ອິນເດຍສັ່ງຊື້ S-400 ຈາກລັດເຊຍ ໂດຍບໍ່ສົນໃຈຄຳຂູ່ຂອງ ສ.ອາເມຣິກາ ທີ່ວ່າຈະຂວໍ້າບາດ

AFP PHOTO / POOL / Yuri KADOBNOV
AFP PHOTO / POOL / Yuri KADOBNOV

ສຳນັກຂ່າວຕ່າງປະເທດລາຍງານ 6 ຕຸລາ 2018 ວ່າ: ທ່ານ ປູຕິນ ປະທານປະເທດລັດເຊຍ ແລະ ທ່ານ ນະເຣນທຣາ ໂມດີ ນາຍົກລັດຖະມົນຕີອິນເດຍ ໄດ້ເປັນສັກຂີພິຍານຮ່ວມກັນໃນພິທີລົງນາມຂໍ້ຕົກລົງການຮ່ວມມືສອງຝ່າຍຫຼາຍສະບັບ ທີ່ນະຄອນຫຼວງນິວເດລີ ປະເທດອິນເດຍ ເມື່ອວັນສຸກ ທີ 5 ຕຸລາ ທີ່ຜ່ານມາ ໂດຍນອກເໜືອຈາກບັນທຶກຂໍ້ຕົກລົງການຮ່ວມມື (MOU) ດ້ານເສດຖະກິດອະວະກາດ ທີ່ລັດເຊຍຈະຊ່ວຍເຝິກສອນໃຫ້ອິນເດຍສາມາດສົ່ງນັກບິນຊຸດທຳອິດເດີນທາງສູ່ອະວະກາດພາຍໃນປີ 2022, ດ້ານກະສິກຳ ແລະ ການພັດທະນາລະບົບພື້ນຖານໂຄງລ່າງແລ້ວ ຍັງມີການລົງນາມທີ່ທຸກຝ່າຍໃຫ້ຄວາມສົນໃຈຫຼາຍທີ່ສຸດຄືຂໍ້ຕົກລົງດ້ານຄວາມໝັ້ນຄົງ ທີ່ອິນເດຍຕົກລົງສັ່ງຊື້ລະບົບປ້ອງກັນໄພທາງອາກາດ S-400.

AFP PHOTO / POOL / Yuri KADOBNOV
AFP PHOTO / SPUTNIK / Mikhail KLIMENTYEV

ເຊິ່ງແຫຼ່ງຂ່າວໃນລັດຖະບານອິນເດຍໃຫ້ຂໍ້ມູນວ່າ ອິນເດຍສັ່ງຊື່ລະບົບ S-400 ຈາກລັດເຊຍຈຳນວນ 5 ຊຸດ ລວມມູນຄ່າປະມານ 5,200 ລ້ານໂດລາສະຫະລັດ, ຂະນະດຽວກັນທັງສອງປະເທດຍັງເຫັນດີທີ່ຈະສົ່ງເສີມການຮ່ວມມືດ້ານພະລັງງານ ທີ່ບໍລິສັດລັດເຊຍຈະເປັນຜູ້ສຳປະທານໂຄງການກໍ່ສ້າງເຕົາປະຕິກອນນິວເຄຼຍເພີ່ມອີກ 6 ແຫ່ງ.

ເຖິງຢ່າງໃດກໍ່ຕາມ, ການເຄື່ອນໄຫວດັ່ງກ່າວເກີດຂຶ້ນທ່າມກາງການຕິດຕາມຢ່າງໃກ້ຊິດຂອງສະຫະລັດ ອາເມຣິກາ ເຊິ່ງເຕືອນວ່າອິນເດຍຈະຕ້ອງປະເຊີນກັບຄວາມສ່ຽງຕາມກົດໝາຍຕໍ່ຕ້ານປໍລະປັກຂອງສະຫະລັດ ອາເມຣິກາດ້ວຍການຂວໍ້າບາດ ທີ່ສະພາສູງສະຫະລັດ ອາເມຣິກາ ປະກາດໃຊ້ເມື່ອເດືອນສິງຫາ ປີທີ່ຜ່ານມາ ເພື່ອກີດກັນລັດເຊຍໂດຍສະເພາະ ແລະ ຈີນເປັນປະເທດທຳອິດທີ່ຖືກລົງໂທດ ຕາມກົດໝາຍນີ້ ໂດຍກະຊວງການຕ່າງປະເທດສະຫະລັດ ອາເມຣິກາ ໄດ້ຂຶ້ນບັນຊີດຳກົມພັດທະນາເຄື່ອງມື ແລະ ອຸປະກອນທາງການທະຫານ ທີ່ຂຶ້ນກັບກະຊວງປ້ອງກັນປະເທດຂອງຈີນ ເມື່ອທ້າຍເດືອນທີ່ຜ່ານມາ ຈາກການສັ່ງຊື້ອາວຸດຈາກລັດເຊຍ ທີ່ລວມເຖິງອຸປະກອນເສີມສຳລັບລະບົບ S-400.

ເຖິງຢ່າງໃດກໍ່ຕາມນັກວິເຄາະເຊື່ອວ່າ ລັດຖະບານອິນເດຍໄດ້ປະເມີນຄວາມສ່ຽງຕໍ່ບັນຫານີ້ໄວ້ແລ້ວເປັນຢ່າງດີ ໂດຍຂໍ້ມູນຈາກກະຊວງປ້ອງກັນປະເທດອິນເດຍລະບຸວ່າ ເກືອບ 70% ຂອງອາວຸດຍຸດໂທປະກອນທີ່ກອງທັບອິນເດຍໃຊ້ງານຢູ່ໃນປັດຈຸບັນ ເປັນສິນຄ້າຈາກລັດເຊຍ, ຂະນະທີ່ສາຍພົວພັນລະຫວ່າງອິນເດຍ ກັບ ສະຫະລັດ ອາເມຣິກາ ແລະ ລັດເຊຍ ຕະຫຼອດຮອດຈີນ ນັ້ນເປັນເລື່ອງທີ່ມີຄວາມສະຫຼັບຊັບຊ້ອນ.