ຈຳນວນຜູ້ເສຍຊີວິດເພີ່ມສູງກວ່າ 1,200 ຄົນແລ້ວ ຈາກເຫດແຜ່ນດິນໄຫວ ແລະ ສຶນາມິ ຢູ່ສຸລາເວສີ, ອິນໂດເນເຊຍ

AFP PHOTO / JEWEL SAMAD
AFP PHOTO / JEWEL SAMAD

ສຳນັກຂ່າວຕ່າງປະເທດລາຍງານ 2 ຕຸລາ 2018 ວ່າ: ກົມບໍລິຫານຈັດການໄພພິບັດແຫ່ງຊາດອິນໂດເນເຊຍ ອອກຖະແຫຼງການວ່າ ຈຳນວນຜູ້ເສຍຊີວິດຈາກເຫດແຜ່ນດິນໄຫວ 7.5 ຣິກເຕີ ທີ່ສົ່ງຜົນໃຫ້ເກີດຄື້ນສຶນາມິພັດເຂົ້າຝັ່ງເກາະສຸລາເວສີ ເມື່ອວັນສຸກທີ່ຜ່ານມາ ເພີ່ມເປັນຢ່າງໜ້ອຍ 1,234 ຄົນ ແລະ ມີຜູ້ໄດ້ຮັບບາດເຈັບຫຼາຍກວ່າ 600 ຄົນ.

ເຖິງຢ່າງໃດກໍ່ຕາມ ຈຳນວນຜູ້ສູນຫາຍຍັງບໍ່ມີຄວາມຊັດເຈນ, ທ່ານ ໂຈໂຄ ວິໂດໂດ ປະທານປະເທດອິນໂດເນເຊຍ ໄດ້ອອກຄຳສັ່ງເພີ່ມກຳລັງເຈົ້າໜ້າທີ່ກູ້ໄພທັງທະຫານ, ຕຳຫຼວດ ແລະ ປະຊາຊົນ ລົງພື້ນທີ່ໃຫ້ການຊ່ວຍເຫຼືອຜູ້ປະສົບໄພ ແລະ ຄົ້ນຫາຜູ້ສູນຫາຍຢ່າງສຸດຄວາມສາມາດ, ຂະນະທີ່ອົງການກາແດງອິນໂດເນເຊຍລາຍງານວ່າ ໜ່ວຍກູ້ໄພສາມາດໃຫ້ການຊ່ວຍເຫຼືອຜູ້ທີ່ຕິດຢູ່ໃຕ້ຊາກຫັກພັງຂອງໂຮງແຮມໂຣອາ ໂຣອາ ອອກມາໄດ້ຢ່າງໜ້ອຍ 12​ຄົນ ຈາກຈຳນວນທີ່າຄການໄວ້ປະມານ 50 ຄົນວ່າຕິດຢູ່ກ້ອງໂຮງແຮມ, ເຖິງຢ່າງໃດກໍ່ຕາມບ້ານເຮືອນ ແລະ ສິ່ງກໍ່ສ້າງປະມານ 1,700 ແຫ່ງຖືກພັງກ້ຽງຈາກຄວາມຮຸນແຮງຂອງສຶນາມິ ສົ່ງຜົນໃຫ້ປະຊາຊົນເກືອບ 60,000 ຄົນບໍ່ມີທີ່ຢູ່ອາໄສ.

ໃນດ້ານການຊ່ວຍເຫຼືອຈາກຕ່າງປະເທດຍັງຫຼັ່ງໄຫຼເຂົ້າສູ່ພື້ນທີ່ປະສົບໄພ ພາຍຫຼັງທີ່ຜູ້ນຳອິນໂດເນເຊຍປະກາດເປີດຮັບການຊ່ວຍເຫຼືອດ້ານມະນຸດສະທຳຈາກຕ່າງປະເທດ ໂດຍການຊ່ວຍເຫຼືອມີທັງໃນຮູບແບບຂອງເງິນບໍລິຈາກ ແລະ ສິ່ງຂອງບັນເທົາທຸກ, ເຖິງຢ່າງໃດກໍ່ຕາມ ການທີ່ລະບົບພື້ນຖານໂຄງລ່າງໃນພື້ນທີ່ປະສົບໄພຍັງໃຊ້ການເກືອບບໍ່ໄດ້ ໂດຍສະເພາະໃນເມືອງປາລູ ເຊິ່ງເປັນເມືອງເອກຂອງແຂວງສຸລາເວສີກາງ ການລຳລຽງສິ່ງຂອງຈຶ່ງເປັນໄປຢ່າງລຳບາກ ປະຊາຊົນຈຳນວນຫຼາຍພາກັນກໍ່ເຫດປຸ້ນສະດົມຕາມຮ້ານຄ້າຫຼາຍແຫ່ງ ເຊິ່ງເຈົ້າໜ້າທີ່ຝ່າຍຄວາມໝັ້ນຄົງໄດ້ເພີ່ມກຳລັງອາລັກຂາສະຖານທີ່ ແລະ ຄວບຄຸມສະຖານະການ.

AFP PHOTO / Jewel SAMAD
AFP PHOTO / JEWEL SAMAD
AFP PHOTO / BAY ISMOYO
AFP PHOTO / BAY ISMOYO
AFP PHOTO / BAY ISMOYO
AFP PHOTO / ADEK BERRY
AFP PHOTO / JEWEL SAMAD
AFP PHOTO / JEWEL SAMAD
AFP PHOTO / BAY ISMOYO
AFP PHOTO / JEWEL SAMAD
AFP PHOTO / BAY ISMOYO