ຍີ່ປຸ່ນໃຫ້ການຊ່ວຍເຫຼືອເກັບກູ້ລະເບີດບໍ່ທັນແຕກໃນ ສປປ.ລາວ 900 ລ້ານເຢັນ

AFP PHOTO / POOL / Kazuhiro NOGI
AFP PHOTO / POOL / Kazuhiro NOGI

ສຳນັກຂ່າວສານປະເທດລາວລາຍງານວ່າ: ໃນຕອນບ່າຍວັນທີ 8 ຕຸລາ 2018, ທີ່ຫ້ອງວ່າການສໍານັກງານນາຍົກລັດຖະມົນຕີຍີ່ປຸ່ນ, ຫຼັງຈາກການພົບປະສຸດຍອດຂອງສອງນາຍົກລັດຖະມົນຕີລາວ-ຍີ່ປຸ່ນ ແລ້ວ, ຜູ້ນຳທັງສອງໄດ້ຖະແຫລງຂ່າວຮ່ວມຕໍ່ສືມວນຊົນ ກ່ຽວກັບຜົນການພົບປະສອງຝ່າຍລາວ-ຍີ່ປຸ່ນ, ເພື່ອສືບຕໍ່ຢືນຢັນເຖິງການຜັນຂະຫຍາຍຂອງການເປັນຄູ່ຮ່ວມຍຸດທະສາດຂອງສອງປະເທດໃຫ້ເຂົ້າສູ່ລວງເລິກ ແລະ ລວງກ້ວາງຂວາງໃຫ້ແໜ້ນແຟ້ນຍິ່ງໆຂຶ້ນນັ້ນ ຜູ້ນຳທັງສອງໄດ້ເປັນເອກະພາບກັນດັ່ງນີ້:

AFP PHOTO / POOL / Kazuhiro NOGI

1. ສປປ.ລາວ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດລາວ-ຍີ່ປຸ່ນ ແມ່ນໄດ້ຮັບການເສີມຂະຫຍາຍຂຶ້ນຢ່າງຕໍ່ເນື່ອງ, ເຊິ່ງໄດ້ສະແດງອອກໃນຜົນສຳເລັດຂອງຂົງເຂດການຮ່ວມມືຕ່າງໆ ເປັນຕົ້ນ ການແລກປ່ຽນການຢ້ຽມຢາມຂອງການນຳຂັ້ນສູງຢ່າງເປັນປົກກະຕິ, ການຮ່ວມມືດ້ານເສດຖະກິດ ກໍ່ຄືດ້ານວັດທະນະທຳ-ສັງຄົມ ແລະ ການທ່ອງທ່ຽວແມ່ນມີການຂະຫຍາຍຕົວຂຶ້ນ.

2. ສອງຝ່າຍຕີລາຄາສູງຕໍ່ການຮ່ວມມືສອງຝ່າຍລາວ-ຍີ່ປຸ່ນ ໃນກອບຂອງການຮ່ວມມື ແມ່ນໍ້າຂອງ-ຍີ່ປຸ່ນ ໂດຍສະເພາະການຈັດຕັ້ງປະຕິບັດວຽກງານຕ່າງໆ ພາຍໃຕ້ຍຸດທະສາດໂຕກຽວ 2015 ແລະ ແຜນປະຕິບັດງານສຳລັບປີ 2016-2018 ທີ່ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ແລະ ເຫັນດີຮ່ວມກັນ ເພື່ອສືບຕໍ່ເສີມຂະຫຍາຍການຮ່ວມມື ລາວ-ຍີ່ປຸ່ນ ໃຫ້ກ້າວສູ່ລວງເລີກຄຽງຄູ່ກັບການຍົກລະດັບການພົວພັນລະຫວ່າງແມ່ນໍ້າຂອງ ແລະ ຍີ່ປຸ່ນ ຂຶ້ນເປັນຄູ່ຮ່ວມມືຍຸດທະສາດ ແລະ ພ້ອມກັນພັດທະນາເສດຖະກິດ-ສັງຄົມ ເພື່ອຄວາມສົມບຸນພູນສຸກຂອງປະຊາຊົນ ໃນພາກພື້ນແມ່ນໍ້າຂອງ ກໍ່ຄື ການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ລາວ-ຍີ່ປຸ່ນ ໃຫ້ແໜ້ນແຟ້ນຍີ່ງໆຂຶ້ນ. ສປປ.ລາວ ກຽມພ້ອມເຂົ້າຮ່ວມຈັດຕັ້ງປະຕິບັດຍຸດທະສາດໂຕກຽວ 2018 ທີ່ໄດ້ຖືກຮັບຮອງເອົາໃນກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ໃນຄັ້ງນີ້ ໃຫ້ປະກົດຜົນເປັນຈິງ.

