ສ.ອາເມຣິກາ ຈະເກັບພາສີສິນຄ້ານຳເຂົ້າຈາກຈີນເພີ່ມ ມູນຄ່າ 2 ແສນລ້ານໂດລາ

AFP PHOTO / - / China OUT
AFP PHOTO / – / China OUT

ສຳນັກຂ່າວຕ່າງປະເທດລາຍງານ ເມື່ອວັນທີ 17 ກັນຍາ 2018 ທີ່ຜ່ານມາວ່າ ສຳນັກງານຄະນະຜູ້ແທນການຄ້າຂອງສະຫະລັດ ອາເມຣິກາ ອອກຖະແຫຼງເມື່ອວັນຈັນ ທີ່ຜ່ານມາວ່າ ສິນຄ້າຂອງຈີນ ທີ່ສົ່ງອອກໄປຍັງສະຫະລັດ ອາເມຣິກາເກືອບ 6,000 ລາຍການ ຕົກເປັນມູນຄ່າລວມປະມານ 200,000 ລ້ານໂດລາສະຫະລັດ ຈະຕ້ອງຖືກຈ່າຍພາສີເພີ່ມຂຶ້ນໃນອັດຕາ 10% ນັບຕັ້ງແຕ່ວັນທີ 24 ກັນຍານີ້ ເປັນຕົ້ນໄປ ກ່ອນທີ່ກຳແພງພາສີຈະເພີ່ມຂຶ້ນເປັນ 25% ນັບຕັ້ງແຕ່ວັນທີ 1 ມັງກອນ 2019.

AFP PHOTO / STR / China OUT

ເຊິ່ງລັດຖະບານອາເມຣິກາ ຍັງຄົງເນັ້ນໄປທີ່ສິນຄ້າດ້ານເຕັກໂນໂລຊີ ແລະ ອຸປະກອນອິເລັກໂຕນິກເຊັ່ນ ສ່ວນປະກອບຂອງຄອມພິວເຕີ ຈົນຮອດເຄື່ອງໃຊ້ສະເພາະທາງໃນສຳນັກງານເຊັ່ນ: ຈັກສຳເນົາເອກະສານ ແລະ ເຄື່ອງນັບເງິນ. ເຖິງຢ່າງໃດກໍ່ຕາມ ມີລາຍງານວ່າ ລາຍຊື່ສິນຄ້າ ທີ່ມີການປະກາດຂຶ້ນພາສີໃນຄັ້ງນີ້ ຫຼຸດລົງຈາກເດີມ 300 ລາຍການ ພາຍຫຼັງທີ່ສຳນັກງານຄະນະຜູ້ແທນການຄ້າໃນນະຄອນຫຼວງວໍຊິງຕັນ ໄດ້ຮັບການຮ້ອງຮຽນຫຼາຍເຖິງ 6,000 ຄັ້ງຈາກທັງຜູ້ປະກອບການ ແລະ ຜູ້ບໍລິໂພກ.

ສຳລັບສິນຄ້າທີ່ມີການຕັດອອກໄປລວມເຖິງຜະລິດຕະພັນ ຫຼື ສ່ວນປະກອບສຳລັບສິນຄ້າຂອງ Apple ຫຼາຍລາຍການ ເຊິ່ງສ່ວນໃຫຍ່ຍັງອາໄສຖານການຜະລິດໃນຈີນ ໂດຍ Apple ໄດ້ສົ່ງໜັງສືເຖິງສຳນັກງານຄະນະຜູ້ແທນການຄ້າໃນນະຄອນຫຼວງວໍຊິງຕັນ ເມື່ອຕົ້ນເດືອນນີ້ ວ່າສິນຄ້າບາງຢ່າງຂອງບໍລິສັດອາດມີລາຄາແພງຂຶ້ນໃນອະນາຄົດ ຫາກທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ຍັງເດີນໜ້າມາດຕະການກຳແພງພາສີຮອບໃໝ່ຕໍ່ຈີນ ແລະ ຜູ້ນຳສະຫະລັດ ອາເມຣິກາກ່າວວ່າ Apple ຄວນຍ້າຍຖານການຜະລິດທັງໝົດຈາກຈີນກັບສະຫະລັດ ອາເມຣິກາ ຫາກບໍ່ຕ້ອງການຮັບຜົນກະທົບຈາກສົງຄາມການຄ້າໃນຄັ້ງນີ້.

ອີກຢ່າງໜຶ່ງ, ລັດຖະບານອາເມຣິກາ ປະກາດຕັ້ງກຳແພງພາສີ 25% ສຳລັບປະລິມານການນຳເຂົ້າສິນຄ້າຂອງຈີນ 50,000 ລ້ານໂດລາສະຫະລັດ ເມື່ອເດືອນມິຖຸນາ ທີ່ຜ່ານມາ ເຊິ່ງສິນຄ້າກຸ່ມທຳອິດ 34,000 ລ້ານໂດລາສະຫະລັດ ຕ້ອງຈ່າຍພາສີນັບຕັ້ງແຕ່ວັນທີ 6 ກໍລະກົດ ທີ່ຜ່ານມາ, ສ່ວນກຳແພງພາສີສຳລັບສິນຄ້າທີ່ເຫຼືອອີກ 16,000 ລ້ານໂດລາສະຫະລັດ ມີຜົນເມື່ອຕົ້ນເດືອນສິງຫາ ແນ່ນອນວ່າລັດຖະບານຈີນໃຊ້ມາດຕະກາບຕອບໂຕ້ດ້ວຍການຕັ້ງກຳແພງພາສີຕໍ່ສິນຄ້າຂອງສະຫະລັດ ອາເມຣິກາໃນອັດຕາທີ່ເທົ່າທຽມກັນ.