ຮົງກົງເຕືອນໄພພາຍຸໄຕ້ຝຸ່ນມັງຄຸດ ຂຶ້ນສູ່ລະດັບສູງສຸດ, ສ່ວນມາເກົາປິດທຸກກາສິໂນ ກຽມຮັບມື

AFP PHOTO / Philip FONG

ສຳນັກຂ່າວຕ່າງປະເທດລາຍງານ 16 ກັນຍາ 2018 ວ່າ: ສູນສັງເກດການສະພາບອາກາດເຂດປົກຄອງພິເສດຮົງກົງ ປະເທດຈີນ (HKO) ອອກປະກາດເມື່ອຕອນເຊົ້າຂອງວັນອາທິດນີ້ ຕາມເວລາທ້ອງຖິ່ນ ຍົກລະດັບການເຕືອນໄພສະພາບອາກາດທີ່ຄວບຄຸມທົ່ວເກາະຂຶ້ນເປັນລະດັບ 10 ເຊິ່ງເປັນລະດັບສູງສຸດ ພ້ອມທັງເນັ້ນໜັກໃຫ້ປະຊາຊົນຫຼີກລ້ຽງການອອກນອກອາຄານສະຖານທີ່ ແລະ ຫ້າມເຂົ້າໃກ້ບໍລິເວນຊາຍຝັ່ງທະເລ, ຂະນະທີ່ມີລາຍງານບັນຍາກາດໃນເຂດທຸລະກິດຂອງເກາະຮົງກົງ ແມ່ນມີບັນຍາກາດງຽບເງົາ ເນື່ອງຈາກຫ້າງຮ້ານສ່ວນໃຫຍ່ປິດໃຫ້ບໍລິການ ແລະ ລະບົບຂົນສົ່ງມວນຊົນໄດ້ຢຸດໃຫ້ບໍລິການໃນຫຼາຍເສັ້ນທາງ.

AFP PHOTO / Anthony WALLACE

AFP PHOTO / ISAAC LAWRENCE

ຂະນະທີ່ສຳນັກງານຄະນະຜູ້ບໍລິການເຂດປົກຄອງພິເສດມາເກົາອອກຖະແຫຼງການເລື່ອງການປິດກາສິໂນທັງ 42 ແຫ່ງເທິງເກາະ ໃນວັນທີ 16 ກັນຍານນີ້, ພາຍຫຼັງປຶກສາຫາລື ແລະ ໄດ້ຮັບຄວາມເຫັນດີຈາກຜູ້ປະກອບການ ພ້ອມທັງຍົກລະດັບການເຕືອນໄພສະພາບອາກາດໃນພື້ນທີ່ເປັນຂັ້ນຮອງສູງສຸດອີກດ້ວຍ.

AFP PHOTO / Mark RALSTON

ເຊິ່ງມະຫາພາຍຸໄຕ້ຝຸ່ນມັງຄຸດ ໄດ້ອ່ອນກຳລັງແຮງລົງແລ້ວ ພາຍຫຼັງຂຶ້ນແຂວງຄາກາຢັນ ເກາະລູຊອນ ພາກເໜືອຂອງຟິລິບປິນ ເມື່ອວັນເສົາທີ່ຜ່ານມາ ແຕ່ກັບມາທະວີຄວາມຮຸນແຮງອີກຄັ້ງລະຫວ່າງເຄື່ອນຕົວຜ່ານທະເລຈີນໃຕ້ ໂດຍຄວາມໄວລົມສູງສຸດໃກ້ຈຸດສູນກາງຢູ່ທີ 165 ກິໂລແມັດຕໍ່ຊົ່ວໂມງ ມີທິດທາງມຸ່ງໜ້າໄປທິດຕາເວັນຕົກສຽງເໜືອສູ່ສາມຫຼ່ຽມປາກແມ່ນ້ຳຊູຈຽງ ເຊິ່ງມີພື້ນທີ່ສຳຄັນຄືເກາະຮົງກົງ, ເກາະມາເກົາ ແລະ ມົນທົນກວ້າງຕຸ້ງ ທາງພາກໃຕ້ຂອງຈີນ.

ໃນອີກດ້ານໜຶ່ງທ່ານ ຟຣານຊິສ ໂຕເລນຕິໂນ ທີ່ປຶກສາຂອງທ່ານ ໂຣດຼິໂກ ດູເຕເຕ ປະທານປະເທດຟິລິບປິນ ຖະແຫຼງຈຳນວນຜູ້ເສຍຊີວິດຈາກອິດທິພົນຂອງມະຫາພາຍຸໄຕ້ຝຸ່ນມັງຄຸດ ເຊິ່ງພັດຜ່ານຟິລິບປິນດ້ວຍຄວາມໄວລົມໃກ້ຈຸດສູນກາງ 255 ກິໂລແມັດຕໍ່ຊົ່ວໂມງ ແລະ ມີລັດສະໜີທຳລາຍລ້າງກວ້າງເຖິງ 900​ ກິໂລແມັດ ຖືເປັນພາຍຸລະດັບ 5 ເຊິ່ງເປັນຂັ້ນສູງສຸດຕາມມາດຕາວັດພາຍຸ ແລະ ສ້າງສະຖິຕິເປັນພາຍຸໝຸນທີ່ມີຄວາມໄວລົມສູງສຸດໃນໂລກຂອງປີນີ້ວ່າ: ມີຜູ້ເສຍຊີວິດແລ້ວຢ່າງໜ້ອຍ 25 ຄົນ ສ່ວນໃຫຍ່ເສຍຊີວິດຈາກດິນເຈື່ອນທັບ ໃນເຂດບໍລິຫານຄໍດິນເຢຣາ ຕອນກາງຂອງເກາະລູຊອນ ແລະ ມີຜູ້ສູນຫາຍ 5 ຄົນ.