ລັດແຈ້ງການຫ້າມນຳເຂົ້າໝູ ຈາກ ສປ.ຈີນ ເພາະພະຍາດອະຫິວາໝູລະບາດຢູ່ຈີນ

AFP PHOTO / GREG BAKER / FOCUS by Becky DAVIS
AFP PHOTO / GREG BAKER / FOCUS by Becky DAVIS

ກະຊວງກະສິກຳ ແລະ ປ່າໄມ້ ໄດ້ອອກແຈ້ງການ ເລກທີ 0945/ກປ ລົງວັນທີ 5 ກັນຍາ 2018 ກ່ຽວກັບການໂຈະຊົ່ວຄາວ ການນຳເຂົ້າໝູຊີ້ນ, ໝູພໍ່ແມ່ພັນ, ໝູນ້ອຍ ແລະ ຜະລິດຕະພັນຊີ້ນໝູທຸກຊະນິດ ຈາກ ສປ.ຈີນ ເຂົ້າສູ່ ສປປ.ລາວ ໂດຍແຈ້ງການລະບຸໃຫ້ຮູ້ວ່າ:

ອົງການສຸຂະພາບສັດສາກົນໄດ້ລາຍງານ ແລະ ແຈ້ງໃຫ້ຊາບວ່າ: ພະຍາດອະຫິວາໝູອາຟຣິກາ ແມ່ນພະຍາດລະບາດຂອງໝູ ທີ່ເກີດມາຈາກເຊື້ອໄວຣັສຕະກູນ Iridoviridae ເຊື້ອໄວຣັສດັ່ງກ່າວນີ້ ມີຄວາມທົນທານສູງຕໍ່ສະພາບແວດລ້ອມ, ມີຊີວິດທົນຢູ່ໄດ້ໃນເງື່ອນໄຂທີ່ມີຄວາມເປັນກົດເປັນດ່າງສູງ ໃນລະດັບ ph: 3.9-11.5 ຢູ່ໃນຊາກສັດແຊ່ແຂງໄດ້ດົນເຖິງ 15 ປີ ແລະ ສາມາດຖືເຊື້ອຢູ່ໃນໝູໄດ້ເຖິງ 4 ປີ.

ພະຍາດອະຫິວາໝູອາຟຣິກາ ສາມາດຕິດຕໍ່ໄດ້ຈາກການສຳພັດກັບໝູຕິດເຊື້ອໂດຍກົງ ຫຼື ທາງອ້ອມໂດຍຜ່ານຄົນ, ອຸປະກອນ, ພາຫະນະ, ອາຫານສັດ ແລະ ຜ່ານພາຫະນະນຳເຊື້ອຈຳນວກເຫັບ, ເຫົາ, ມີໄລຍະການຝັກເຊື້ອ 48-72 ຊົ່ວໂມງ ໂດຍມີອາການແບບຕາຍຢ່າງກະທັນຫັນ ແລະ ແບບຊ້ຳເຮື້ອ, ສັດທີ່ເປັນພະຍາດຈະມີໄຂ້ສູງເຖິງ 42 ອົງສາເຊ, ໃບຫູ, ຜິວໜັງອາດພົບເປັນປ່າມແດງຊ້ຳ, ມີຈຸດເນື້ອຕາຍເປັນຈຸດຢູ່ຕາມຜິວໜັງ, ພື້ນຫ້ອງ ອັດຕາການຕາຍສູງເຖິງ 90% ຍັງບໍ່ມີຢາປ້ອງກັນ ແລະ ປິ່ນປົວເທື່ອ, ພະຍາດນີ້ ເກີດການລະບາດຄັ້ງທຳອິດ ໃນປີ 1909 ໃນທະວີບອາຟຣິກາ ຕໍ່ມາໄດ້ເກີດລະບາດຢູ່ບາງປະເທດໃນທະວີບເອີຣົບ ແລະ ອາຊີ.

ໃນມໍ່ໆມານີ້ ໄດ້ເກີດການລະບາດ ຢູ່ໃນຟາມລ້ຽງໝູ ຂອງແຂວງຫຼຽວໜິງ ສປ.ຈີນ (ລາຍງານຈາກອົງການສຸຂະພາບສັດສາກົນ OIE). ສະເພາະ ສປປ.ລາວ ພວກເຮົາບໍ່ເຄີຍເກີດການລະບາດຂອງພະຍາດດັ່ງກ່າວຈັກເທື່ອ. ສະນັ້ນ, ເພື່ອປ້ອງກັນ ແລະ ສະກັດກັ້ນ ບໍ່ໃຫ້ພະຍາດແຜ່ລະບາດເຂົ້າສູ່ ສປປ.ລາວ ລັດຖະມົນຕີກະຊວງກະສິກຳ ແລະ ປ່າໄມ້ຈຶ່ງໄດ້ອອກແຈ້ງການສະບັບນີ້ ເພື່ອສັ່ງໃຫ້ໂຈະຊົ່ວຄາວການນ້ຳເຂົ້າໝູຊີ້ນ, ໝູພໍ່ແມ່ພັນ, ໝູນ້ອຍ ແລະ ຜະລິດຕະພັນຊີ້ນໝູທຸກຊະນິດຈາກ ສປ.ຈີນ ເຂົ້າສູ່ ສປປ.ລາວ.