ຈັບອະດີດນາຍົກມາເລເຊຍອີກຄັ້ງ ເພື່ອແຈ້ງຂໍ້ຫາເພີ່ມ ກ່ຽວກັບການໃຊ້ອຳນາດໂດຍບໍ່ຄວນ

AFP PHOTO/ Mohd RASFAN
AFP PHOTO/ Mohd RASFAN

ສຳນັກຂ່າວຕ່າງປະເທດລາຍງານ 19 ກັນຍາ 2018 ວ່າ: ສຳນັກງານປາບປາມການສໍ້ລາດບັງຫຼວງຂອງມາເລເຊຍ ໄດ້ຖະແຫຼງວ່າ ທ່ານ ນາຈິບ ຣາຊັກ ອະດີດນາຍົກລັດຖະມົນຕີມາເລເຊຍຖືກຈັບກຸມຕົວທີ່ສຳນັກງານປາບປາມການສໍ້ລາດບັງຫຼວງ ໃນຂໍ້ຫາຍັກຍອກເງິນ 2,600 ລ້ານຣິງກິດ (627.8 ລານໂດລາສະຫະລັດ) ຈາກກອງທຶນເພື່ອການພັດທະນາປະເທດ (1MDB) ເຂົ້າບັນຊີສ່ວນຕົວໃນວັນຸດທີ 19 ກັນຍານີ້ ຈາກນັ້ນໃນວັນທີ 20 ກັນຍາທີ່ຈະມາເຖິງ ທ່ານ ນາຈິບ ຣາຊັກ ຈະຖືກນຳຕົວສົ່ງຂຶ້ນສານ ເພື່ອແຈ້ງຂໍ້ຫາເພີ່ມເຕີມຕາມມາດຕາ 23​ ຂອງກົດໝາຍປາບປາມການສໍ້ລາດບັງຫຼວງ ແຕ່ລາຍລະອຽດອື່ນໆນອກເໜືອຈາກນີ້ຍັງບໍ່ມີການເປີດເຜີຍ ແຕ່ມາດຕາ 23​ ຂອງກົດໝາຍສະບັບດັ່ງກ່າວນັ້ນ ກ່ຽວຂ້ອງກັບການໃຊ້ອຳນາດໜ້າທີ່ໃນທາງບໍ່ຖືກບໍ່ຄວນ.

ກ່ອນໜ້ານີ້, ທ່ານ ນາຈິບ ຣາຊັກເຄີຍຖືກຕັ້ງຂໍ້ຫາຫຼາຍຂໍ້ຫາ ໃນຄະດີອາຍາທີ່ກະທຳອິດໜ້າທີ່ຂອງຜູ້ໄດ້ຮັບມອບໝາຍໃນຄຸມຄອງຜົນປະໂຫຍດແທນຜູ້ຮັບຜົນປະໂຫດ ບໍ່ວ່າຈະໂດຍຈະເຈດຕະນາ ຫຼື ປະມາດກໍ່ຕາມ ເຊິ່ງເຮັດໃຫ້ເສຍຫາຍແກ່ຊັບສິນທີ່ຕົນຄຸມຄອງຢູ່, ສໍ້ລາດບັງຫຼວງ ແລະ ຟອກເງິນຈົນກາຍເປັນຄະດີໃຫຍ່ລະດັບຊາດຈາກກອງທຶນເພື່ອການພັດທະນາປະເທດ ບໍ່ພໍເທົ່າໃດເດືອນພາຍຫຼັງທີ່ທ່ານ ນາຈິບ ຣາຊັກ ອະດີດຜູ້ນຳພັກລັດຖະບານທີ່ປະລາໄຊການເລືອກຕັ້ງໃຫ້ກັບພັນທະມິດຝ່າຍຄ້ານເມື່ອວັນທີ 9 ພຶດສະພາ ທີ່ຜ່ານມາ ເຊິ່ງທ່ານກໍ່ໄດ້ປະຕິເສດຂໍ້ກ້າວຫາ ແລະ ຄະດີນີ້ກຳນົດເລີ່ມພິຈາລະນາຄະດີໃນປີໜ້າ.

ສຳລັບກອງທຶນເພື່ອການພັດທະນາປະເທດນັ້ນ ສ້າງຕັ້ງຂຶ້ນໃນປີ 2009 ໃນໄລຍະທີ່ທ່ານ ນາຈິບ ຣາຊັກ ຄອງອຳນາດຕຳແໜ່ງນາຍົກລັດຖະມົນຕີ ເພື່ອສົ່ງເສີມການພັດທະນາເສດຖະກິດ ແຕ່ກອງທຶນຜັດກໍ່ໃຫ້ເກີດພາລະໜີ້ສິນ ຈຶ່ງຖືກສອບສວນໃນສະຫະລັດ ອາເມຣິກາ ແລະ ອີກຫຼາຍປະເທດວ່າມີການຍັກຍອກ ແລະ ຖ່າຍໂອນເງິນຂ້າມປະເທດ ແລະ ຟອກເງິນ.

ລັດຖະບານຊຸດໃໝ່ຂອງມາເລເຊຍ ພາຍໃຕ້ການນຳຂອງທ່ານ ດຣ. ມະຫາເທ ໂມຣຳໝັດ ໄດ້ສັ່ງຮື້ຟື້ນການສອບສວນການສໍ້ລາດບັງຫຼວງໃນສະໄໝລັດຖະບານຂອງທ່ານ ນາຈິບ ຣາຊັກ ແລະ ສັ່ງຫາມທ່ານ ນາຈິບ ຣາຊັກ ແລະ ພັນລະຍາອອກນອກປະເທດ ຕຳຫຼວດຍັງໄດ້ຢຶດຊັບສິນເຊັ່ນ: ເຄື່ອງເພັດ, ກະເປົ໋າມີຍີ່ຫໍ້ ແລະ ອື່ນໆມູນຄ່າຫຼາຍກວ່າ 1,100 ລ້ານຣິງກິດ (273 ລ້ານໂດລາສະຫະລັດ) ຈາກອະສັງຫາລິມະຊັບທີ່ກ່ຽວຂ້ອງກັບທ່ານ ນາຈິບ ຣາຊັກ.

ຕຳຫຼວດລະບຸວ່າ: ຄະນະສອບສວນພົບວ່າ ມີການໂອນເງິນ 972 ລ້ານໂດລາສະຫະລັດ ຈາກ 3 ບໍລິສັດທີ່ກ່ຽວຂ້ອງກັບກອງທຶນເພື່ອການພັດທະນາປະເທດເຂົ້ສູ່ບັນຊີສ່ວນຕົວຂອງທ່ານ ນາຈິບ ຣາຊັກ, ເຖິງຢ່າງໃດກໍ່ຕາມ ທ່ານ ນາຈິບ ຣາຊັກ ໄດ້ກ່າວວ່າລັດຖະບານຊຸດໃໝ່ຂອງທ່ານ ດຣ. ມະຫາເທ ໂມຮຳໝັດ ວ່າຕ້ອງການແກ້ແຄ້ນໃນທາງການເມືອງ ແລະ ທ່ານໃຫ້ຄຳໝັ້ນວ່າຈະຂໍລົບລ້າງຂໍ້ກ່າວຫາທັງໝົດໃນລະຫວ່າງການພິຈາລະນາຄະດີ ແລະ ຍັງກ້າວອີກວ່າ ເງິນທີ່ໂອນເຂົ້າບັນຊີສ່ວນຕົວນັ້ນເປັນເງິນບໍລິຈາກທາງການເມືອງຈາກລາຊະວົງຂອງອາຣັບບີ ຊາອູດິດ.