ຈີນຍົກເລີກການພົບປະຫາລືທາງທະຫານ ກັບ ສ.ອາເມຣິກາ ພາຍຫຼັງຖືກຂວໍ້າບາດທາງທະຫານ

AFP PHOTO / Mladen ANTONOV
AFP PHOTO / Mladen ANTONOV

ສຳນັກຂ່າວຕ່າງປະເທດລາຍງານ 23​ ກັນຍາ 2018 ວ່າ: ກະຊວງປ້ອງກັນປະເທດຈີນ ອອກຖະແຫຼງການວ່າ ກອງທັບປົດປ່ອຍປະຊາຊົນຈີນ ມີຄຳສັ່ງໄດ້ຍົກເລີກກຳນົດການຂອງທ່ານ ພົນເອກ ເຊິນ ຈິນຫຼົງ ຜູ້ບັນຊາການກອງທັບເຮືອ ກອງທັບປົດປ່ອຍປະຊາຊົນຈີນ ໃນການຢ້ຽມຢາມສະຫະລັດ ອາເມຣິກາ ຢ່າງເປັນທາງການ ເຊັ່ນດຽວກັນກັບກຳນົດການປຶກສາຫາລືທາງທະຫານ ລະຫວ່າງເຈົ້າໜ້າທີ່ລະດັບສູງຂອງຈີນ ແລະ ສະຫະລັດ ອາເມຣິກາ ທີ່ກຳນົດໄວ້ໃນອາທິດໜ້າເຊັ່ນກັນ ໃຫ້ເລື່ອນໄປກ່ອນໂດຍບໍ່ມີກຳນົດ ເຊິ່ງຖະແຫຼງການຍັງລົງທ້າຍດ້ວຍຂໍ້ຄວາມທີ່ວ່າ ຈີນມີຄວາມຊອບທຳທີ່ຈະດຳເນີນມາດຕະການຕອບໂຕ້ສະຫະລັດ ອາເມຣິກາ ແຕ່ບໍ່ໄດ້ລົງລາຍລະອຽດ.

ຂະນະທີ່ກະຊວງການຕ່າງປະເທດຂອງຈີນ ໄດ້ອອກຖະແຫຼງການວ່າ ໄດ້ເຊີນທ່ານ ເທີຣີ ແບຣນສະແຕດ ເອກອັກຄະລັດຖະທູດສະຫະລັດ ອາເມຣິກາ ເຂົ້າພົບເມື່ອວັນເສົາທີ່ຜ່ານມາ ເພື່ອປຶກຫາສາລືຢ່າງຈິງຈັງຕາມຫຼັກການທູດ ຕໍ່ການທີ່ລັດຖະບານສະຫະລັດ ອາເມຣິກາໃຊ້ມາດຕະການຂວໍ້າບາດຕໍ່ໜ່ວຍງານທາງທະຫານຂອງຈີນ ເຊິ່ງທ່ານ ເກິ້ງ ສວງ ໂຄສົກກະຊວງການຕ່າງປະເທດຈີນ ກ່າວຮຽກຮ້ອງໃຫ້ສະຫະລັດ ອາເມຣິກາ ຖອດຖອນມາດຕະການດັ່ງກ່າວ ຖ້າບໍ່ດັ່ງນັ້ນ ຕ້ອງຍອມຮັບຜົນທີ່ຈະຕາມມາ, ສ່ວນທ່ານ ພົນເອກ ອູ໋ ສຽນ ໂຄສົກກະຊວງປ້ອງກັນປະເທດຈີນກ່າວວ່າ ສະຫະລັດ ອາເມຣິກາ ບໍ່ມີສິດທີ່ຈະກ້າວກ່າຍສາຍພົວພັນທາງການທະຫານລະຫວ່າງຈີນກັບປະເທດໃດກໍ່ຕາມ.

