ຍີ່ປຸ່ນສະແດງຄວາມພ້ອມ ທີ່ຈະເປີດໃຈຮັບການເລີ່ມຕົ້ນໃໝ່ກັບເກົາຫຼີເໜືອ

UN PHOTO
UN PHOTO

ສຳນັກຂ່າວຕ່າງປະເທດລາຍງານເມື່ອວັນທີ 25 ກັນຍາ 2018 ທີ່ຜ່ານມາວ່າ: ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນກ່າວຖະແຫຼງຕໍ່ກອງປະຊຸມສະມັດຊາໃຫຍ່ແຫ່ງສະຫະປະຊາຊາດ ເມື່ອວັນອັງຄານ ທີ່ຜ່ານມາ ວ່າຍີ່ປຸ່ນພ້ອມເລີ່ມຕົ້ນໃໝ່ກັບເກົາຫຼີເໜືອ ດ້ວຍການປະຊຸມແບບພົບໜ້າກັບທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ເພື່ອຟື້ນຟູສາຍພົວພັນທີ່ຫ່າງເຫີນ ແລະ ການສະແຫວງຫາຫົນທາງແກ້ໄຂກໍລະນີທີ່ເຈົ້າໜ້າທີ່ຂອງລັດຖະບານເກົາຫຼີເໜືອ ລັກພາຕົວພົນລະເມືອງຂອງຍີ່ປຸ່ນຫຼາຍສິບຄົນ ເພື່ອສອນພາສາ ແລະ ວັດທະນະທຳໃຫ້ກັບເຈົ້າໜ້າທີ່ຂ່າວກອງຂອງເກົາຫຼີເໜືອ.

ເຖິງຢ່າງໃດກໍ່ຕາມ, ທ່ານ ຊິນໂຊ ອາເບະ ຍອມຮັບວ່າການກຽມການໃນເລື່ອງນີ້ເກືອບບໍ່ມີຄວາມຄືບໜ້າ ຈຶ່ງຂໍໃຫ້ໂອກາດນີ້ຮຽກຮ້ອງໃຫ້ເກົາຫຼີເໜືອ ສະແດງຄວາມພ້ອມໃນການປຶກສາຫາລືກັບຍີ່ປຸ່ນດ້ວຍ, ເພາະອາດເປັນໂອກາດຄັ້ງປະຫວັດສາດ ເຊິ່ງຫວນຄືນກັບໄປໃນສະໄໝຂອງທ່ານນາຍົກລັດຖະມົນຕີ ຈຸນອິຈິໂຣ ໂຄອິຊຸມິ ຜູ້ນຳຍີ່ປຸ່ນໃນເວລານັ້ນເຄີຍຢ້ຽມຢາມນະຄອນຫຼວງປຽງຢາງ 2 ຄັ້ງ ເມື່ອປີ 2002 ແລະ 2004 ເພື່ອພົບປະຫາລືກັບທ່ານ ຄິມ ຈອງ-ອິວ ແລະ ໄດ້ຮັບການຕອບກັບຈາກຜູ້ນຳສູງສຸດຂອງເກົາຫຼີເໜືອວ່າ ພົນລະເມືອງຍີ່ປຸ່ນທີ່ຖືກລັກພາຕົວມານັ້ນ ເສຍຊີວິດໝົດແລ້ວ.

ສຳລັບທ່າທີຂອງທ່ານ ຊິນໂຊ ອາເບະ ຕໍ່ເກົາຫຼີເໜືອໃນປັດຈຸບັນຖືໄດ້ວ່າ ມີການຜັນປ່ຽນເມື່ອທຽບກັບການກ່າວຖະແຫຼງໃນກອງປະຊຸມສະມັດຊາໃຫຍ່ແຫ່ງສະຫະປະຊາຊາດເມື່ອປີທີ່ຜ່ານມາ ເຊິ່ງຜູ້ນຳຍີ່ປຸ່ນກ່າວວ່າ ປະຕູການທູດກຳລັງຖືກປິດຕາຍສຳລັບເກົາຫຼີເໜືອ, ເຊິ່ງຄາດວ່າໜ້າຈະກ່ຽວຂ້ອງກັບການພົບປະຫາລືຄັ້ງປະຫວັດສາດລະຫວ່າງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາຄົນປັດຈຸບັນ ກັບທ່ານ ຄິມ ຈອງ-ອຶນ ໄດ້ພົບປະຫາລືກັນທີ່ສິງກະໂປ ເມື່ອເດືອນມິຖຸນາ ທີ່ຜ່ານມາ, ຂະນະທີ່ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ກໍ່ໄດ້ພົບປະຫາລືກັບຜູ້ນຳເກົາຫຼີເໜືອມາແລ້ວ 3 ຄັ້ງໃນປີນີ້, ໂດຍຄັ້ງຫຼ້າສຸດຄືການທີ່ຜູ້ນຳເກົາຫຼີໃຕ້ເດີນທາງຢ້ຽມຢາມນະຄອນຫຼວງປຽງຢາງດ້ວຍຕົວເອງ ເມື່ອອາທິດທີ່ຜ່ານມາ ເຊິ່ງທ່ານ ມູນ ແຈ-ອິນ ກ່າວວ່ານະໂຍບາຍຂອງເກົາຫຼີເໜືອປ່ຽນໄປໃນທາງທີ່ດີຂຶ້ນຫຼາຍ ແລະ ສະແດງຄວາມເຊື່ອໝັ້ນວ່າ ທ່ານ ຄິມ ຈອງ-ອຶນ ຍິນດີພົບປະຫາລືກັບຜູ້ນຳຍີ່ປຸ່ນ ເມື່ອເຖິງເວລາທີ່ເໝາະສົມ.