ລາວ-ກຳປູເຈຍ ສືບຕໍ່ແກ້ໄຂບັນຫາຊາຍແດນ, ສ່ວນກຳປູເຈຍ ຈະຖອນກຳລັງອອກຈາກເຂດຄົງຄ້າງ

AFP PHOTO / YE AUNG THU
AFP PHOTO / YE AUNG THU

ສຳນັກຂ່າວສານປະເທດລາວລາຍງານວ່າ: ພາຍຫຼັງສຳເລັດການພົບປະສອງຝ່າຍ ຢູ່ນະຄອນຫຼວງຮ່າໂນ້ຍ ປະເທດຫວຽດນາມ ໃນວັນທີ 13 ກັນຍາ 2018 ທີ່ຜ່ານມາ, ທ່ານນາຍົກລັດຖະມົນຕີລາວ-ກຳປູເຈຍ ໄດ້ຮ່ວມກັນຖະແຫຼງຜົນການປຶກສາຫາລື ເພື່ອແກ້ໄຂບັນຫາຊາຍແດນລະຫວ່າງສອງປະເທດ, ໂດຍສົມເດັດ ຮຸນເຊນ ນາຍົກລັດຖະມົນຕີກຳປູເຈຍ ເວົ້າແຈ້ງວ່າໄດ້ສັ່ງໃຫ້ທະຫານກຳປູເຈຍ ຖອນອອກຈາກເຂດຊາຍແດນທີ່ຍັງເປັນຈຸດຄົງຄ້າງແລ້ວ.

ສົມເດັດ ຮຸນເຊນ ໄດ້ກ່າວວ່າ: ເປັນການແຈ້ງຂ່າວຢ່າງຊັດເຈນຕໍ່ປະຊາຊົນຂອງສອງປະເທດ ເພື່ອເປັນຫຼັກຖານອັນໜຶ່ງໃຫ້ແກ່ປະຊາຊົນ ກໍ່ຄືທະຫານກອງທັບໃຫ້ສາມາດປະຕິບັດໄດ້ ເທື່ອນີ້ເປັນຄັ້ງທີສາມ ທີ່ລາວ ແລະ ກຳປູເຈຍ ໄດ້ຮ່ວມຖະແຫຼງການຮ່ວມ ຄັ້ງທຳອິດແມ່ນຢູ່ນະຄອນຫຼວງວຽງຈັນ, ຄັ້ງທີສອງແມ່ນຢູ່ນະຄອນຫຼວງພະນົມເປັນ ແລະ ເທື່ອນີ້ທີ່ນະຄອນຫຼວງຮ່າໂນ້ຍ. ຂ້າພະເຈົ້າຖືໂອກາດນີ້ ຊີ້ແຈງກ່ຽວກັບເຂດຫ້ວຍຕະເງົ້າ ເຊິ່ງພວກເຮົາຖືວ່າເປັນເຂດທີ່ຍັງບໍ່ທັນແກ້ໄຂ, ໃນນັ້ນພວກເຮົາມີເງື່ອນໄຂສາມຢ່າງກ່ຽວກັບເຂດທີ່ຍັງບໍ່ທັນແກ້ໄຂຄື: ອັນທີໜຶ່ງ ບໍ່ໃຫ້ມີກອງທັບທະຫານ, ສອງບໍ່ໃຫ້ມີປະຊາຊົນຢູ່ທີ່ນັ້ນ ແລະ ສາມຕ້ອງລາດຕະເວນຮ່ວມກັນ. ການລາດຕະເວນຮ່ວມກັນ ພວກເຮົາສາມາດເດີນທາງທາງບົກ ແລະ ໃຊ້ໂດຣນໄດ້, ການລາດຕະເວນທາງບົກກໍ່ຕ້ອງຮ່ວມກັນ, ການໃຊ້ໂດຣນກໍ່ຕ້ອງໃຊ້ຮ່ວມກັນ.

ກ່ຽວກັບການຖອນທະຫານຂອງຝ່າຍກຳປູເຈຍ, ຂ້າພະເຈົ້າໄດ້ລົມກັບທ່ານນາຍົກລັດຖະມົນຕີຂອງລາວແລ້ວວ່າ ຂ້າພະເຈົ້າໄດ້ສັ່ງໃຫ້ທະຫານກຳປູເຈຍຖອນກຳລັງອອກຈາກເຂດດຫ້ວຍຕະເງົ້າ ນັບແຕ່ດຽວນີ້ຈົນຮອດ 5 ໂມງແລງມື້ອື່ນ ແລະ ກອງກຳລັງດັ່ງກ່າວເຄີຍລາດຕະເວນແຕ່ພຽງຝ່າຍດຽວ, ດຽວນີ້ຈະໃຫ້ຖອນກຳລັງທະຫານອອກຈາກເຂດດັ່ງກ່າວໃຫ້ໝົດ. ສິ່ງໃໝ່ໆທີ່ພວກເຮົາສ້າງຂຶ້ນ ແມ່ນເພື່ອຄວາມໄວເນື້ອເຊື່ອໃຈຮ່ວມກັນ, ພວກເຮົາຕົກລົງໃຫ້ມີການລາດຕະເວນຮ່ວມສອງປະເທດ, ແຕ່ກ່ອນຕ່າງຝ່າຍຕ່າງລາດຕະເວນຂອງໃຜຂອງລາວ, ຝ່າຍທະຫານກຳປູເຈຍກໍ່ລາດຕະເວນຢູ່ເບື້ອງກຳປູເຈຍ, ຝ່າຍລາວກໍ່ລາດຕະເວນຢູ່ເບື້ອງຂອງລາວ. ປັດຈຸບັນນີ້ພວກເຮົາຕ້ອງມີການລາດຕະເວນຮ່ວມກັນ. ກ່ຽວກັບເລື່ອງການແກ້ໄຂບັນຫາແຜນທີ່ ນາຍົກລັດຖະມົນຕີຂອງສອງປະເທດ ກໍ່ໄດ້ລົງຕົກກັນແລ້ວໃຫ້ປະເທດຝຣັ່ງຊ່ວຍ ສົ່ງແຜນທີ່ມາໃຫ້ພວກເຮົາເປັນຜູ້ຖ່າຍທອດ. ເວົ້າລວມເຂດຫ້ວຍຕະເງົ້າຕິດກັບຊາຍແດນຫ້ວຍອາໄລໄປຮອດຊາຍແດນລາວເປັນເຂທີ່ພວກເຮົາຍັງບໍ່ທັນໄດ້ແກ້ໄຂ, ເປັນຈຸດຄົງຄ້າງ ແລະ ເຂດດັ່ງກ່າວຕ້ອງໄດ້ຢັ້ງຢືນວ່າຢູ່ໃນສາມເງື່ອນໄຂຂອງພວກເຮົາທັງສອງຝ່າຍທີ່ໄດ້ເວົ້າມານັ້ນ.

ທ່ານ ທອງລຸນ ສີສຸລິດ ນາຍົກລັດຖະມົນຕີ ກໍ່ໄດ້ກ່າວວ່າ: ການພົບປະຂອງສອງນາຍົກໃນຄັ້ງນີ້ ໄດ້ຕົກລົງບັນຫາສຳຄັນຄືກັນກັບນາຍົກລັດຖະມົນຕີ ຮຸນເຊນ ໄດ້ສະເໜີໄປແລ້ວນັ້ນ, ພວກເຮົາຢືນຢັນວ່າເຂດນີ້ຍັງເປັນເຂດຄົງຄ້າງມິດຕະພາບທີ່ສອງລັດຖະບານໄດ້ຕົກລົງກັນມານັ້ນ ແຕ່ຂ້າພະເຈົ້າຄິດວ່າການລົງຕົກໃນມື້ນີ້ ເປັນການຕົກລົງທີ່ສ້າງຄວາມໄວ້ເນື້ອເຊື່ອໃຈໃຫ້ແກ່ສອງປະເທດ ກໍ່ຄືສ້າງຄວາມອຸ່ນໃຈໃຫ້ແກ່ປະຊາຊົນທັງສອງປະເທດ.

ສາມຫຼັກການທີ່ສົມເດັດ ຮຸນເຊນ ໄດ້ສະເໜີມານັ້ນພວກເຮົາສອງຝ່າຍຈະພ້ອມກັນຈັດຕັ້ງປະຕິບັດໃຫ້ເຂັ້ມງວດ ແລະ ເວລາດຽວກັນນັ້ນກໍ່ເຫັນດີກັບສົມເດັດຮຸນເຊນ, ສອງກະຊວງການຕ່າງປະເທດຕ້ອງສະເໜີໄວໄປຫາປະເທດຝຣັ່ງ ເພື່ອໃຫ້ສົ່ງແຜນທີ່ມາໃຫ້ພວກເຮົາເພື່ອສືບຕໍ່ສຶກສາ, ໃຫ້ສອງຄະນະກຳມະການຊາຍແດນທີ່ຖືກແຕ່ງຕັ້ງນັ້ນ ສືບຕໍ່ລົງໄປສະຖານທີ່ເພື່ອໃຫ້ສຶກສາຄົ້ນຄວ້າ, ຖ້າຫາກວ່າບ່ອນໃດມີການລະເມີດ, ສອງຄະນະກຳມະການຊາຍແດນພ້ອມກັນແກ້ໄຂໂລດ ເພື່ອບໍ່ໃຫ້ເລື່ອງມັນບານປາຍອອກໄປ.

ຂ້າພະເຈົ້າຄິດວ່າສອງນາຍົກພວກເຮົາໄດ້ຕົກລົງກັນແລ້ວ ຈະໄດ້ສືບຕໍ່ຊື່ນຳຢ່າງໃກ້ຊິດ ເພື່ອໃຫ້ການແກ້ໄຂບັນຫາຊາຍແດນກ້າວໄປຕາມບາດກ້າວທີ່ພວກເຮົາໄດ້ເຄີຍຕົກລົງກັນ ຂ້າພະຈເົ້າຄິດວ່າການຕົກລົງຄັ້ງນີ້ ເປັນການສ້າງຄວາມໄວ້ເນື້ອເຊື່ອໃຈ, ສືບຕໍ່ເຮັດໃຫ້ສອງລັດຖະບານຮ່ວມມືກັນສ້າງໃຫ້າຊາຍແດນເປັນຊາຍແດນສັນຕິພາບ-ການຮ່ວມມື, ພວກເຮົາຍັງຕົກລົງກັນວ່າ ສອງຄະນະກຳມະການຮ່ວມມືຊາຍແດນລາວ-ກຳປູເຈຍ ຄວນພົບປະຫາລືກັນໄວເພື່ອປຶກສາຫາລືກັນໃນຫຼາຍດ້ານ ໃນຕໍ່ໄປຜັນຂະຫຍາຍການຕົກລົງຂອງຂ້າພະເຈົ້າ ແລະ ສົມເດັດ ຮຸນເຊນ ທີ່ໄດ້ຕົກລົງກັນໃນເວລາທີ່ຂ້າພະເຈົ້າ ໄດ້ໄປຢ້ຽມຢາມຢ່າງເປັນທາງການນັ້ນໃຫ້ເກີດໝາກເກີດຜົນ.