ເຊິ່ງກະຊວງການຕ່າງປະເທດສະຫະລັດ ອາເມຣິກາ ອອກຖະແຫຼງການເມື່ອວັນພະຫັດ ທີ່ຜ່ານມາວ່າ ໂດຍອາໄສອຳນາດຕາມກົດໝາຍຕໍ່ຕ້ານປໍລະປັກຂອງສະຫະລັດ ອາເມຣິກາ ດ້ວຍການຂວໍ້າບາດ ຂຶ້ນບັນຊີດຳກົມພັດທະນາເຄື່ອງມື ແລະ ອຸປະກອນທາງທະຫານຂອງຈີນ ເຊິ່ງເປັນໜຶ່ງໃນໜ່ວຍງານສັງກັດກະຊວງປ້ອງກັນປະເທດຈີນ ທີ່ມີໜ້າທີ່ໂດຍກົງໃນການຈັດຊື້ອາວຸດ ແລະ ເຄື່ອງມີທາງທະຫານ ລວມທັງຂຶ້ນບັນຊີທ່ານ ພົນໂທ ຫຼີ ສາງຟູ່ ຫົວໜ້າກົມພັດທະນາເຄື່ອງມື ແລະ ອຸປະກອນທາງທະຫານຂອງຈີນ ທີ່ໃຫ້ເຫດຜົນວ່າກ່ຽວຂ້ອງໂດຍກົງກັບການເຮັດທຸລະກຳສຳຄັນ ຮ່ວມກັບໍລິສັດ ໂຣໂຊໂບຣອນເອັກ ຜູ້ຜະລິດອາວຸດສົງຄາມລາຍໃຫຍ່ຂອງລັດເຊຍ ໂດຍກົມພັດທະນາເຄື່ອງມື ແລະ ອຸປະກອນທາງທະຫານຂອງຈີນ ໄດ້ສັ່ງຊື້ຍົນຮົບ Su-35 ຈຳນວນ 10 ລຳ ແລະ ອຸປະກອນເສີມສຳລັບລະບົບປ້ອງກັນຂີປະນາວຸດ S-400, ໂດຍລາຍງານຂອງລັດຖະບານສະຫະລັດ ອາເມຣິກາລະບຸວ່າ: ຈີນຖືເປັນປະເທດທຳອິດ ທີ່ຖືກລົງໂທດຕາມກົດໝາຍສະບັບດັ່ງກ່າວ ທີ່ສະພາສູງສະຫະລັດ ອາເມຣິກາຮັບຮອງເມື່ອປີທີ່ຜ່ານມາ ເພື່ອຈັດການກັບລັດເຊຍໂດຍສະເພາະ.

ການເຄື່ອນໄຫວຂອງກະຊວງປ້ອງກັນປະເທດຈີນ ເກີດຂຶ້ນໃນເວລາດຽວກັນກັບ ທີ່ລັດຖະບານຈີນໄດ້ຍົກເລີກການເຈລະຈາທາງການຄ້າຮອບໃໝ່ກັບສະຫະລັດ ອາເມຣິກາ ທີ່ຈະຈັດຂຶ້ນຢູ່ນະຄອນຫຼວງວໍຊິງຕັນໃນອາທິດນີ້ ແລະ ກຳນົດການຢ້ຽມຢາມສະຫະລັດ ອາເມຣິກາ ຂອງທ່ານ ຫຼິວ ເຮີ ຮອງນາຍົກລັດຖະມົນຕີ ແລະ ທີ່ປຶກສາດ້ານນະໂຍບາຍເສດຖະກິດຂອງທ່ານ ສີ ຈິ້ນຜິງ ປະທານປະເທດຈີນ ທີ່ກຳນົດໄວ້ພາຍຫຼັງການພົບປະຫາລືຄັ້ງນີ້ ຈະບໍ່ເກີດຂຶ້ນເຊັ່ນກັນ, ໃນຂະນະທີ່ກຳແພງພາສີຮອບໃໝ່ຂອງທັງສອງຝ່າຍຈະມີຜົນບັງຄັບໃຊ້ແຕ່ວັນທີ 24 ກັນຍາ ນີ້ເປັນຕົ້ນໄປ.