3. ສອງຝ່າຍຕີລາຄາສູງຕໍ່ຄວາມຄືບໜ້າການຈັດຕັ້ງປະຕິບັດແຜນການຮ່ວມມືລະຫວ່າງ ສປປ.ລາວ ແລະ ຍີ່ປຸ່ນ ເພື່ອແນໃສ່ຊ່ວຍເຫຼືອ ສປປ.ລາວ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ່ 8, ກໍ່ຄື ແຜນຍຸດທະສາດເຖິງ ປີ 2025 ແລະ ວິໄສທັດ ເຖິງປີ 2030 ຂອງ ສປປ.ລາວ ໃຫ້ສໍາເລັດຕາມຄາດໝາຍທີ່ວາງໄວ້.

4. ສປປ.ລາວ ສະແດງຄວາມເຫັນໃຈຕໍ່ລັດຖະບານ ແລະ ປະຊາຊົນ ຍີ່ປຸ່ນ ທີ່ໄດ້ຮັບຜົນກະທົບຈາກໄພພິບັດທຳມະຊາດ ເປັນຕົ້ນ ໄພນໍ້າຖ້ວມ, ດີນເຈື່ອນ, ພະຍຸໄຕ້ຝຸ່ນ ແລະ ແຜ່ນດີນໄຫວ ໃນໄລຍະທີ່ຜ່ານມາ. ພ້ອມດຽວກັນນີ້, ສປປ.ລາວ ກໍ່ສະແດງຄວາມຂອບໃຈມາຍັງລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າແກ່ ສປປ.ລາວ ທີ່ໄດ້ຮັບຜົນກະທົບຈາກໄພພິບັດທີ່ເກີດຂຶ້ນຢູ່ເມືອງ ສະໜາມໄຊ, ແຂວງອັດຕະປື ສປປ.ລາວ, ເຊີ່ງເປັນການຊ່ວຍເຫຼືອທີ່ທັນການ ແລະ ໄດ້ກາຍເປັນກຳລັງໃຈທີ່ສຳຄັນ ໃນການບັນເທົາທຸກແກ່ຜູ້ປະສົບເຄາະຮ້າຍຄັ້ງນີ້ ໃຫ້ຄືນສູ່ສະພາບປົກກະຕິໂດຍໄວ.

5. ສປປ.ລາວ ສະແດງຄວາມຂອບໃຈມາຍັງລັດຖະບານຍີ່ປຸ່ນ ທີ່ຈະສືບຕໍ່ໃຫ້ການຊ່ວຍເຫຼືອໃນຂົງເຂດຕ່າງໆ ເຊັ່ນ: ການພັດທະນາພື້ນຖານໂຄງລ່າງ, ການແກ້ໄຂຜົນກະທົບຈາກລະເບີດບໍ່ທັນແຕກ, ການຊ່ວຍເຫລືອດ້ານການເງິນ ແລະ ອື່ນໆ.

AFP PHOTO / POOL / Kazuhiro NOGI

6. ສອງນາຍົກລັດຖະມົນຕີ ໄດ້ເປັນສັກຂີພິຍານໃນການລົງນາມສັນຍາການຮ່ວມມືສອງຝ່າຍຄື: 1) ເອກະສານແລກປ່ຽນໂຄງການເລັ່ງລັດການເກັບກູ້ລະເບີດບໍ່ທັນແຕກຢູ່ ສປປ.ລາວ ໃນມູນຄ່າ 900 ລ້ານເຢນ. 2) ສັນຍາການຮ່ວມມືດ້ານວິຊາການລະຫວ່າງ ໂຮງໝໍມິດຕະພາບ ແລະ ສະຖາບັນຜ່າຕັດສະໝອງ ຄິຕາຮາຣາ ( Kitahara ) ຍີ່ປຸ່ນ.

7. ທັງສອງຝ່າຍຍັງໄດ້ແລກປ່ຽນທັດສະນະນໍາກັນ ກ່ຽວກັບບັນຫາໃນພາກພື້ນ ແລະ ສາກົນ ອື່ນໆ ທີ່ສອງຝ່າຍມີຄວາມສົນໃຈຮ່ວມກັນ.

8. ທ່ານນາຍົກລັດຖະມົນຕີ ທອງລຸນ ສີສຸລິດ ມີຄວາມເພິ່ງພໍໃຈ ແລະ ຕີລາຄາສູງຕໍ່ໝາກຜົນຂອງການພົບປະກັບ ທ່ານນາຍົກລັດຖະມົນຕີ ອາເບະ ໃນຄັ້ງນີ້ ແລະ ຫວັງວ່າຜົນຂອງການພົບປະໃນຄັ້ງນີ້ຈະໄດ້ນຳໄປສູ່ການຈັດຕັ້ງໃຫ້ເປັນຮູບປະທຳຢ່າງແທ້ຈິງ.

AFP PHOTO / POOL / Kazuhiro NOGI
AFP PHOTO / POOL / Kazuhiro NOGI