ປະຊາຊົນກວ່າ 6 ແສນຄົນໄດ້ຮັບຜົນກະທົບຈາກໄພນ້ຳຖ້ວມ ໃນ 18 ແຂວງທົ່ວປະເທດ

ສຳນັກຂ່າວສານປະເທດລາວລາຍງານ 17 ກັນຍາ 2018 ວ່າ: ກອງປະຊຸມລັດຖະບານເປີດກວ້າງຄັ້ງທີ II ປີ 2018 ໄດ້ໄຂຂຶ້ນຢ່າງເປັນທາງການໃນວັນທີ 17 ກັນຍາ 2018, ໂດຍເນັ້ນໃສ່ການປຶກສາຫາລືກ່ຽວກັບສະພາບ ແລະ ການແກ້ໄຂໄພພິບັດ ໃນຂອບເຂດທົ່ວປະເທດ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ.

ກອງປະຊຸມດັ່ງກ່າວ, ດຳເນີນພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ໂດຍມີບັນດາສະມາຊິກລັດຖະບານ, ເຈົ້າຄອງນະຄອນຫຼວງວຽງຈັນ, ບັນດາເຈົ້າແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນໂອກາດກ່າວເປີດກອງປະຊຸມ, ທ່ານ ທອງລຸນ ສີສຸລິດ ກ່າວວ່າ: ມື້ນີ້ ພວກເຮົາດຳເນີນກອງປະຊຸມລັດຖະບານ ເປີດກວ້າງຄັ້ງທີ II ປີ 2018 ເພື່ອຕີລາຄາສະພາບການ, ຄົ້ນຄວ້າ ແລະ ປຶກສາຫາລື ບັນດາວຽກງານທີ່ສໍາຄັນຕ່າງໆ. ກອງປະຊຸມຄັ້ງນີ້, ຈະດຳເນີນໄປເປັນເວລາ 2 ວັນເຕັມ ໂດຍຈະສຸມໃສ່ພິຈາລະນາໃນ 3 ຫົວຂໍ້ທີ່ສຳຄັນ ຄື: ສະຫຼຸບສະພາບ ແລະ ການແກ້ໄຂໄພພິບັດ ໃນຂອບເຂດທົ່ວປະເທດ; ສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 8 ເດືອນຕົ້ນປີ, ຄາດຄະເນໝົດປີ 2018 ແລະ ທິດທາງແຜນປີ 2019; ສະ ຫຼຸບສັງລວມຕີລາຄາຜົນຂອງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII ກາງສະໄໝ ແລະ ກະກຽມສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025). ພ້ອມດຽວກັນນີ້, ທ່ານນາຍົກລັດຖະມົນຕີ ກໍ່ໄດ້ຮຽກຮ້ອງມາຍັງຜູ້ເຂົ້າຮ່ວມທັງໝົດໃຫ້ເອົາໃຈໃສ່ຄົ້ນຄວ້າ ແລະ ປະກອບຄຳເຫັນດ້ວຍຄວາມຮັບຜິດຊອບສູງ, ສະເໜີທັດສະນະຢ່າງກົງໄປກົງມາ, ກະທັດຮັດ, ມີຈຸດສຸມ ແລະ ມີທາງອອກ ເພື່ອເຮັດໃຫ້ກອງປະຊຸມມີປະສິດທິຜົນ, ບັນລຸຕາມຈຸດປະສົງ ແລະ ຄາດໝາຍ.

ໃນໄລຍະກອງປະຊຸມ, ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ໂດຍຕາງໜ້າຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ໄດ້ລາຍງານສະພາບຜົນເສຍຫາຍຈາກໄພນໍ້າຖ້ວມ, ການປະຕິບັດໃຫ້ການຊ່ວຍເຫຼືອສຸກເສີນ ແລະ ແຜນການຟື້ນຟູຜົນກະທົບຫລັງໄພພິບັດຢູ່ ບັນດາແຂວງໃນທົ່ວປະເທດ.

