ຍົນກອງທັບລັດເຊຍ ຖືກຍິງຕົກທີ່ຊີຣີ ຂະນະທີ່ບິນກັບຖານທັບ ທະຫານເສຍຊີວິດ 15 ຄົນ

ສຳນັກຂ່າວຕ່າງປະເທດລາຍງານ 18 ກັນຍາ 2018 ວ່າ: ກອງທັບລັດເຊຍຖະແຫຼງວ່າ ຍົນລາດຕະເວນ  Il-20M ຂອງກອງທັບລັດເຊຍ ຖືກຍິງຕົກທະເລເມດິເຕິເຣນຽນ ປະມານ 35 ກິໂລແມັດ ນອກຊາຍຝັ່ງທາງຕາເວັນຕົກຂອງຊີຣີ ເມື່ອຄືນວັນຈັນ ທີ່ຜ່ານມາ ຂະນະບິນກັບສູ່ຖານປະຈຳການທີ່ຢູ່ໃກ້ຄຽງ, ທ່ານ ພົນຕີ ອິກໍ ໂຄນາເຊນຄັອບ ໂຄສົກກະຊວງປ້ອງກັນປະເທດລັດເຊຍກ່າວວ່າ ຍົນລາດຕະເວນຖືກຍິງຕົກໂດຍຈະຫຼວດ S-200 ຂອງໜ່ວຍປ້ອງກັນໄພທາງອາກາດຊີຣີ ໂດຍໃນເວລານັ້ນ ຍົນຮົບ F-16 ຂອງກອງທັບອາກາດອິດສະຣາແອນ ກຳລັງໂຈມຕີເປົ້າໝາຍບໍລິເວນໃກ້ຄຽງເມືອງລາຕາເກຍ ທາງຕາເວັນຕົກສຽງເໜືອຂອງຊີຣີ ເມື່ອເວລາປະມານ 22:00 ໂມງ.

ທ່ານ ພົນຕີ ອິກໍ ໂຄນາເຊນຄັອບ ກ່າວວ່ານັກບິນອິດສະຣາແອນແຈ້ງເຕືອນປະຕິບັດການໃຫ້ລັດເຊຍຊາບລ່ວງໜ້າພຽງ 1 ນາທີ ເຮັດໃຫ້ຍົນລັດເຊຍລຳເຂົ້າໄປສູ່ແນວຍິງຂອງໜ່ວຍປ້ອງກັນຊີຣີ, ພາຍຫຼັງເກີດເຫດ ທ່ານ ພົນເອກ ເຊີເກ ຊອຍກູ ລັດຖະມົນຕີກະຊວງປ້ອງກັນປະເທດລັດເຊຍ ໂທລະສັບສາຍດ່ວນເຖິງທ່ານ ເອວິກດໍ ລີເບີແມນ ລັດຖະບານຕີກະຊວງປ້ອງກັນປະເທດອິດສະຣາແອນວ່າ ອິດສະຣາແອນຕ້ອງຮັບຜິດຊອບຢ່າງເຖິງທີ່ສຸດ ຕໍ່ທະຫານລັດເຊຍທີ່ເສຍຊີວິດທັງໝົດ 15 ຄົນ.

ທາງດ້ານຂອງທ່ານ ດະມິດຕຼີ ເພສຄັອບ ໂຄສົກທຳນຽບປະທານປະເທດລັດເຊຍ ເປີດເຜີຍຕໍ່ສື່ມວນຊົນວ່າ ທຳນຽບກຳລັງສຶກສາສະຖານະການ ແລະ ຈະປະກາດທ່ທີໃນພາຍຫຼັງ.