ອິດສະຣາແອນກ່າວວ່າ ຊີຣີຜິດພາດເອງ ທີ່ຍິງຍົນລັດເຊຍຕົກ ບໍ່ກ່ຽວກັບຕົນທີ່ເຂົາໄປໂຈມຕີທາງອາກາດໃນຊີຣີ

ສຳນັກຂ່າວຕ່າງປະເທດລາຍງານ 19 ກັນຍາ 2018 ວ່າ: ທ່ານ ວະລາດິເມຍ ປູຕິນ ກ່າວເມື່ອວັນອັງຄານ ທີ່ຜ່ານມາ ກ່ຽວກັບເຫດການຍົນລາດຕະເວນ Il-20 ຂອງກອງທັບລັດເຊຍ ປະສົບເຫດຖືກຍິງຕົກໃນທະເລເມດິເຕິເຣນຽນ ເມື່ອຄືນວັນຈັນ ຕາມເວລາທ້ອງຖິ່ນ ຫ່າງຈາກຝັ່ງເມືອງລາຕາເຄຍ ເບື້ອງຕາເວັນຕົກຂອງຊີຣີ ພຽງ 35 ກິໂລແມັດ ແລະ ເປັນສະຖານທີ່ຕັ້ງຖານທັບຂອງລັດເຊຍ ເຮັດໃຫ້ທະຫານທັງ 15 ຄົນທີ່ຢູ່ເທິງຍົນເສຍຊີວິດວ່າ: ຖືເປັນວົງຈອນແຫ່ງໂສກອະນາດຕະກຳ ແລະ ເຫດການດັ່ງກ່າວຍິ່ງຕອກຢ້ຳເຖິງອັນຕະລາຍຂອງຄວາມຂັດແຍ່ງກັນທາງດ້ານຜົນປະໂຫຍດລະຫວ່າງຫຼາຍປະເທດ ໃນເຂດນ່ານຟ້າຂອງຊີຣີທີ່ເຕັມໄປດ້ວຍກິດຈະກຳທາງການທະຫານ.

ເຊິ່ງທ່ານ ປູຕິນ ກ່າວວ່າ ອິດສະຣາແອນບໍ່ໄດ້ຍິງຍົນລັດເຊຍລຳດັ່ງກ່າວຕົກ ແຕ່ລັດເຊຍຈະສືບສວນສອບສວນສິ່ງທີ່ເກີດຂຶ້ນຢ່າງລະອຽດ ແລະ ໃນສ່ວຂອງມາດຕະການຕໍ່ຈາກນີ້ ລັດເຊຍຈະຍົກລະດັບມາດຕະການຮັກສາຄວາມປອດໄພຕໍ່ເຂດທີ່ໝັ້ນທາງທະຫານ ແລະ ເພີ່ມການຄຸ້ມຄອງເຈົ້າໜ້າທີ່ລັດເຊຍທຸກຄົນທີ່ປະຕິບັດໜ້າທີ່ຢູ່ໃນຊີຣີ ໃນລະດັບທີ່ທຸກຝ່າຍສາມາດສັງເກດໄດ້.

ຕໍ່ຂໍ້ຊັກຖາມທີ່ວ່າ ສະຖານະການຕໍ່ຈາກນີ້ ຈະມີຄວາມຄ້າຍຄື ຫຼື ແຕກຕ່າງກັບເຫດການທີ່ຍົນຂອງຕວັກກີຍິງຍົນຂອງລັດເຊຍຕົກ ເມື່ອເດືອນພະຍິກ 2015 ແບບໃດ, ທ່ານ ປູຕິນ ກ່າວພຽງວ່າ ໃນເຫດການຄັ້ງນັ້ນ ຕວັກກີຮູ້ດີວ່າເປັນຜູ້ຍິງຍົນຂອງລັດເຊຍຕົກໃນເຂດກະບົດທາງພາກເໜືອຂອງຊີຣີ, ເຖິງຢ່າງໃດກໍ່ຕາມ ຜູ້ນຳລັດເຊຍກ່າວວ່າ ທ່ານໄດ້ເຕືອນທ່ານ ເບນຈາມິນ ເນທັນຢາຮູ ລັດຖະມົນຕີອິດສະຣາແອນ ໃນລະຫວ່າງການສົນທະນາທາງໂທລະສັບວ່າ ເປັນອີກຄັ້ງທີ່ອິດສະຣາແອນປະຕິບັດການທາງທະຫານລະເມີດອະທິປະໄຕຂອງຊີຣີ ແລະ ອິດສະຣາແອນບໍ່ເຄົາລົບຂໍ້ຕົກລົງທີ່ມີຮ່ວມກັນ.

ຂະນະທີ່ທຳນຽບນາຍົກລັດຖະມົນຕີອິດສະຣາແອນ ໃນນະຄອນຫຼວງເທວອາວີບ ໄດ້ອອກຖະແຫຼງການວ່າ ທ່ານ ເບນຈາມິນ ເນທັນຢາຮູ ໄດ້ໂທລະສັບເຖິງທ່ານ ປູຕິນ ສະແດງຄວາມເສຍໃຈຢ່າງຍິ່ງຕໍ່ການເສຍຊີວິດຂອງທະຫານລັດເຊຍທັງ 15 ຄົນ ແລະ ຢືນຢັນວ່າການສູນເສຍນັ້ນເປັນຜົນມາຈາກຄວາມຜິດພາດ ແລະ ການຂາດຄວາມແມ້ນຢຳຂອງຊີຣີ ໃນການໃຊ້ລະບົບປ້ອງກັນໄພທາງອາກາດ ແຕ່ທ່ານຍິນດີສົ່ງຜູ້ບັນຊາການກອງທັບອາກາດອິດສະຣາແອນເດີນທາງໄປຍັງນະຄອນຫຼວງມົດສະກູ ເພື່ອຊີ້ແຈງເຫດການທີ່ເກີດຂຶ້ນ.

ໃນດ້ານຂອງລັດຖະບານຊີຣີ ຍັງບໍ່ສະແດງທ່າທີຕໍ່ບັນຫາດັ່ງກ່າວ ແຕ່ລາຍງານເບື້ອງຕົ້ນຂອງກະຊວງປ້ອງກັນປະເທດລັດເຊຍລະບຸວ່າ: ກ່ອນເກີດເຫດກອງທັບຊີຣີ ກຳລັງໃຊ້ລະບົບປ້ອງກັນຂີປະນາວຸດ S-200 ປ້ອງກັນການໂຈມຕີທາງອາກາດຈາກຍົນຮົບຂອງອິດສະຣາແອນ ເຊິ່ງເຂົ້າມາປະຕິບັດການໃນເຂດນ່ານຟ້າຂອງເມືອງລາຕາເຄຍ ແລະ ໃນຕອນທຳອິດກະຊວງປ້ອງກັນປະເທດລັດເຊຍກ່າວຫາວ່າ ອິດສະຣາແອນທີ່ສ່ວນກ່ຽວຂ້ອງເຮັດໃຫ້ຍົນລັດເຊຍຕົກ.