ຊີຣີກ່າວຂອບໃຈລັດເຊຍ ແລະ ຮຽກຮ້ອງໃຫ້ປະເທດທີ່ບໍ່ກ່ຽວຂ້ອງຖອນກຳລັງອອກໄປຈາກປະເທດ

UN PHOTO
UN PHOTO

ສຳນັກຂ່າວຕ່າງປະເທດລາຍງານ 30 ກັນຍາ 2018 ວ່າ: ທ່ານ ວາລິດ ອັນ-ມູອາເລມ ຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດຊີຣີ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ແຫ່ງສະຫະປະຊາຊາດ ເມື່ອວັນເສົາ ທີ່ຜ່ານມາ ມີເນື້ອໃນສຳຄັນວ່າ: ເຖິງແມ່ນວ່າກອງທັບສະຫະລັດ ອາເມຣິກາ, ຝຣັ່ງ ແລະ ຕວັກກີ ຈະເຂົ້າມາປະຕິບັດການທາງທະຫານໃນດິນແດນຂອງຊີຣີໂດຍອ້າງເງື່ອນໄຂວ່າເປັນພາລະກິດຕໍ່ຕ້ານການກໍ່ການຮ້າຍ ແຕ່ຖືເປັນການປະຕິບັດທີ່ຜິດຕໍ່ກົດໝາຍ ເນື່ອງຈາກບໍ່ເຄີຍໄດ້ຮັບອະນຸຍາດຈາກລັດຖະບານຊີຣີ ດ້ວຍເຫດນີ້ລັດຖະບານທັງສາມປະເທດຄວນຖອນກຳລັງພົນ ແລະ ອາວຸດກັບອອກໄປທັນທີ ຖ້າບໍ່ດັ່ງນັ້ນຈະມີການດຳເນີນການຕາມຂັ້ນຕອນຕໍ່ໄປ.

ຂະນະດຽວກັນ, ທ່ານ ວາລິດ ອັນ-ມູອາເລມ ກໍ່ໄດ້ກ່າວຂອບອົກຂອບໃຈການສະໜັບສະໜູບຈາກລັດເຊຍໃນທຸກດ້ານ ທີ່ໄດ້ເພີ່ມປະສິດທິພາບໃຫ້ກັບກອງທັບຊີຣີ ໃນການກວາດລ້າງ ແລະ ຂັບໄລ່ກຸ່ມກໍ່ການຮ້າຍໃນປະເທດ ເຊິ່ງເປັນສ່ວນໜຶ່ງຂອງສົງຄາມກາງເມືອງທີ່ແກ່ຍາວເຂົ້າສູ່ປີທີ 8 ແລ້ວນັ້ນໃຫ້ມີຄວາມຄືບໜ້າຫຼາຍດ້ານ ໂດຍຝ່າຍລັດຖະບານຢູ່ບໍ່ໄກຈາກເສັ້ນໄຊແລ້ວ ຈຶ່ງຂໍໃຊ້ໂອກາດນີ້ຮຽກຮ້ອງໃຫ້ປະຊາຊົນທີ່ລີ້ໄພອອກໄປກັບຄືນພູມລຳເນົາ, ເຊິ່ງສະຖິຕິຂອງສຳນັກງານຂ້າຫຼວງໃຫຍ່ຜູ້ລີ້ໄພແຫ່ງສະຫະປະຊາຊາດ (UNHCR) ປະເມີນຈຳນວນປະຊາຊົນຊີຣີພັດຖິ່ນໄວ້ຫຼາຍກວ່າ 12 ລ້ານຄົນ ໃນຈຳນວນນີ້ 5.1 ລ້ານຄົນຂຶ້ນທະບຽນກັບ UNHCR, ສ່ວນທີ່ເຫຼືອເປັນຜູ້ບໍ່ມີທີ່ຢູ່ອາໄສພາຍໃນປະເທດ.

ນອກຈາກນີ້, ທ່ານ ວາລິດ ອັນ-ມູອາເລມ ຍັງກ່າວເຖິງການຈັດຕັ້ງ “ແນວປ້ອງກັນການປະທະ” ເປັນໄລຍະທາງຍາວປະມານ 15-20 ກິໂລແມັດ ໃນແຂວງອິດລິບ ທີ່ຢູ່ທາງພາກຕາເວັນຕົກສຽງເໜືອຂອງປະເທດ ຕາມການຕົກລົງເມື່ອເດືອນທີ່ຜ່ານມາລະຫວ່າງລັດເຊຍ ກັບ ຕວັກກີວ່າ ເປັນຂໍ້ຕົກລົງທີ່ມີເສັ້ນຕາຍ ຄືພາຍໃນວັນທີ 15 ຕຸລານີ້ ເຊິ່ງຖືເປັນໂອກາດສຸດທ້າຍ ໝາຍຄວາມວ່າຫຼັງຈາກນັ້ນຈະມີປະຕິບັດການທາງທະຫານຂັບໄລ່ກຸ່ມນັກຮົບຫົວຮຸນແຮງ ທີ່ຍັງເຫຼືອຢູ່ ໂດຍສະເພາະກຸ່ມຮາຢັດ ຕາຣີ-ອັນ-ຊາມ ຫຼື ອະດີດກຸ່ມອັນ-ນຸສຣາ ໂດຍແຂວງອິດລິບເປັນເຂດທີ່ໝັ້ນຂະໜາດໃຫຍ່ແຫ່ງສຸດທ້າຍຂອງກອງກຳລັງຝ່າຍຕໍ່ຕ້ານລັດຖະບານ ແມ່ນໄດ້ຕົກຢູ່ທ່າມກາງວົງປິດລ້ອມຂອງກອງທັບຊີຣີ ມາຕັ້ງແຕ່ເດືອນທີ່ຜ່ານມາ ເພື່ອກຽມຄວາມພ້ອມສຳລັບປະຕິບັດການຢຶດຄືນພື້ນທີ່ ທີ່ຢູ່ພາຍໃຕ້ການຢຶດຄອງຂອງຝ່າຍກະບົດມາດົນກວ່າ 3 ປີ.