ຈີນ ບໍ່ອະນຸຍາດໃຫ້ເຮືອໂຈມຕີຍົກພົນຂຶ້ນຝັ່ງ ຂອງ ສ.ອາເມຣິກາ ຈອດທຽບທ່າທີ່ຮົງກົງ

U.S. Navy photo by Mass Communication Specialist 3rd Class Taylor King
U.S. Navy photo by Mass Communication Specialist 3rd Class Taylor King

ສຳນັກຂ່າວຕ່າງປະເທດລາຍງານເມື່ອວັນທີ 25 ກັນຍາ 2018 ທີ່ຜ່ານມາວ່າ: ທ່ານ ພົນໂທ ເດວິດ ອິສເບິນ ໂຄສົກກະຊວງປ້ອງກັນປະເທດສະຫະລັດ ອາເມຣິກາ ກ່າວເມື່ອວັນອັງຄານ ທີ່ຜ່ານມາວ່າ: ລັດຖະບານຈີນບໍ່ອະນຸມັດຕາມຄຳຮ້ອງຂອງກະຊວງປ້ອງກັນປະເທດສະຫະລັດ ອາເມຣິກາ ໃນການໃຫ້ເຮືອໂຈມຕີຍົກພົນຂຶ້ນຝັ່ງ USS Wasp ເຂົ້າຈອດທຽບທ່າທີ່ເຂດບໍລິຫານພິເສດຮົງກົງ ໃນເດືອນຕຸລານີ້.

ຂະນະດຽວກັນ, ທ່ານ ພົນໂທ ເດວິດ ອິສເບິນຢືນຢັນວ່າ ພົນເອກ ເຊິນ ຈິນຫຼົງ ຜູ້ບັນຊາການທະຫານເຮືອຂອງກອງທັບປົດປ່ອຍປະຊາຊົນຈີນ ຍົກເລີກກຳນົດການຢ້ຽມຢາມນະຄອນຫຼວງວໍຊິງຕັນໃນອາທິດນີ້ ເພື່ອພົບປະຫາລືກັບທ່ານ ພົນເອກ ຈອນ ຣິຊາດສັນ ຜູ້ບັນຊາການກອງທັບເຮືອຂອງສະຫະລັດ ອາເມຣິກາ ຈາກກໍລະນີທີ່ສະຫະລັດ ອາເມຣິກາ ຂຶ້ນບັນຊີດຳໜ່ວຍງານຂອງກະຊວງປ້ອງກັນປະເທດຈີນ.

ໃນດ້ານຂອງທ່ານ ເກິ້ງ ສວງ ໂຄສົກກະຊວງການຕ່າງປະເທດຂອງຈີນ ກ່າວເຖິງເລື່ອງນີ້ພຽງວ່າ ໃນສ່ວນຂອງພິຈາລະນາຄຳຮ້ອງຂອງສະຫະລັດ ອາເມຣິກາ ເລື່ອງການນຳເຮືອເຂົ້າມາຈອດທຽບທ່ານັ້ນ ໜ່ວຍງານທີ່ກ່ຽວຂ້ອງຈະກວດສອບເປັນລາຍກໍລະນີ ເຊິ່ງຈະມີການພິຈາລະນາຕາມສະຖານະການປັດຈຸບັນຮ່ວມເຂົ້ານຳ, ເຖິງຢ່າງໃດກໍ່ຕາມ ຫວນຄືນກັບໄປເມື່ອປີ 2016 ຈີນບໍ່ອະນຸຍາດໃຫ້ກອງເຮືອຮົບຂອງສະຫະລັດ ອາເມຣິກາ ນຳໂດຍເຮືອບັນທຸກຍົນຮົບ USS John C. Stennis ເຂົ້າຈອດທຽບທ່າທີ່ຮົງກົງ ທ່າມກາງບັນຍາກາດຄວາມເຄັ່ງຕຶງເລື່ອງສະຖານະການໃນທະເລຈີນໃຕ້ທີ່ຮຸນແຮງໃນຕອນນັ້ນ.

ເຊິ່ງຄວາມສຳພັນລະຫວ່າງສະຫະລັດ ອາເມຣິກາ ກັບ ຈີນ ທີ່ກຳລັງເຄັ່ງຕຶງຢ່າງໜັກຈາກໍລະນີຄວາມຂັດແຍ່ງທາງການຄ້າ ໄດ້ຂະຫຍາຍລາມໄປເຖິງການຮ່ວມມືທາງທະຫານ ເມື່ອລັດຖະບານສະຫະລັດ ອາເມຣິກາຂຶ້ນບັນຊີດຳກົມພັດທະນາອຸປະກອນ ແລະ ເຄື່ອງມືທາງການທະຫານ ຂອງກະຊວງປ້ອງກັນປະເທດຈີນ ເຊິ່ງມີໜ້າທີ່ໂດຍກົງ ໃນການຈັດຊື້ອາວຸດ ແລະ ເຄື່ອງມືທາງການທະຫານ ລວມທັງຂຶ້ນບັນຊີດຳທ່ານ ພົນໂທ ຫຼີ ສາງຟູ່ ຫົວໜ້າກົມ ຈາກການສັ່ງຊື້ຍົນຂັບໄລ່ Su-35 ຈຳນວນ 10 ລຳ ແລະ ອຸປະກອນເສີມສຳລັບລະບົບປ້ອງກັນຂີປະນາວຸດ S-400 ເຊິ່ງສິນຄ້າທັງສອງລາຍການຜະລິດໂດຍລັດເຊຍ.

ຕໍ່ມາກະຊວງການຕ່າງປະເທດສະຫະລັດ ອາເມຣິກາ ອອກຖະແຫຼງການເມື່ອວັນຈັນ ທີ່ຜ່ານມາວ່າ: ໄດ້ມີການກຽມຂາຍອາວຸດຍຸດໂທປະກອນຊຸດໃໝ່ ໃຫ້ແກ່ໄຕ້ຫວັນ ລວມມູນຄ່າປະມານ 330 ລ້ານໂດລາສະຫະລັດ ແນ່ນອນວ່າໄດ້ສ້າງຄວາມບໍ່ພໍໃຈຢ່າງຍິ່ງໃຫ້ແກ່ລັດຖະບານຈີນ ເຊິ່ງກະຊວງປ້ອງກັນປະເທດ ແລະ ກະຊວງການຕ່າງປະເທດຂອງຈີນ ອອກຖະແຫຼງການໃນເວລາໄລ່ເລ່ຍກັນ ຮຽກຮ້ອງໃຫ້ລັດຖະບານສະຫະລັດ ອາເມຣິກາ ຍົກເລີກແຜນການດັ່ງກ່າວໃນທັນທີ ຖ້າບໍ່ດັ່ງນັ້ນ, ຄວາມສຳພັນສອງຝ່າຍຈະຍິ່ງເສຍຫາຍຢ່າງໃຫຍ່ຫຼວງ.