ມີຜູ້ເສຍຊີວິດແລ້ວເກືອບ 400​ ຄົນ ຈາກເຫດແຜ່ນດິນໄຫວ ແລະ ຄື້ນຍັກສຶນາມິ ຢູ່ສຸລາເວສີ ອິນໂດເນເຊຍ

AFP PHOTO / MUHAMMAD RIFKI
AFP PHOTO / MUHAMMAD RIFKI

ສຳນັກຂ່າວຕ່າງປະເທດລາຍງານເມື່ອວັນທີ 29 ກັນຍາ 2018 ທີ່ຜ່ານມາກ່ຽວກັບຄວາມຄືບໜ້າ ພາຍຫຼັງເກີດເຫດແຜ່ນດິນໄຫວຮຸນແຮງ 7.5 ຣິກເຕີ ເຊິ່ງມີຈຸດສູນກາງເລິກລົງໄປໃຕ້ດິນພຽງ 10 ກິໂລແມັດ ຢູ່ເກາະສຸລາເວສີ ປະເທດອິນໂດເນເຊຍ ເມື່ອຕອນຫົວຄ່ຳຂອງວັນສຸກ ທີ່ຜ່ານມາຕາມເວລາທ້ອງຖິ່ນ ແລະ ກໍ່ໃຫ້ເກີດຄື້ນຍັກສຶນາມິຫຼາຍຮອບ ເຊິ່ງມີຄວາມສູງສຸດປະມານ 2 ແມັດ ພັດເຂົ້າຝັ່ງຂອງເມືອງດອງກາລາ ແລະ ເມືອງປາລູ ເຊິ່ງເປັນເມືອງເອກຂອງແຂວງສຸລາເວສີກາງ ແລະ ເມືອງມາມູຈູ ເມືອງເອກຂອງແຂວງສຸລາເວສີຕາເວັນຕົກ.

AFP PHOTO / MUHAMMAD RIFKI

ໃນດ້ານຂອງທ່ານ ຊູໂຕໂປ ປູໂວ ນູໂກຣໂຮ ໂຄສົກຂອງກົມບໍລິຫານຈັດການໄພພິບັດແຫ່ງຊາດ ລາຍງານຈຳນວນຜູ້ເສຍຊີວິດຈາກໄພທຳມະຊາດໃນຄັ້ງນີ້ເພີ່ມຂຶ້ນຢ່າງວ່ອງໄວເປັນ 384 ຄົນແລ້ວ ແລະ ໄດ້ຮັບບາດເຈັບອີກ 520 ຄົນ ໂດຍຈຳນວນຜູ້ເສຍຊີວິດມີທ່າອ່ຽງຈະເພີ່ມຂຶ້ນອີກ, ເນື່ອງຈາກເຈົ້າໜ້າທີ່ຍັງຢູ່ໃນລະຫວ່າງສຳຫຼວດຄວາມເສຍຫາຍຂອງອາຄານບ້ານເຮືອນທີ່ຫັກພັງລົງມາ ທັງຈາກແຮງສັ່ນສະເທືອນຂອງແຜ່ນດິນໄຫວ ແລະ ຈາກແຮງພັດຂອງຄື້ນສຶນາມິ ເພື່ອເລັ່ງຄົ້ນຫາຜູ້ສູນຫາຍ ທີ່ອາດຈະຍັງຄົງຕິດຢູ່ພາຍໃຕ້ຊາກຫັກພັງຂອງສິ່ງກໍ່ສ້າງ ຫຼື ອາດໜີໄປຫຼົບໄພຍັງສະຖານທີ່ໃກ້ຄຽງ ເຊິ່ງເຈົ້າໜ້າທີ່ມີລາຍຊື້ຜູ້ສູນຫາຍອີກ 29 ຄົນ.

ຂະນະທີ່ກ່ອນຈະເກີດສຶນາມິໃນຕອນຫົວຄ່ຳ ໃນຕອນເວັນຂອງມື້ດຽວກັນ ມີລາຍງານການເກີດແຜ່ນດິນໄຫວ 6.1 ຣິກເຕີ ທີ່ເມືອງປາລູ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 1 ຄົນ ແລະ ໄດ້ຮັບບາດເຈັບອີກ 10 ຄົນ, ນອກຈາກນີ້ ສະຖານະການຢູ່ເກາະສຸລາເວສີເກີດຂຶ້ນພຽງເດືອນດຽວ ພາຍຫຼັງແຜ່ນດິນໄຫວຮຸນແຮງ 4 ຄັ້ງຢູ່ເກາະລອມບອກ ເມື່ອເດືອນສິງຫາ ທີ່ຜ່ານມາ ໂດຍຄັ້ງຮຸນແຮງທີ່ສຸດຄືແຜ່ນດິນໄຫວ 6.9 ຣິກເຕີ ເມື່ອວັນທີ 5 ສິງຫາ ທີ່ຜ່ານມາ ເຮັດໃຫ້ມີຜູ້ເສຍຊີວິດຫຼາຍກວ່າ 500​ ຄົນ.

ນອກຈາກນີ້, ຫວນຄືນກັບໄປເມື່ອເດືອນທັນວາ 2004 ແຜ່ນດິນໄຫວຮຸນແຮງ 9.1 ຣິກເຕີ ນອກຝັ່ງທາງເໜືອຂອງເກາະສຸມາດຕຣາ ປະເທດອິນໂດເນເຊຍ ສົ່ງຜົນໃຫ້ເກີດຄື້ນຍັກສຶນາມິພັດເຂົ້າຝັ່ງຂອງ 14 ປະເທດ ມີຜູ້ເສຍຊີວິດລວມກັນຫຼາຍກວ່າ 227,000 ຄົນ ໂດຍໃນຈຳນວນນີ້ປະມານ 120,000 ຄົນ ເປັນຜູ້ເສຍຊີວິດທີ່ພົບໃນອິນໂດເນເຊຍ.

AFP PHOTO / OLA GONDRONK
AFP PHOTO / MUHAMMAD RIFKI
AFP PHOTO / Bay ISMOYO
AFP PHOTO / Bay ISMOYO
AFP PHOTO / MUHAMMAD RIFKI
AFP PHOTO / Bay ISMOYO
AFP PHOTO / Bay ISMOYO
AFP PHOTO / Bay ISMOYO
AFP PHOTO / MUHAMMAD RIFKI
AFP PHOTO / Bay ISMOYO
AFP PHOTO / Bay ISMOYO
AFP PHOTO / Bay ISMOYO
AFP PHOTO / MUHAMMAD RIFKI