3 ປີຜ່ານມາກຸ່ມປະເທດແມ່ນ້ຳຂອງ ໄດ້ງົບສະໜັບສະໜູນຈາກຍີ່ປຸ່ນເຖິງ 750 ຕື້ເຢັນ

AFP PHOTO / POOL / Nicolas Datiche
AFP PHOTO / POOL / Nicolas Datiche

ກະຊວງການຕ່າງປະເທດລາຍງານວ່າ: ໃນວັນທີ 9 ຕຸລາ 2018 ທີ່ຜ່ານມາ, ຄະນະຜູ້ແທນ ສປປ.ລາວ ນໍາໂດຍທ່ານ ທອງລຸນ ສີສຸລິດ, ນາຍົກລັດຖະມົນຕີ ແລະ ຄະນະຜູ້ແທນໄດ້ເຂົ້າຮ່ວມກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ຄັ້ງທີ 10 ທີ່ ໂຕກຽວ ປະເທດຍີ່ປຸ່ນ, ພາຍໃຕ້ການເປັນປະທານຂອງທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ແລະ ມີບັນດາຜູ້ນຳຂອງ 5 ປະເທດແມ່ນໍ້າຂອງຄື: ກຳປູເຈຍ, ສປປ.ລາວ, ມຽນມາ, ໄທ ແລະ ສສ.ຫວຽດນາມ ເຂົ້າຮ່ວມຢ່າງພ້ອມພຽງ.

AFP PHOTO / POOL / FRANCK ROBICHON

ກອງປະຊຸມໄດ້ຕີລາຄາຄືນຄວາມຄືບໜ້າຂອງການຈັດຕັ້ງປະຕິບັດບັນດາໂຄງການ ແລະ ແຜນວຽກຕ່າງໆພາຍໃຕ້ຍຸດທະສາດໂຕກຽວ 2015 ແລະ ແຜນປະຕິບັດງານສໍາລັບປີ 2016-2018 ຂອງຂອບການຮ່ວມມື ແມ່ນໍ້າຂອງ-ຍີ່ປຸ່ນ ໃນໄລຍະຜ່ານມາ ແລະ ຮ່ວມກັນປຶກສາຫາລືກ່ຽວກັບທິດທາງເສີມຂະຫຍາຍການຮ່ວມມືໃນຕໍ່ໜ້າ, ໃນໂອກາດດັ່ງກ່າວບັນດາຜູ້ນໍາຂອງປະເທດແມ່ນໍ້າຂອງໄດ້ສະແດງຄວາມຊົມເຊີຍຕໍ່ລັດຖະບານຍີ່ປຸ່ນ ທີ່ໄດ້ມີຄວາມພະຍາຍາມສຸມໃສ່ການຊ່ວຍເຫຼືອເພື່ອພັດທະນາພື້ນຖານໂຄງລ່າງອຸດສາຫະກຳພາກພື້ນແມ່ນ້ຳຂອງໃນໄລຍະ 3 ປີຜ່ານມາ ໂດຍສະເພາະ ການສະໜັບສະໜູນງົບປະມານຈໍານວນ 750 ຕື້ເຢັນ ເຂົ້າໃນການຈັດຕັ້ງປະຕິບັດໂຄງການຕ່າງໆຂອງແຜນຍຸດທະສາດໂຕກຽວ 2015 ແລະ ສະເໜີໃຫ້ຍີ່ປຸ່ນສືບຕໍ່ໃຫ້ການສະໜັບສະໜູນ.

