ລັດເຊຍຈະຕິດຕັ້ງ S-300 ໃນຊີຣີ ແລະ ກ່າວວ່າອິດສະຣາແອນ ກ່ຽວຂ້ອງກັບເຫດຍົນລັດເຊຍຕົກໃນຊີຣີ

AFP PHOTO / KIRILL KUDRYAVTSEV
AFP PHOTO / KIRILL KUDRYAVTSEV

ສຳນັກຂ່າວຕ່າງປະເທດລາຍງານ 25 ກັນຍາ 2018 ວ່າ: ທຳນຽມປະທານປະເທດລັດເຊຍ ໄດ້ອອກຖະແຫຼງການເມື່ອວັນຈັນ ທີ່ຜ່ານມາ ກ່ຽວກັບການສົນທະນາທາງໂທລະສັບລະຫວ່າງທ່ານ ວະລາດິເມຍ ປູຕິນ ປະທານປະເທດລັດເຊຍ ກັບທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະຣາແອນ ວ່າຂໍ້ມູນທີ່ຊີ້ແຈງໂດຍເຈົ້າໜ້າທີ່ລະດັບສູງຂອງກອງກຳລັງປ້ອງກັນອິດສະຣາແອນ ກ່ຽວກັບເຫດການຍົນລາດຕະເວັນ Il-20 ຂອງກອງທັບລັດເຊຍ ຕົກໃນທະເລເມດິເຕິເຣນຽນ ນອກຝັ່ງທາງຕາເວັນຕົກຂອງຊີຣີ ເຮັດໃຫ້ທະນາລັດເຊຍຢູ່ເທິງຍົນ 15 ຄົນເສຍຊີວິດ ເມື່ອວັນທີ 17 ກັນຍາ ທີ່ຜ່ານມານັ້ນ ບໍ່ສອດຄ່ອງກັບຜົນການວິເຄາະຂອງລັດຖະບານລັດເຊຍ.

ເຊິ່ງລາຍງານຂອງກອງທັບລັດເຊຍລະບຸວ່າ: ຍົນຂັບໄລ່ F-16 ຂອງກອງກຳລັງປ້ອງກັນອິດສະຣາແອນ 2 ລຳ ໃຊ້ຍົນ Il-20 ທີ່ກຽມຈະລົງຈອດຍັງສະໜາມບິນໃນເມືອງລາຕາເຄຍ ເປັນເກາະປ້ອງກັນຕົນຈາກລະບົບປ້ອງກັນ S-200 ໂດຍຍົນລຳໜຶ່ງຂອງອິດສະຣາແອນເຈດຕະນາບິນເຂົ້າໃກ້ຍົນຂອງລັດເຊຍ.

ດ້ວຍເຫດນີ້, ລັດເຊຍຈິ່ງສະຫຼຸບວ່າ ອິດສະຣາແອນມີສ່ວນກ່ຽວຂ້ອງໂດຍກົງ ແລະ ເປັນປັດໄຈຫຼັກເຮັດໃຫ້ເກີດໂສກອະນາດຕະກຳດັ່ງກ່າວ, ຂະນະທີ່ທ່ານ ພົນເອກ ເຊີເກ ຊອຍກູ ລັດຖະມົນຕີກະຊວງປ້ອງກັນປະເທດລັດເຊຍ ປະກາດກຽມສົ່ງມອບລະບົບປ້ອງກັນທາງອາກາດລຸ້ນ S-300 ໃຫ້ແກ່ກອງທັບຊີຣີພາຍໃນໄລຍະເວລາ 2 ອາທິດ ໂດຍເປີດເຜີຍວ່າ ໃນຄວາມເປັນຈິງການສົ່ງມອບຕ້ອງເກີດຂຶ້ນຕັ້ງແຕ່ປີ 2013 ແຕ່ລັດຖະບານລັດເຊຍໄດ້ໂຈະໄວ້ກ່ອນຕາມຄຳຂໍຂອງອິດສະຣາແອນ.

ໃນດ້ານຂອງທ່ານ ພົນເອກ ເຈມ ແມັດທິສ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ວິຈານການເຄື່ອນໄຫວຂອງລັດເຊຍຢ່າງຮຸນແຮງ ວ່າການຕິດຕັ້ງອາວຸດໜັກໃຫ້ກັບລັດຖະບານຊີຣີ ຈະຍິ່ງເປັນໄພຮຸກຮານຕໍ່ພູມມິພາກຕາເວັນອອກກາງ ແລະ ເປັນການຂົ່ມຂູ່ຜູ້ລີ້ໄພທັງໃນຊີຣີ ແລະ ປະເທດເພື່ອນບ້ານ, ສ່ວນທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກ່າວວ່າຈະນຳເລື່ອງນີ້ປຶກສາຫາລືກັບທ່ານ ເຊີເກ ລາວະຣົບ ລັດຖະມົນຕີກະຊວງການຕ່າງປະເທດລັດເຊຍ ນອກຮອບການປະຊຸມສະມັດຊາໃຫຍ່ແຫ່ງສະຫະປະຊາຊາດ ທີ່ນະຄອນນິວຢອກ ໃນອາທິດນີ້.