 ທີ່ຮ່າໂນ້ຍ ປະເທດຫວຽດນາມ, ໃນຕອນເຊົ້າຂອງວັນພະຫັດນີ້ ທ່ານ ທອງລຸນ ສີສຸລິດ ພ້ອມດ້ວຍຄະນະໄດ້ເຂົ້າພົບທ່ານ ຫງວຽນ ຟູ ຈ້ອງ ເລຂາທິການໃຫຍ່ພັກຄອມມູນິດຫວຽດນາມ.

ໃນໂອກາດດັ່ງກ່າວ, ທ່ານ ຫງວຽນ ຟູ ຈ້ອງ ກໍ່ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ, ຊົມເຊີຍ ແລະ ຕີລາຄາສູງຕໍ່ທ່ານນາຍົກລັດຖະມົນຕີຂອງລາວ ແລະ ຄະນະທີ່ໄດ້ເດີນທາງມາຮ່ວມກອງປະຊຸມ, ຢ້ຽມຢາມ ແລະ ປະຕິບັດໜ້າທີ່ຢູ່ຫວຽດນາມໃນຄັ້ງນີ້ ເຊິ່ງເປັນຂີດໝາຍອັນສຳຄັນທີ່ປະກອບສ່ວນເຂົ້າໃນການຮັດແໜ້ນສາຍພົວພັນອັນພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ທີ່ມີມາແຕ່ດົນນານ, ໂດຍສະເພາະແມ່ນການແລກປ່ຽນບົດຮຽນ, ການຊ່ວຍເຫຼືອເຊິ່ງກັນ ແລະ ກັນໃນວຽກງານຕ່າງໆໃຫ້ແຕກດອກອອກຜົນຍິ່ງໆຂຶ້ນ. ໃນໂອກາດດຽວກັນ ທ່ານ ທອງລຸນ ສີສຸລິດ ກໍ່ໄດ້ສະແດງຄວາມຂອບໃຈຢ່າງຈິງໃຈ ມາຍັງທ່ານ ຫງວຽນ ຟູ ຈ້ອງ ທີ່ໄດ້ໃຫ້ການຕ້ອນຮັບຢ່າງອົບອຸ່ນ, ພ້ອມທັງສະແດງຄວາມຂອບໃຈຢ່າງສູງມາຍັງພັກ-ລັດ ແລະ ປະຊາຊົນຫວຽດນາມ ທີ່ໄດ້ໃຫ້ການຊ່ວຍເຫຼືອອັນລ້ຳຄ່າແກ່ປະຊາຊົນລາວໃນເມືອງສະໜາມໄຊ ແຂວງອັດຕະປື ທີ່ໄດ້ຮັບຜົນກະທົບຈາກເຫດເຂື່ອນເຊປຽນ-ເຊນ້ຳນ້ອຍແຕກ ໃນທ້າຍເດືອນກໍລະກົດ ທີ່ຜ່ານມາ.

Laos Prime Minister Thongloun Sisoulith, (L), and Vietnam’s Prime Minister Nguyen Xuan Phuc / AFP PHOTO / POOL / Nhac NGUYEN

ໃນຕອນເຊົ້າຂອງວັນດຽວກັນ ທ່ານ ທອງລຸນ ສີສຸລິດ ກໍ່ໄດ້ນຳພາຄະນະຜູ້ແທນພົບປະສອງຝ່າຍກັບທ່ານ ຫງວຽນ ຊວັນ ຟຸກ ນາຍົກລັດຖະມົນຕີຫວຽດນາມ ເຊິ່ງທ່ານ ທອງລຸນ ສີສຸລິດ ໄດ້ສະແດງຄວາມຊົມເຊີຍຕໍ່ຜົນສຳເລັດອັນຈົບງາມ ໃນການເປັນເຈົ້າພາບຈັດກອງປະຊຸມເວທີປຶກສາຫາລືເສດຖະກິດໂລກ ວ່າດ້ວຍອາຊຽນ ຄັ້ງນີ້ ອັນເປັນການປະກອບສ່ວນຍົກສູງຖານະບົດບາດ, ຊື່ສຽງຂອງຫວຽດນາມໃນເວລາສາກົນຂຶ້ນອີກບາດກ້າວໜຶ່ງ. ການພົບປະສອງຝ່າຍໃນຄັ້ງນີ້ ທ່ານ ທອງລຸນ ສີສຸລິດ ກໍ່ໄດ້ສະແດງຄວາມຊົມເຊີຍຕໍ່ການຕ້ອນຮັບອັນອົບອຸ່ນມາຍັງທ່ານ ຫງວຽນ ຊວັນ ຟຸກ ແລະ ໄດ້ພົບປະກັນເປັນປົກກະຕິໃນທຸກໆກອງປະຊຸມທີ່ສຳຄັນໃນພາກພື້ນ ແລະ ສາກົນ ເຊິ່ງສະແດງເຖິງມູນເຊື້ອສາຍພົວພັນອັນພິເສດ ເພື່ອເສີມຂະຫຍາຍສາຍພົວພັນຮ່ວມມືລະຫວ່າງສອງຊາດລາວ-ຫວຽດນາມ ໃຫ້ນັບມື້ນັບມີປະສິດທິຜົນຍິ່ງໆຂຶ້ນ, ທັງໄດ້ຕີລາຄາສູງຕໍ່ຄວາມພະຍາຍາມຂອງທ່ານນາຍົກລັດຖະມົນຕີຫວຽດນາມ ແລະ ພັກ-ລັດຖະບານຫວຽດນາມ ທີ່ໄດ້ເອົາໃຈໃສ່ສ້າງເງື່ອນໄຂອຳນວຍຄວາມສະດວກ ແລະ ໃຫ້ການຊ່ວຍເຫຼືອ ເພື່ອການພັດທະນາແກ່ ສປປ.ລາວ ມາຕະຫຼອດ, ພ້ອມທັງເຊື່ອໝັ້ນວ່າສອງນາຍົກພວກເຮົາ ຈະພ້ອມກັນເຮັດວຽກຮ່ວມກັນ ບົນຈິດໃຈການຕົກລົງຂອງສອງພັກ, ສອງລັດ ແລະ ສັນຍາຕ່າງໆທີ່ສອງຝ່າຍໄດ້ລົງນາມຮ່ວມກັນ.

AFP PHOTO / POOL / Nhac NGUYEN

ໃນໂອກາດດັ່ງກ່າວນີ້, ທ່ານ ທອງລຸນ ສີສຸລິດ ໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ແລະ ຂອບໃຈຢ່າງຈິງໃຈມາຍັງພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ ໂດຍສະເພາະມາຍັງທ່ານນາຍົກລັດຖະມົນຕີຫວຽດນາມ ທີ່ໄດ້ສົ່ງຄວາມເຫັນອົກເຫັນໃຈ ແລະ ການຊ່ວຍເຫຼືອເປັນເງິນ, ວັດຖຸສິ່ງຂອງບັນເທົາທຸກ, ນັບທັງທີມກູ້ໄພ, ແພດໝໍ ແລະ ອຸປະກອນຕ່າງໆ ໄດ້ຊ່ວຍເຫຼືອຕໍ່ເຫດການໄພພິບັດເຂື່ອນແຕກ ຢູ່ເມືອງສະໜາມໄຊ ແຂວງອັດຕະປືໄດ້ທັນການ. ໃນຂະນະທີ່ປະຊາຊົນຫວຽດນາມ ກໍ່ໄດ້ປະສົບໄພທຳມະຊາດອັນຮ້າຍແຮງ, ມີຝົນຕົກໜັກຢູ່ຫຼາຍແຂວງພາກເໜືອຂອງຫວຽດນາມເຊັ່ນດຽວກັນ, ທ່ານ ທອງລຸນ ສີສຸລິດ ກໍ່ໄດ້ຕ່າງໜ້າພັກ, ລັດຖະບານ ແລະ ປະຊາຊົນລາວສະແດງຄວາມເປັນອົກເຫັນໃຈມາຍັງພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງມານະໂອກາດນີ້ດ້ວຍ.

AFP PHOTO / POOL / Nhac NGUYEN