ສານອາຍາໂລກ ເລີ່ມຂະບວນການກວດສອບກອງທັບມຽນມາ ຂໍ້ຫາກໍ່ອາຊະຍາກຳຮ້າຍແຮງຕໍ່ຊາວໂຣຮິງຢາ

AFP PHOTO / FRED DUFOUR
AFP PHOTO / FRED DUFOUR

ສຳນັກຂ່າວຕ່າງປະເທດລາຍງານ 19 ກັນຍາ 2018 ວ່າ: ສານອາຍາລະຫວ່າງປະເທດ (ICC) ທີ່ມີສຳນັກງານໃຫຍ່ຢູ່ນະຄອນເຮກ ອອກຖະແຫຼງການເມື່ອວັນອັງຄານ ທີ່ຜ່ານມາວ່າ ໄດ້ເລີ່ມດຳເນີນການກວດສອບໃນເບື້ອງຕົ້ນ ຕໍ່ຂໍ້ກ່າວຫາວ່າກອງທັບມຽນມາກໍ່ອາຊະຍາກຳຢ່າງຮ້າຍແຮງຕໍ່ຊາວໂຣຮິງຢາ ໃນລັດຍະໄຂ່ ດ້ວຍວິທີການທີ່ລວມເຖິງການຂ້າ, ການໃຊ້ຄວາມຮຸນແຮງທາງເພດ ແລະ ການບັງຄັບໃຫ້ອອກຈາກຖິ່ນຖານ ເຊິ່ງລ້ວນເປັນການລະເມີດສິດທິມະນຸດຂັ້ນຮ້າຍແຮງ ໂດຍມີການລະບຸວ່າ ເຖິງແມ່ນວ່າມຽນມາບໍ່ໄດ້ເປັນລັດພາຄີ ແລະ ບໍ່ໄດ້ລົງນາມໃນລັດຖະທຳມະນູດໂຣມ ເຊິ່ງເປັນສົນທິສັນຍາຫຼາຍຝ່າຍໃນການສ້າງຕັ້ງ ICC ເມື່ອປີ 2002 ແຕ່ຂໍ້ມູນທັງໝົດທີ່ ICC ໄດ້ຮັບນັ້ນພຽງພໍທີ່ຈະເລີ່ມດຳເນີນການ.

ການເຄື່ອນໄຫວດັ່ງກ່າວຂອງ ICC ເກີດຂຶ້ນພາຍໃນໄລຍະເວລາຍັງບໍ່ເຖິງ 2 ອາທິດ ພາຍຫຼັງທີ່ສານແຫ່ງນີ້ປະກາດຈຸດຢືນຂອງຕົນເອງວ່າ ເປັນສະຖາບັນທາງກົດໝາຍລະຫວ່າງປະເທດທີ່ມີຂອບເຂດອຳນາດພິຈາລະນາຂໍ້ສົມມຸດຕິຖານທີ່ວ່າ ກອງທັບມຽນມາອາດກະທຳຜິດໃນຂໍ້ຫາ ອາຊະຍະກຳຕໍ່ມະນຸດ ຈາກສະຖານະການຄວາມບໍ່ສະຫງົບໃນລັດຍະໄຂ່ ເຊິ່ງສົ່ງຜົນໃຫ້ຊາວໂຣຮິງຢາ ຫຼາຍກວ່າ 700,000 ຄົນ ຕ້ອງອົບພະຍົບຂ້າມແດນໄປຍັງບັງກະລາເທດ ຕັ້ງແຕ່ເດືອນສິງຫາ ປີທີ່ຜ່ານມາ, ເຖິງຢ່າງໃດກໍ່ຕາມ ການດຳເນີນການດັ່ງກ່າວຍັງບໍ່ໄດ້ໝາຍຄວາມວ່າ ຈະມີການຕັ້ງຂໍ້ຫາກັບບຸກຄົນໃດ ຫຼື ບໍ່.

AFP PHOTO / POOL / Sai ZAW

ໃນຂະນະດຽວກັນ, ຄະນະມົນຕີສິດທິມະນຸດແຫ່ງສະຫະປະຊາຊາດ (UNHRC) ອອກລາຍງານສະບັບເຕັມຄວາມຍາວ 432 ໜ້າ ເປັນການກວດສອບຄົ້ນຫາຄວາມຈິງ ກ່ຽວກັບສະຖານະການໃນລັດຍະໄຂ່ ພາຍຫຼັງເປີດເຜີຍເນື້ອໃນບາງສ່ວນເມື່ອທ້າຍເດືອນສິງຫາ ທີ່ຜ່ານມາ ໂດຍເນື້ອໃນສຳຄັນຂອງລາຍງານສະບັບສົມບູນຍັງຄົງກ່າວຫາກອງທັບມຽນມາ ແລະ ທະຫານລະດັບສູງ 6 ທ່ານ ທີ່ນຳໂດຍທ່ານ ພົນເອກ ມິນ ອ່ອງ ຫຼ່າຍ ຜູ້ບັນຊາການທະຫານສູງສຸດ ວ່າມີສ່ວນກ່ຽວຂ້ອງໂດຍກົງກັບການລະເມີດສິດທິມະນຸດຂັ້ນຮ້າຍແຮງຕໍ່ພົນລະເມືອງໃນປະເທດ ທີ່ບໍ່ແມ່ນພຽງແຕ່ໃນລັດຍະໄຂ່ ແຕ່ຍັງລວມເຖິງລັດສານ ແລະ ລັດກະສິ່ນ ແລະ ຄວນມີການດຳເນີນຄະດີຂ້າລ້າງເຜົ່າພັນກັບທະຫານກຸ່ມນີ້.

ນັກຂ່າວສຳນັກຂ່າວ Reuters ທີ່ຖືກທາງການມຽນມາຈັບກຸມ ຂໍຫາເຜີຍແຜ່ຂໍ້ມູນລັບທາງລັດຖະການ / AFP PHOTO / YE AUNG THU

ນອກຈາກນີ້, ໃນລາຍງານຍັງມີຄຳກ່າວເຖິງທ່ານ ມາຊູກີ ດາຣຸສມັນ ຫົວໜ້າຄະນະປະຕິບັດງານຂອງ UNHRC ເລື່ອງມຽນມາວິຈານຂະບວນການປະຕິຮູບການເມືອງສູ່ການເປັນປະຊາທິປະໄຕຂອງມຽນມາວ່າ ບໍ່ມີຄວາມຄືບໜ້າ ເພາະເປັນຜົນມາຈາກການທີ່ລັດຖະບານພາຍໃຕ້ການນຳຂອງທ່ານ ນາງ ອອງ ຊານ ຊູຈີ ຍັງຄຸກຄາມການປະຕິບັດໜ້າທີ່ຂອງສື່ມວນຊົນ ແລະ ສະຖານະການທີ່ເກີດຂຶ້ນໃນມຽນມາຍັງບົ່ງບອກໄດ້ຢ່າງຊັດເຈນວ່າ ກອງທັບມຽນມາຄື ສະຖາບັນສູງສຸດຂອງປະເທດ, ສ່ວນໃນດ້ານຂອງລັດຖະບານ ແລະ ກອງທັບມຽນມາຍັງບໍ່ສະແດງທ່າດີໃດໆຕໍ່ກັບສະຖານະການຫຼ້າສຸດນີ້.