ໄພນ້ຳຖ້ວມໃນຄັ້ງນີ້, ໂດຍນັບແຕ່ກາງເດືອນກໍລະກົດເປັນຕົ້ນມາ ໄດ້ສົ່ງຜົນກະທົບໂດຍກົງຕໍ່ຊີວິດ, ຊັບສິນຂອງປະຊາຊົນ ແລະ ສ້າງຄວາມເສຍຫາຍຕໍ່ໂຄງລ່າງ ພື້ນຖານທາງດ້ານເສດຖະກິດ, ສັງຄົມ ແລະ ສິ່ງແວດລ້ອມ ຢູ່ 17 ແຂວງ 1 ນະຄອນຫລວງວຽງຈັນ, ເຊິ່ງມີ 115 ເມືອງ, 2,409 ບ້ານ, 131,507 ຄອບຄົວ, 639,437 ຄົນ. ໃນນັ້ນ, ເສຍຊີວິດ 55 ຄົນ, ບາດເຈັບ 2 ຄົນ ແລະ ສູນຫາຍ 100 ຄົນ (ຢູ່ອັດຕະປື 97 ຄົນ, ຫຼວງພະບາງ 3 ຄົນ). ແຂວງອັດຕະປື ມີຈໍານວນຜູ້ເສຍຊີວິດ ແລະ ຜູ້ສູນຫາຍຫລາຍກວ່າໝູ່, ເຊິ່ງມີຜູ້ເສຍຊີວິດເຖິງ 40 ຄົນ ແລະ ສູນຫາຍ 97 ຄົນ, ຮອງລົງມາແມ່ນ ແຂວງຫຼວງພະບາງ ມີຜູ້ເສຍຊີວິດ 10 ຄົນ ແລະ ສູນຫາຍ 3 ຄົນ, ຊຽງຂວາງ ເສຍຊີວິດ 4 ຄົນ ແລະ ແຂວງບໍລິຄໍາໄຊ ເສຍຊີວິດ 1 ຄົນ. ລວມມູນຄ່າເສຍຫາຍທີ່ຄາດຄະເນຂອງແຕ່ລະຂະແໜງມີຄື: ດ້ານໂຍທາທິການ ແລະ ຂົນສົ່ງ 631.8 ຕື້ກີບ, ດ້ານໄຟຟ້າ 25 ຕື້ກີບ, ດ້ານທີ່ຢູ່ອາໃສຂອງປະຊາຊົນ 12.5 ຕື້ກວ່າກີບ, ດ້ານກະສິກໍາ ແລະ ປ່າໄມ້ 1.2 ຕື້ກວ່າກີບ, ສ່ວນດ້ານສຶກສາ ແລະ ສາທາລະນະສຸກ ຍັງບໍ່ສາມາດຄາດຄະເນມູນຄ່າເສຍຫາຍໄດ້ເທື່ອ.

ສຳວຽກງານທີ່ຕ້ອງໄດ້ປະຕິບັດເລັ່ງດ່ວນປະກອບມີ: ສືບຕໍ່ເບີກຈ່າຍເງິນແຮຖົງ ໃຫ້ຄອບຄົວຜູ້ປະສົບໄພພິບັດຢູ່ເມືອງສະໜາມໄຊ ຈໍານວນ 7,095 ຄົນ (100,000 ກີບ/ຄົນ/ເດືອນ); ສືບຕໍ່ບຸກເບີກພື້ນທີ່, ດໍາເນີນການສໍາຫລວດແຜນຜັງ ແລະ ປຸກສ້າງທີ່ຢູ່ອາໃສຊົ່ວຄາວຕາມ 5 ຈຸດ; ສືບຕໍ່ຊອກຄົ້ນ ແລະ ເກັບກູ້ຊາກສົບຜູ້ສູນຫາຍ; ສືບຕໍ່ໃຫ່ການຊ່ວຍເຫລືອບັນເທົາທຸກຈໍາວັນເປັນປົກກະຕິ; ສືບຕໍ່ສໍາຫຼວດຈໍານວນຄອບຄົວ, ຈໍານວນພົນ ແລະ ອອກບັດໃຫ້ສໍາເລັດໂດຍໄວ; ກະກຽມເປີດກອງປະຊຸມປະເມີນຜົນກະທົບ ດ້ານເສດຖະກິດ, ສັງຄົມ ແລະ ສິ່ງແວດລ້ອມ; ເລັ່ງຕິດຕາມຊຸກຍູ້ການນໍາເຂົ້າເຮືອນສໍາເລັດຮູບ, ພ້ອມທັງປະກອບ ແລະ ມອບໃຫ້ປະຊາຊົນເພື່ອນໍາໃຊ້ເປັນທີ່ພັກອາໄສຊົ່ວຄາວໂດຍໄວ; ເລັ່ງໃນການເປີດການຮຽນ-ການສອນ ເຂດປະສົບໄພໃຫ້ທັນກໍານົດເວລາໂດຍໄວ ແລະ ກະ ກຽມຝຶກອົບຮົມ ໃຫ້ຄະນະຄຸ້ມຄອງສູນ ແລະ ອໍານາດການປົກຄອງບ້ານ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube