ກົມອຸຕຸອອກແຈ້ງເຕືອນ ໃຫ້ກຽມພ້ອມຮັບມືກັບພາຍຸໄຕ້ຝຸ່ນມັງຄຸດ

ກົມອຸຕຸນິຍົມ ແລະ ອຸທົກກະສາດ ອອກແຈ້ງເຕືອນພາຍຸໄຕ້ຝຸ່ນມັງຄຸດ (MANGKHUT) ເລກທີ 1017/ກອຕທ ລົງວັນທີ 14 ກັນຍາ 2018 ໂດຍມີເນື້ອໃນລະບຸວ່າ:

ພາຍຸໄຕ້ຝຸ່ນມັງຄຸດ ຫົວທີ 22 ໃນເວລາ 07 ໂມງເຊົ້າຂອງວັນທີ 14 ກັນຍາ 2018 ມີຈຸດທີ່ຕັ້ງຢູ່ບໍລິເວນມະຫາສະໝຸດປາຊີຟິກ, ຢູ່ເສັ້ນຂະໜານທີ່ 16.0 ອົງສາເໜືອ ແລະ ເສັ້ນແວງທີ 126.9 ອົງສາຕາເວັນອອກ ກຳລັງເຄື່ອນທີ່ມາທາງຕາເວັນຕົກ ຫາ ຕາເວັນຕົກສຽງເໜືອ ດ້ວຍຄວາມໄວ 20 ກິໂລແມັດຕໍ່ຊົ່ວໂມງ ຄາດວ່າໃນໄລຍະວັນທີ 14-15 ກັນຍາ 2018 ພາຍຸໄຕ້ຝຸ່ນຫົວນີ້ຈະເຄື່ອນທີ່ຜ່ານປະເທດຟິລິບປິນ.

ຈາກນັ້ນວັນທີ 16-17 ກັນຍາ 2018 ຈະເຄື່ອນທີ່ຜ່ານເຂດພາກໃຕ້ຂອງປະເທດຈີນ ແລະ ຈະຜ່ານເກາະໄຮໜານ ແລະ ສືບຕໍ່ເຄື່ອນຜ່ານພາກເໜືອປະເທດຫວຽດນາມ ໃນວັນທີ 17-18 ກັນຍາ 2018 ແລະ ຈະສືບຕໍ່ຜ່ານພາກເໜືອຂອງປະເທດລາວ ເຊິ່ງຈະເຮັດໃຫ້ມີຝົນຕົກໃນລະດັບຄ່ອຍ ພ້ອມມີລົມພັດແຮງຢູ່ເກືອບທົ່ວໄປ ແລະ ຕົກປານກາງ ຫາ ຕົກໜັກຢູ່ບາງທ້ອງຖິ່ນແຂວງພາກເໜືອ ແລະ ພາກກາງຂອງປະເທດລາວເຊັ່ນ: ແຂວງຜົ້ງສາລີ, ຊຽງຂວາງ, ຫົວພັນ, ຫຼວງນ້ຳທາ, ຫຼວງພະບາງ, ອຸດົມໄຊ, ບໍ່ແກ້ວ, ໄຊຍະບູລີ, ໄຊສົມບູນ, ວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ, ນັບທັງນະຄອນຫຼວງວຽງຈັນ.

ດັ່ງນັ້ນ, ຈຶ່ງແຈ້ງເຕືອນເຖິງພໍ່ແມ່ປະຊາຊົນບັນດາເຜົ່າ, ອຳນາດການປົກຄອງ ແລະ ອົງການຈັດຕັ້ງທຸກພາກສ່ວນທີ່ອາໄສຢູ່ບັນດາແຂວງດັ່ງກ່າວ ຈົ່ງມີສະຕິ ແລະ ກຽມພ້ອມຮັບມືກັບສະພາບຝົນຕົກໜັກ, ເຊິ່ງຈະເຮັດໃຫ້ມີຕົ້ນໄມ້ຫັກລົ້ມ, ດິນເຈື່ອນ, ນ້ຳຖ້ວມຊຸ, ນ້ຳຖ້ວມອັ່ງ ແລະ ລົມພັດແຮງ ພ້ອມນີ້ຂໍໃຫ້ເກັບມ້ຽນ ແລະ ເຄື່ອນຍ້າຍວັດຖຸສິ່ງຂອງພ້ອມສັດລ້ຽງໄປໄວ້ບ່ອນທີ່ສູງ ແລະ ປອດໄພ. ຂໍໃຫ້ຕິດຕາມຂ່າວພະຍາກອນອາກາດ ແລະ ລະດັບນ້ຳຈາກກົມອຸຕຸນິຍົມ ແລະ ອຸທົກກະສາດເປັນປະຈຳ.