ສ.ອາເມຣິກາ ຂວໍ້າບາດໜ່ວຍງານລັດຂອງຈີນ ກໍລະນີຊື້ອາວຸດຈາກລັດເຊຍ

AFP PHOTO / POOL / Greg BAKER
AFP PHOTO / POOL / Greg BAKER

ສຳນັກຂ່າວຕ່າງປະເທດລາຍງານ 22 ກັນຍາ 2018 ວ່າ: ກະຊວງການຕ່າງປະເທດສະຫະລັດ ອາເມຣິກາ ອອກຖະແຫຼງການເມື່ອວັນທີ 20 ກັນຍາ ທີ່ຜ່ານມາວ່າ ໂດຍອາໄສອຳນາດຕາມກົດໝາຍຕໍ່ຕ້ານປໍລະປັກຂອງສະຫະລັດ ອາເມຣິກາດ້ວຍການຂວໍ້າບາດ ໄດ້ຂຶ້ນບັນຊີດຳກົມພັດທະນາເຄື່ອງມື ແລະ ອຸປະກອນ ເຊິ່ງເປັນໜຶ່ງໃນໜ່ວຍງານພາຍໃຕ້ສັງກັດກະຊວງປ້ອງກັນປະເທດຈີນ ທີ່ມີໜ້າທີ່ໂດຍກົງໃນການຈັດຊື້ອາວຸດ ແລະ ເຄື່ອງມືທາງການທະຫານ ພ້ອມກັບຂຶ້ນບັນຊີດຳທ່ານ ຫຼີ ສາງຟູ່ ຫົວໜ້າກົມພັດທະນາເຄື່ອງມື ແລະ ອຸປະກອນຂອງຈີນ ເຊິ່ງເປັນບຸກຄົນທີ່ກ່ຽວຂ້ອງໂດຍກົງກັບການເຮັດທຸລະກິດທີ່ສຳຄັນດັ່ງກ່າວ ຮ່ວມກັບບໍລິສັດໂຣໂຊໂບຣອນເອັກ ຜູ້ຜະລິດອາວຸດສົງຄາມລາຍໃຫຍ່ຂອງລັດເຊຍ.

ຜົນຈາກການຂຶ້ນບັນຊີດຳກົມພັດທະນາເຄື່ອງມື ແລະ ອຸປະກອນຂອງຈີນ ໝາຍຄວາມວ່າໜ່ວຍງານແຫ່ງນີ້ຈະບໍ່ສາມາດສົ່ງອອກອາວຸດໄປຍັງສະຫະລັດ ອາເມຣິກາໄດ້ ແລະ ການຫ້າມເຂົ້າເຖິງລະບົບທຸລະກິດຂອງສະຫະລັດ ອາເມຣິກາອີກດ້ວຍ ເຊິ່ງຍັງຈະເປັນການເພີ່ມຊື່ກົມພັດທະນາເຄື່ອງມື ແລະ ອຸປະກອນຂອງຈີນ ແລະ ທ່ານ ຫຼີ ສາງຟູ່ ເຂົ້າໃນບັນຊີດຳຂອງກະຊວງການເງິນສະຫະລັດ ອາເມຣິກາອີກດ້ວຍ, ໂດຍລາຍງານຂອງກະຊວງການຕ່າງປະເທດສະຫະລັດ ອາເມຣິກາລະບຸວ່າ ການໃຊ້ມາດຕະການຂວໍ້າບາດຝ່າຍດຽວຕໍ່ກົມພັດທະນາເຄື່ອງມື ແລະ ອຸປະກອນຂອງຈີນ ແລະ ທ່ານ ຫຼີ ສາງຟູ່ ກ່ຽວຂ້ອງກັບການທີ່ຈີນຊື່ຍົນຂັບໄລ່ Su-35 ຈຳນວນ 10 ລຳ ແລະ ໃນປີນີ້ຍັງມີການສັ່ງຊື້ອຸປະກອນເສີມສຳລັບລະບົບປ້ອງກັນຂີປະນາວຸດ S-400 ອີກດ້ວຍ.

ຂະນະດຽວກັນ, ກະຊວງການຕ່າງປະເທດສະຫະລັດ ອາເມຣິກາ ຍັງໄດ້ຂຶ້ນບັນຊີດຳບຸກຄົນສັນຊາດລັດເຊຍ ແລະ ບໍລິສັດຈົດທະບຽນໃນລັດເຊຍລວມ 33 ລາຍຊື່, ໃນຂໍ້ຫາຮ່ວມມືກັບກອງທັບລັດເຊຍ ແລະ ໜ່ວຍຂ່າວກອງຂອງລັດເຊຍ ເຮັດໃຫ້ມີລາຍຊື່ໃນສ່ວນນີ້ 72 ລາຍຊື່ແລ້ວ, ໂດຍມີປະມານ 20 ລາຍຊື່ຖືກດຳເນີນຄະດີໃນຂໍ້ຫາແຊກແຊງການເລືອກຕັ້ງປະທານປະເທດສະຫະລັດ ອາເມຣິກາ ເມື່ອປີ 2016 ລວມຢູ່ນຳ, ດ້ານຂອງລັດຖະບານຈີນ ແລະ ລັດເຊຍຍັງບໍ່ສະແດງທ່າທີໃນເລື່ອງນີ້.