ສໍາລັບ ສປປ.ລາວ ທ່ານ ທອງລຸນ ສີສຸລິດ ນາຍົກລັດຖະມົນຕີໄດ້ແລກປ່ຽນທັດສະນະຕໍ່ກອງປະຊຸມວ່າ ສປປ.ລາວ ມີຄວາມເພິ່ງພໍໃຈຕໍ່ໝາກຜົນຂອງການຈັດຕັ້ງປະຕິບັດຍຸດທະສາດໂຕກຽວ 2015 ກໍ່ຄືການຈັດຕັ້ງຜັນຂະຫຍາຍບັນດາແຜນວຽກ ແລະ ໂຄງການຕ່າງໆ, ຕະຫຼອດໄລຍະ 3 ປີ ຜ່ານມາ, ເຫັນວ່າຫຼາຍໂຄງການຢູ່ ສປປ.ລາວ ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນເປັນຕົ້ນແມ່ນໃນຂົງເຂດການເຊື່ອມຈອດ ແລະ ການພັດທະນາພື້ນຖານໂຄງລ່າງທີ່ມີຄຸນນະພາບເຊັ່ນ: ໂຄງການຂະຫຍາຍອາຄານສະໜາມບິນສາກົນວັດໄຕ, ໂຄງການປັບປຸງເສັ້ນທາງໝາຍເລກ 9, ໂຄງການສ້າງຂົວເຊກອງຢູ່ເສັ້ນທາງຫຼວງແຫ່ງຊາດຫມາຍເລກ 16 B, ໂຄງການເຂື່ອນໄຟຟ້ານໍ້າງຽບ 1 ແລະ ອື່ນໆ. ບັນດາໂຄງການເຫຼົ່ານີ້ບໍ່ພຽງແຕ່ປະກອບສ່ວນອັນສໍາຄັນໃຫ້ແກ່ການເຊື່ອມໂຍງເສດຖະກິດ ລະຫວ່າງບັນດາປະເທດແມ່ນໍ້າຂອງດ້ວຍກັນເທົ່ານັ້ນ, ແຕ່ຍັງເປັນການສ້າງພື້ນຖານໂຄງລ່າງໃຫ້ແກ່ການເຊື່ອມຈອດຂອງພາກພື້ນອີກດ້ວຍ.

ພ້ອມດຽວກັນນິ້,  ບັນດາຜູ້ນໍາຂອງປະເທດແມ່ນໍ້າຂອງ ແລະ ຍີ່ປຸ່ນ ຍັງໄດ້ເຫັນດີເປັນເອກະພາບກັນຮັບຮອງເອົາຍຸດທະສາດໂຕກຽວ 2018 ເພື່ອສືບຕໍ່ເສີມຂະຫຍາຍການຮ່ວມມືລະຫວ່າງບັນດາປະເທດແມ່ນໍ້າຂອງ ແລະ ຍີ່ປຸ່ນ ຂຶ້ນສູ່ລະດັບຄູ່ຮ່ວມຍຸດທະສາດ ແລະ ຮັບປະກັນຜົນປະໂຫຍດລວມແຫ່ງສັນຕິພາບ, ການພັດທະນາເສດຖະກິດ-ສັງຄົມ ແລະ ຍົກສູງຄຸນນະພາບຊີວິດການເປັນຢູ່ຂອງປະຊາຊົນໃນພາກພື້ນແມ່ນໍ້າຂອງໃຫ້ນັບມື້ນັບດີຂຶ້ນ, ທັງເປັນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງປະເທດແມ່ນໍ້າຂອງ ລວມທັງ   ສປປ.ລາວ ກັບ ຍີ່ປຸ່ນ ໃຫ້ແໜ້ນແຟ້ນຍິ່ງຂຶ້ນ.

