ທ່ານນາຍົກເຊີນຊວນນັກລົງທຶນຍີ່ປຸ່ນ ໃຫ້ມາລົງທຶນໃນ ສປປ.ລາວ ດ້ວຍນະໂຍບາຍ 3 ເປີດ

AFP PHOTO / POOL / FRANCK ROBICHON
AFP PHOTO / POOL / FRANCK ROBICHON

ສຳນັກຂ່າວສານປະເທດລາວລາຍງານວ່າ: ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ນໍາສະເໜີນະໂຍບາຍ 3 ເປີດ ຄື: ເປີດປະຕູ, ເປີດສິ່ງກີດຂວາງ ແລະ ເປີດໃຈ ຕໍ່ນັກທຸລະກິດຍີ່ປຸ່ນ ໃນກອງປະຊຸມເວທີປືກສາການລົງທຶນແມ່ນໍ້າຂອງ-ຍີ່ປຸ່ນ ໃນວັນທີ 9 ຕຸລາ 2018.

ທ່ານ ທອງລຸນ ສີສຸລິດ ກ່າວວ່າ: ເພື່ອຕ້ອນຮັບ ແລະ ຮອງຮັບນັກລົງທຶນ ແລະ ນັກພັດທະນາຂອງຍີ່ປຸ່ນໃນປັດຈຸບັນ ແລະ ຕໍ່ໜ້າ ເພື່ອໃຫ້ບັນດານັກທຸລະກິດໄດ້ພິຈາລະນາເອົາ ສປປ.ລາວ ເປັນປະເທດໜຶ່ງໃນການລົງທຶນ ແລະ ຂະຫຍາຍທຸລະກິດໃນອະນາຄົດອັນໃກ້ນີ້ ສປປ.ລາວ ກໍ່ຈະເອົາໃຈໃສ່ໃຫ້ຄວາມສໍາຄັນເປັນຢ່າງຍິ່ງຕໍ່ການນໍາໃຊ້ທ່າແຮງ ແລະ ການປະກອບສ່ວນຂອງພາກເອກະຊົນທັງພາຍໃນ ແລະ ຕ່າງປະເທດ ອົງປະກອບໜຶ່ງສໍາຄັນໃນການພັດທະນາເສດຖະກິດ-ສັງຄົມ ຂອງ ສປປ ລາວ.

ນອກນີ້, ລັດຖະບານ ກໍ່ຈະສົ່ງເສີມການລົງທຶນທີ່ມີຄຸນນະພາບ ນໍາໃຊ້ພູມປັນຍາ ແລະ ແຮງງານຢ່າງມີປະສິດທິພາບ, ນໍາໃຊ້ຊັບພະຍາກອນທໍາມະຊາດຢ່າງປະຢັດ ແລະ ເປັນມິດກັບສິ່ງແວດລ້ອມ. ພ້ອມນີ້, ກໍ່ຈະສືບຕໍ່ປັບປຸງສະພາບແວດລ້ອມການລົງທຶນ ລວມທັງການປັບປຸງນະໂຍບາຍ, ນິຕິກໍາ ແລະ ກົນໄກການປະສານງານພາຍໃນ ໃຫ້ມີຂັ້ນຕອນກະທັດຮັດ, ວ່ອງໄວ, ໂປ່ງໃສ ແລະ ຜ່ານປະຕູດຽວ ເພື່ອຫລຸດຜ່ອນອຸປະສັກໃນການສ້າງຕັ້ງ ແລະ ດໍາເນີນທຸລະກິດຢູ່ ສປປ.ລາວ.

ທ່ານນາຍົກລັດຖະມົນຕີ ກ່າວຕື່ມວ່າ: ສປປ.ລາວ ມີຂໍ້ໄດ້ປຽບທາງດ້ານຊັບພະຍາກອນທໍາມະຊາດທີ່ອຸດົມສົມບູນ, ມີທ່າແຮງທາງດ້ານກະສິກໍາ, ໂດຍສະເພາະການຜະລິດກະສີກໍາທີ່ສະອາດ ແລະ ມີແຫຼ່ງທ່ອງທ່ຽວທີ່ຫຼາກຫຼາຍ ການທ່ອງທ່ຽວຂອງລາວ ຈະເນັ້ນແບບການທ່ອງທ່ຽວວັດທະນະທໍາ, ປະຫວັດສາດ, ທໍາມະຊາດ, ໂດຍຕິດພັນກັບການປົກປັກຮັກສາສິ່ງແວດລ້ອມ ແລະ ພັດທະນາຂະ ແໜງການອື່ນໄປພ້ອມກັນເປັນຕົ້ນ: ພື້ນຖານໂຄງລ່າງ, ການບໍລິການ, ອຸດສະຫະກໍາ, ຫັດຖະກໍາ, ສາທາລະນະສຸກ ແລະ ອື່ນໆ.

ພ້ອມດຽວກັນ ລາວຍັງມີທ່າແຮງທາງດ້ານການຜະລິດພະລັງງານໄຟຟ້າທີ່ສະອາດ ແລະ ສົ່ງເສີມການຜະລິດພະລັງງານທາງເລືອກອື່ນໆ ທີ່ເປັນມິດຕໍ່ສິ່ງແວດລ້ອມ. ຂະນະດຽວກັນລັດຖະບານ ໄດ້ອະນຸມັດສ້າງຕັ້ງເຂດເສດຖະກິດພິເສດ ແລະ ເຂດເສດຖະ ກິດສະເພາະ 12 ເຂດໃນທົ່ວປະເທດ ເພື່ອສົ່ງເສີມການລົງທຶນ ແລະ ດຶງດູດນັກລົງທຶນຈາກພາຍໃນ ແລະ ຕ່າງປະເທດ. ປັດຈຸບັນ ເຂດທີ່ນັກລົງທຶນຍີ່ປຸ່ນ ກໍາລັງໃຫ້ຄວາມສົນໃຈຫລາຍແມ່ນ ເຂດເສດ ຖະກິດພິເສດ ສະຫວັນ-ເຊໂນ, ເຂດເສດຖະກິດພິເສດຈໍາປາສັກ ແລະ ນິຄົມອຸດສະຫະກໍາ ແລະ ການຄ້າວຽງຈັນໂນນທອງ.

ໃນໂອກາດນີ້, ທ່ານນາຍົກລັດຖະມົນຕີ ຍັງໄດ້ເຊີນຊວນໃຫ້ບັນດານັກທຸລະກິດ ເດີນທາງໄປຢ້ຽມຢາມ ແລະ ທ່ອງທ່ຽວລາວ ເພື່ອຈະໄດ້ສຶກສາຄວາມເປັນໄປໄດ້ໃນການລົງທຶນ ແລະ ປີນີ້ ລາວໄດ້ເປີດເປັນປີທ່ອງທ່ຽວ 2018 ຕື່ມອີກ.

ວິດີໂອ: ກ່ຽວກັບນະໂຍບາຍ 3 ເປີດ