ຜູ້ນຳຊີຣີກ່າວໂທດອິດສະຣາແອນ ວ່າເປັນຕົ້ນເຫດເຮັດໃຫ້ຍົນລັດເຊຍຖືກຍິງຕົກ

ສຳນັກຂ່າວຕ່າງປະເທດລາຍງານ 20 ກັນຍາ 2018 ວ່າ: ສຳນັກຂ່າວ SANA ຂອງທາງການຊີຣີເຜີຍແຜ່ຖະແຫຼງການຂອງທ່ານ ບາຊາ ອັນ-ອັສຊາດ ປະທານປະເທດຊີຣີ ເມື່ອວັນພຸດ ທີ່ຜ່ານມາ, ກ່ຽວກັບເຫດການທີ່ຍົນລາດຕະເວນ Il-20 ຂອງກອງທັບລັດເຊຍປະສົບເຫດຕົກໃນທະເລເມດິເຕິເຣນຽນ ເຮັດໃຫ້ທະຫານເທິງຍົນ 15 ຄົນເສຍຊີວິດ ເມື່ອຄືນວັນຈັນ ທີ່ຜ່ານມາຕາມເວລາທ້ອງຖິ່ນ ບໍ່ຫ່າງຈາກຝັ່ງເມືອງລາຕາເຄຍ ທີ່ຢູ່ທາງພາກຕາເວັນຕົກຂອງຊີຣີ ແລະ ເປັນສະຖານທີ່ຕັ້ງຂອງຖານທັບລັດເຊຍອີກດ້ວຍ ວ່າຄືຄວາມໂຊກຮ້າຍທີ່ເປັນຜົນມາຈາກຄວາມຈອງຫອງ ແລະ ຄວາມຊົ່ວຊ້າຂອງອິດສະຣາແອນ ແລະ ຢືນຢັນວ່າ ໂສກອະນາດຕະກຳຄັ້ງນີ້ບໍ່ສົ່ງຜົນກະທົບຕໍ່ປະຕິບັດການທາງທະຫານໃນການກວາດລ້າງກຸ່ມກໍ່ການຮ້າຍໃຫ້ໝົດໄປຈາກຊີຣີ.

ໃນຂະນະດຽວກັນ, ກອງກຳລັງປ້ອງກັນອິດສະຣາແອນ (IDF) ກໍ່ໄດ້ອອກຖະແຫຼງການເລື່ອງການສົ່ງຄະນະຜູ້ແທນພິເສດຈາກກອງທັບອາກາດ ທີ່ນຳໂດຍທ່ານ ພົນຕີ ອາມິຄຳ ນໍຄິນ ຢ້ຽມຢາມນະຄອນຫຼວງມົດສະກູ ເພື່ອລາຍງານຢ່າງລະອຽດ ແລະ ຊີ້ແຈງພ້ອມທັງຕອບຂໍ້ຊັກຖາມທັງໝົດຂອງລັດເຊຍ ທີ່ມີຕໍ່ເຫດການດັ່ງກ່າວ, ຂະນະດຽວກັນ ຄະນະຜູ້ແທນທາງທະຫານຂອງອິດສະຣາແອນຈະໃຊ້ໂອກາດນີ້ ນຳສະເໜີຂໍ້ມູນກ່ຽວກັບຄວາມພະຍາຍາມຂອງລັດຖະບານອີຣານ ໃນການສົ່ງອາວຸດໃຫ້ແກ່ກຸ່ມຮິສບອນເລາະ ແລະ ກອງກຳລັງຂອງອີຣານເຊິ່ງແຝງຕົວຢູ່ໃນຊີຣີອີກດ້ວຍ.

ຂະນະທີ່ທ່ານ ດະມິທຼີ ເຟສຄັອບ ໂຄສົກທຳນຽບປະທານປະເທດລັດເຊຍ ກ່າວວ່າ ການມາຢ້ຽມຢາມຂອງຄະນະຜູ້ແທນຈາກກອງທັບອິດສະຣາແອນ ເປັນໄປຕາມການຕົກລົງລະຫວ່າງທ່ານ ວະລາດິເມຍ ປູຕິນ ປະທານປະເທດລັດເຊຍ ກັບທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະຣາແອນ ທີ່ໄດ້ສົນທະນາກັນທາງໂທລະສັບ ເມື່ອວັນອັງຄານທີ່ຜ່ານມາ ເຊິ່ງຜູ້ນຳອິດສະຣາແອນໄດ້ສະແດງຄວາມເສຍໃຈຢ່າງຍິ່ງຕໍ່ການສູນເສຍທີ່ເກີດຂຶ້ນກັບກອງທັບລັດເຊຍ ແລະ ກ່າວວ່າເຫດການນີ້ເປັນຜົນມາຈາກຄວາມຜິດພາດຂອງຊີຣີ ໃນການຄວບຄຸມລະບົບປ້ອງກັນຂີປະນາວຸດ, ສ່ວນຫຼັກຖານທັງໝົດທີ່ຝ່າຍອິດສະຣາແອນນຳສະເໜີໃນຄັ້ງນີ້ ຈະມີຄະນະຜູ້ຊ່ຽວຊານຂອງລັດເຊຍກວດສອບຢ່າງລະອຽດອີກຄັ້ງ.

ເຊິ່ງລາຍງານຂອງກະຊວງປ້ອງກັນປະເທດລັດເຊຍລະບຸວ່າ: ເຫດການແມ່ນເກີດຂຶ້ນໃນຊ່ວງທີ່ກອງທັບຊີຣີກຳລັງໃຊ້ລະບົບປ້ອງກັນຂີປະນາວຸດ S-200 ປ້ອງກັນການໂຈມຕີທາງອາກາດຈາກຍົນຮົບຂອງອິດສະຣາແອນ ໃນເຂດນ່ານຟ້າເມືອງລາຕາເຄຍ ແລະ ກ່າວວ່າຍົນຮົບຂອງອິດສະຣາແອນເຈດຕະນາໃຊ້ຍົນ Il-20 ຂອງລັດເຊຍເປັນເກາະກຳລັງຈາກລະບົບປ້ອງກັນໄພທາງອາກາດ.