ນອກຈາກເຂົ້າຮ່ວມກອງປະຊຸມສຸດຍອດ ແມ່ນໍ້າຂອງ-ຍີ່ປຸ່ນ ຄັ້ງທີ 10, ທ່ານ ທອງລຸນ ສີສຸລິດ ນາຍົກລັດຖະມົນຕີ ກໍ່ໄດ້ເຂົ້າຢ້ຽມຂໍ່ານັບເຈົ້າຈັກກະພັດຍີ່ປຸ່ນ, ເຂົ້າຮ່ວມກອງປະຊຸມພົບປະສອງຝ່າຍ ລະຫວ່າງ ສປປ.ລາວ-ຍີ່ປຸ່ນ, ຮ່ວມພົບປະກັບຄະນະຮັບຜິດຊອບ ແລະ ນັກກີລາບານເຕະທີມຊາດຂອງບັນດາປະເທດແມ່ນໍ້າຂອງ, ເຂົ້າຮ່ວມເປັນສັກຂີພິຍານພິທີເຊັນສັນຍາ ແລະ ແລກປ່ຽນເອກະສານວ່າດ້ວຍການຊ່ວຍເຫຼືອດ້ານ UXO (ລະເບີດບໍ່ທັນແຕກ) ລົງນາມໂດຍລັດຖະມົນຕີຕ່າງປະເທດຂອງ ລາວ ແລະ ຍີ່ປຸ່ນ, ເຂົ້າຮ່ວມພົບປະກັບສະມາຄົມມິດຕະພາບຝ່າຍລັດຖະສະພາຍີ່ປຸ່ນ-ແມ່ນໍ້າຂອງ ແລະ ເຂົ້າຮ່ວມເວທີສົນທະນາການລົງທຶນຢູ່ພາກພື້ນແມ່ນໍ້າຂອງເຊິ່ງຈັດຂຶ້ນໂດຍອົງການສົ່ງເສີມການຄ້າຍີ່ປຸ່ນເພື່ອເພີ່ມທະວີການຮ່ວມມື ແລະ ສົ່ງເສີມການຄ້າ, ການລົງທຶນ ແລະ ທ່ອງທ່ຽວ ລະຫວ່າງ ບັນດາປະເທດແມ່ນໍ້າຂອງ ແລະ ຍີ່ປຸ່ນ ພ້ອມທັງໄດ້ຕ້ອນຮັບການຢ້ຽມຄໍານັບຂອງໂຮງໝໍ ກິຕາຮາຣາ, ບໍລິສັດ Hitachi, ແລະ ບໍລິສັດ TEPCO ເພື່ອປືກສາຫາລືແຜນການຮ່ວມມືສອງຝ່າຍໃນຕໍ່ໜ້າ.

Laos Prime Minister Thongloun Sisoulith (L) is welcomed by Japan’s Prime Minister Shinzo Abe (R) upon arrival at the Akasaka Palace state guest house to attend the 10th Mekong-Japan Summit in Tokyo on October 9, 2018. / AFP PHOTO / POOL / ISSEI KATO
Laos Prime Minister Thongloun Sisoulith (L) is welcomed by Japan’s Prime Minister Shinzo Abe (R) upon arrival at the Akasaka Palace state guest house to attend the 10th Mekong-Japan Summit in Tokyo on October 9, 2018. / AFP PHOTO / POOL / ISSEI KATO
Laos Prime Minister Thongloun Sisoulith (centre R) reviews an honour guard as he arrives at the Akasaka Palace state guest house to attend the 10th Mekong-Japan Summit in Tokyo on October 9, 2018. / AFP PHOTO / POOL / ISSEI KATO
Japan’s Prime Minister Shinzo Abe (R) shakes hands with Laos Prime Minister Thongloun Sisoulith prior to the 10th Mekong-Japan Summit at the Akasaka guest house in Tokyo on October 9, 2018. / AFP PHOTO / POOL / FRANCK ROBICHON
(L to R) Cambodia’s Prime Minister Hun Sen, Laos Prime Minister Thongloun Sisoulith, Japan’s Prime Minister Shinzo Abe, Myanmar’s leader Aung San Suu Kyi, Thailand’s Prime Minister Prayut Chan-O-Cha and Vietnam’s Prime Minister Nguyen Xuan Phuc pose for a group photo after receiving Japanese national football team jerseys during the 10th Mekong-Japan Summit at the Akasaka guest house in Tokyo on October 9, 2018. / AFP PHOTO / POOL / Nicolas Datiche