ເກີດເຫດແຜ່ນດິນໄຫວຮຸນແຮງທີ່ສຸລາເວສີ, ອິນໂດເນເຊຍ ແລະ ເກີດຄື້ນຍັກສຶນາມິ (ວິດີໂອ)

ສຳນັກຂ່າວຕ່າງປະເທດລາຍງານ 28 ກັນຍາ 2018 ວ່າ: ສຳນັກງານສຳຫຼວດທໍລະນີວິທະຍາສະຫະລັດ ອາເມຣິກາ (USGS) ລາຍງານວ່າ:​ ເກີດເຫດແຜ່ນດິນໄຫວຄັ້ງທຳອິດດ້ວຍຄວາມແຮງ 6.1 ຣິກເຕີ ມີຈຸດສູນກາງຢູ່ເລິກໃຕ້ທະເລ 10 ກິໂລແມັດ ຫ່າງຈາກຝັ່ງເມືອງດອງກາລາ ເກາະສຸລາເວສີ ໄປທາງຕາເວັນອອກສຽງເໜືອປະມານ 35 ກິໂມແມັດ, ທາງການເຈົ້າໜ້າທີ່ກົມບັນເທົາໄພພິບັດແຫ່ງຊາດອິນໂດເນເຊຍກ່າວວ່າ ຈາກລາຍງານເບື້ອງຕົ້ນມີຜູ້ເສຍຊີວິດ 1 ຄົນ ຈາກຕຶກອາຄານຫັກພັງທັບ ແລະ ມີຜູ້ໄດ້ຮັບບາດເຈັບຢ່າງໜ້ອຍ 10 ຄົນ ນອກຈາກນັ້ນຍັງມີອາຄານບ້ານເຮືອນຫັກພັງລົງມາເປັນຈຳນວນຫຼາຍ.

ຕໍ່ມາອີກບໍ່ພໍເທົ່າໃດຊົ່ວໂມງ ກໍ່ໄດ້ເກີດແຜ່ນດິນໄຫວແຮງສັ່ນສະເທືອນໄດ້ 7.5 ຣິກເຕີ ຈຸດສູນກາງຢູ່ບໍລິເວນດຽວກັນກັບຄັ້ງທຳອິດ ເຊິ່ງຄັ້ງທີສອງກົມອຸຕຸນິຍົມວິທະຍາ ແລະ ທໍລະນີຟີຊິກອິນໂດເນເຊຍໄດ້ອອກປະກາດເຕືອນໄພສຶນາມິ ໃຫ້ປະຊາຊົນໃນແຂວງສຸລາເວສີກາງ ແລະ ແຂວງສຸລາເວສີຕາເວັນຕົກ ອົບພະຍົບຂຶ້ນສູ່ທີ່ສູງເພື່ອຄວາມປອດໄພ ແຕ່ກົມໄດ້ປະກາດຍົກເລີກເຕືອນໄພສຶນາມິໃນເວລາຕໍ່ມາ.

ທ່ານ ໂມອຳໝັດ ຟີກຣີ ຊາວເມືອງດອງກາລາ ໄດ້ກ່າວຕໍ່ຜູ້ສື່ຂ່າວທາງໂທລະສັບວ່າ ແຮງສັ່ນຮຸນແຮງຮູ້ສຶກໄດ້ປະມານ 10​ ວິນາທີ ປະຊາຊົນເມືອງດອງກາລາ ໄດ້ແລ່ນອອກຈາກຕຶກອາຄານ ມາຢູ່ລວມກັນຕາມຖະໜົນຫົນທາງ ຫຼື ບ່ອນໂລ່ງ ແຕ່ສ່ວນໃຫຍ່ບໍ່ແຕກຕື່ນຕົກໃຈ ເນື່ອງຈາກເຄີຍປະສົບກັບແຜ່ນດິນໄຫວມາຫຼາຍຄັ້ງກ່ອນໜ້ານີ້ ລວມເຖິງເມື່ອສອງອາທິດທີ່ຜ່ານມາ ເຊິ່ງຮູ້ສຶກວ່າຮຸນແຮງກວ່າຄັ້ງນີ້.

ລາຍງານໃນເວລາຕໍ່ມາລະບຸວ່າ: ພາຍຫຼັງແຜ່ນດິນໄຫວຄັ້ງທີ 2 ໄດ້ບໍ່ດົນ ໄດ້ເກີດຄື້ນສຶນາມິຄວາມສູງປະມານ 2 ແມັດ ພັດເຂົ້າຫາຝັ່ງເມືອງດອງກາລາ ແລະ ເມືອງປາລູ ເມືອງເອກຂອງແຂວງຊວາກາງ ເຊິ່ງມີປະຊາຊົນປະມານ 350,000 ຄົນ ແລະ ຢູ່ຫ່າງຈາກຈຸດສູນກາງແຜ່ນດິນໄຫວເກືອບ 80 ກິໂລແມັດ. ທ່ານ ຣາມັດ ຕຣີໂຢໂນ ຫົວໜ້າພະແນກແຜ່ນດິນໄຫວ ແລະ ສຶນາມິຂອງກົມບັນເທົາໄພພິບັດແຫ່ງຊາດອິນໂດເນເຊຍກ່າວວ່າ ຄື້ນຮຸນແຮງໄດ້ພັດເຂົ້າໃສ່ບ້ານເຮືອນຈົກຫາຍໄປຫຼາຍຫຼັງ ແລະ ປະຊາຊົນຫຼາຍຄອບຄົວສູນຫາຍໄປພ້ອມກັບນ້ຳ, ເຈົ້າໜ້າທີ່ລະດົມໜ່ວຍກູ້ໄພອອກຄົ້ນຫາ ຂະນະທີ່ການຕິດຕໍ່ສື່ສານທາງໂທລະສັບໃນພື້ນທີ່ບໍ່ສາມາດໃຊ້ການໄດ້.