ລັດຖະບານ ສປປ.ລາວ ແຈ້ງການໄວ້ອາໄລລະດັບຊາດ ຕໍ່ການຈາກໄປຂອງທ່ານ ເຈິນ ດ້າຍ ກວາງ

AFP PHOTO / Vietnam News Agency / Vietnam News Agency
AFP PHOTO / Vietnam News Agency / Vietnam News Agency

ຫ້ອງວ່າການສຳນັກງານນາຍົກລັດຖະມົນຕີ ອອກແຈ້ງການ ເລກທີ 1577/ຫສນຍ ລົງວັນທີ 24 ກັນຍາ 2018 ເລື່ອງການຈັດໄວ້ອາໄລລະດັບຊາດ ຕໍ່ການເສຍຊີວິດຂອງທ່ານ ເຈິນ ດ້າຍ ກວາງ ປະທານປະເທດຫວຽດນາມ, ໂດຍແຈ້ງການມີເນື້ອໃນວ່າ:

ຫ້ອງວ່າການສຳນັກງານນຳຍົກລັດຖະມົນຕີ ຂໍຖືເປັນກຽດແຈ້ງມາຍັງທ່ານຊາບວ່າ: ເພື່ອເປັນການໄວ້ອາໄລ ຕໍ່ການຈາກໄປຂອງສະຫາຍ ເຈິນ ດ້າຍ ກວາງ ກຳມະການກົມການເມືອງສູນກາງພັກຄອມມູນິດຫວຽດນາມ, ປະທານປະເທດຫວຽດນາມ ທີ່ເປັນເພື່ອນມິດສະຫາຍທີ່ໃກ້ຊິດ ແລະ ສະໜິດສະໜົມທີ່ສຸດຂອງພັກ-ລັດ ແລະ ປະຊາຊົນລາວບັນດາເຜົ່າ, ສະນັ້ນ ຈຶ່ງໃຫ້ບັນດາກະຊວງ, ອົງການ, ນະຄອນຫຼວງວຽງຈັນ ແລະ ບັນດາແຂວງ ໃນທົ່ວປະເທດ ຈັດຄະນະໄປວາງພວງມາລາ ແລະ ຂຽນປຶ້ມ ຢູ່ໃນສະຖານເອກອັກຄະລັດຖະທູດຫວຽດນາມ ຢູ່ນະຄອນຫຼວງວຽງຈັນ ແລະ ສະຖານກົງສູນໃຫຍ່ຂອງຫວຽດນາມ ທີ່ປະຈຳຢູ່ແຕ່ລະພາກ ໃນວັນທີ 26-27 ກັນຍາ 2018 (ພາກເຊົ້າ: ເລີ່ມແຕ່ເວລາ 9:00-11:45 ໂມງ ແລະ ພາກບ່າຍ: ເລີ່ມແຕ່ເວລາ 14:00-16:30 ໂມງ), ພ້ອມກັນນັ້ນ, ກໍ່ໃຫ້ສຳນັກງານອົງກອນພັກ, ລັດ, ກຳລັງປ້ອງກັນຊາດ, ກຳລັງປ້ອງກັນຄວາມສະຫງົບ, ອົງການຈັດຕັ້ງມະຫາຊົນທັງສູນກາງ ແລະ ທ້ອງຖິ່ນ ເອົາທຸງລົງເຄິ່ງເສົາ ເລີ່ມແຕ່ເວລາ 6:00​ ໂມງ ຂອງວັນທີ 26 ກັນຍາ 2018 ຫາ 18:00 ໂມງ ຂອງວັນທີ 27 ກັນຍາ 2018 ໃນໄລຍະເວລາດັ່ງກ່າວ ແມ່ນໃຫ້ງົດການຈັດກິດຈະກຳມ່ວນຊື່ນ ທີ່ເປັນລັກສະນະມວນຊົນ.

ດັ່ງນັ້ນ, ຈຶ່ງແຈ້ງມາຍັງທ່ານ ເພື່ອຊາບ ແລະ ຈັດຕັ້ງປະຕິບັດຕາມເນື້ອໃນຂອງແຈ້ງການສະບັບນີ້ດ້ວຍ.