ຜູ້ນຳເກົາຫຼີໃຕ້ ຮຽກຮ້ອງປະຊາຄົມໂລກ ໃຫ້ການສະໜັບສະໜູນເກົາຫຼີເໜືອ

UN PHOTO
UN PHOTO

ສຳນັກຂ່າວຕ່າງປະເທດລາຍງານເມື່ອວັນທີ 26 ກັນຍາ 2018 ທີ່ຜ່ານມາວ່າ: ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ຖະແຫຼງຕໍ່ກອງປະຊຸມສະມັດຊາໃຫຍ່ແຫ່ງສະຫະປະຊາຊາດ ເມື່ອວັນພຸດ ໂດຍມີເນື້ອໃນສຳຄັນວ່າ ຈາກການທີ່ທ່ານໄດ້ມີໂອກາດພົບປະຫາລືກັບທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ຢ່າງໜ້ອຍ 3 ຄັ້ງແລ້ວໃນປີນີ້ ລັດຖະບານເກົາຫຼີເໜືອໄດ້ສະແດງຄວາມມຸ່ງໝັ້ນຢ່າງຊັດເຈນ ວ່າຕ້ອງການຫຼຸດພົ້ນອອກຈາກການຖືກປ່ອຍໃຫ້ໂດດດ່ຽວທີ່ຍາວນານ ເພື່ອກັບເຂົ້າສູ່ການເປັນສ່ວນໜຶ່ງຂອງປະຊາຄົມໂລກອີກຄັ້ງ ທ່ານຈຶ່ງຂໍວິງວອນໃຫ້ປະຊາຄົມໂລກຮ່ວມກັນສະແດງທ່າທີໃນທາງບວກ ເພື່ອສະໜັບສະໜູນຄວາມພະຍາຍາມຂອງເກົາຫຼີເໜືອ ແລະ ເພື່ອເປັນກຳລັງໃຈໃຫ້ກັບທ່ານ ຄິມ ຈອງ-ອຶນ ວ່າໄດ້ຕັດສິນໃຈຢ່າງຖືກຕ້ອງແລ້ວໃນການປົດອາວຸດນິວເຄຼຍ.

ຂະນະທີ່ທ່ານ ໂດໂນ ທຣຳ ປະທານປະເທດ ສະຫະລັດ ອາເມຣິກາກ່າວວ່າ ສະຫະລັດ ອາເມຣິກາບໍ່ໄດ້ກຳນົດກອບໄລຍະເວລາຢ່າງຊັດເຈນ ວ່າເກົາຫຼີເໜືອຕ້ອງສຳເລັດຂະບວນການປົດອາວຸດນິວເຄຼຍເມື່ອໃດ, ເຖິງຢ່າງໃດກໍ່ຕາມ ທ່ານ ໂດໂນ ທຣຳ ຍອມຮັບວ່າເສັ້ນທາງສູ່ຄວາມສຳເລັດໃນການໃຫ້ແຫຼມເກົາຫຼີເປັນເຂດປອດອາວຸດນິວເຄຼຍຍັງອີກຍາວໄກ ໝາຍຄວາມວ່າມາດຕະການຂວໍ້າບາດເພື່ອກົດດັນ ແລະ ຄວບຄຸມລັດຖະບານເກົາຫຼີເໜືອນັ້ນຍັງຈຳເປັນຕ້ອງດຳເນີນຕໍ່ໄປ.

ນອກຈາກນີ້, ທ່ານ ໂດໂນ ທຣຳ ຍັງກ່າວວ່າ ທ່ານຈະປະກາດກຳນົດການປະຊຸມຢ່າງເປັນທາງການຄັ້ງທີ 2 ກັບຜູ້ນຳເກົາຫຼີເໜືອພາຍໃນອະນາຄົດອັນໃກ້ນີ້ ພ້ອມທັງກ່າວອີກວ່າ ຫາກປະຊາຊົນອາເມຣິກາບໍ່ເລືອກທ່ານເປັນປະທານປະເທດ ສະຫະລັດ ອາເມຣິກາ ອາດເຮັດສົງຄາມກັບເກົາຫຼີເໜືອໄປແລ້ວກໍ່ເປັນໄດ້.

U.S. Department of State PHOTO

ໃນເວລາດຽວກັນ, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ໄດ້ພົບປະຫາລືກັບທ່ານ ຣີ ຢອງ-ໂຮ ລັດຖະມົນຕີກະຊວງການຕ່າງປະເທດເກົາຫຼີເໜືອ ນອກຮອບການປະຊຸມສະມັດຊາໃຫຍ່ແຫ່ງສະຫະປະຊາຊາດ ກ່ຽວກັບຂັ້ນຕອນຕໍ່ໄປ ສຳລັບຂະບວນການປົດອາວຸດນິວເຄຼຍຂອງລັດຖະບານເກົາຫຼີເໜືອ ແລະ ທ່ານ ໄມ ພອມແພວ ຢືນຢັນວ່າທ່ານ ມີກຳນົດການຢ້ຽມຢາມນະຄອນຫຼວງປຽງຢາງໃນເດືອນຕຸລານີ້ ເຊິ່ງຈະເປັນການເດີນທາງໄປຍັງເກົາຫຼີເໜືອ ຄັ້ງທີ 4 ແລ້ວໃນປີນີ້ຂອງທ່ານ ໄມ ພອມແພວ, ໂດຍຄັ້ງທຳອິດເປັນການຢ້ຽມຢາມໃນຖານະຜູ້ອຳນວຍການສຳນັກຂ່າວກອງກາງ (CIA).