ຍີ່ປຸ່ນ ຈະເດີນໜ້າຟື້ນຟູກອງທັບຢ່າງເຕັມຮູບແບບອີກຄັ້ງ

(Photo by Kazuhiro NOGI / AFP)
(Photo by Kazuhiro NOGI / AFP)

ສຳນັກຂ່າວຕ່າງປະເທດລາຍງານເມື່ອວັນທີ 14 ຕຸລາ 2018 ທີ່ຜ່ານມາວ່າ: ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ກ່າວຕໍ່ໜ້າທະຫານປະມານ 4,000 ຄົນ ໃນລະຫວ່າງພິທີສວນສະໜາມ ເນື່ອງໃນວັນສະຖາປະນາກອງກຳລັງປ້ອງກັນຕົນເອງຍີ່ປຸ່ນ ທີ່ຄ່າຍທະຫານອາຊາກະ ແຂວງໄຊຕາມະ ເມື່ອວັນອາທິດ ທີ່ຜ່ານມາວ່າ: ການແກ້ໄຂບາງມາດຕາໃນລັດຖະທຳມະນູນເປັນສິ່ງທີ່ຈຳເປັນ ເພື່ອໃຫ້ທະຫານເກີດຄວາມຮູ້ສຶກພາກພູມໃຈ “ຂ້າພະເຈົ້າໄດ້ຮັບຄວາມໄວວາງໃຈຈາກປະຊາຊົນ ຂະນະນີ້ເຖິງເວລາແລ້ວທີ່ຈະບັນລຸຄວາມຮັບຜິດຊອບໃນຖານະນັກການເມືອງ ດ້ວຍການເຮັດໃຫ້ກອງກຳລັງປ້ອງກັນຕົນເອງ ປະຕິບັດໜ້າທີ່ໃຫ້ລຸລ່ວງດ້ວຍຄວາມຮູ້ສຶກພາກພູມໃຈ”, ພິທີສວນສະໜາມດັ່ງກ່າວມີລົດຕັງ ແລະ ພະພາຫະນະກອງທັບອື່ນໆປະມານ 260 ຄັນ ແລະ ຍົນຮົບ 40 ລຳເຂົ້າຮ່ວມ.

(Photo by Kazuhiro NOGI / AFP)

ເຊິ່ງທ່ານ ຊິນໂຊ ອາເບະ ໄດ້ຮັບເລືອກຕັ້ງເປັນຜູ້ນຳພັກເສລີປະຊາທິປະໄຕ ອີກຄັ້ງເມື່ອເດືອນທີ່ຜ່ານມາ ແລະ ຈາກການທີ່ເຫຼືອເວລາອີກ 3 ປີ ໃນຕຳແໜ່ງຜູ້ນຳຍີ່ປຸ່ນ ທ່ານ ຊິນໂຊ ອາເບະ ມີຄວາມມຸ່ງໝັ້ນທີ່ຈະສານຕໍ່ຄວາມພະຍາຍາມແກ້ໄຂລັດຖະທຳມະນູນທີ່ຕົວທ່ານໄດ້ຊຸກດັນມາເປັນເວລານານແລ້ວ.

ປະຊາຊົນຍີ່ປຸ່ນສາຍອະນຸລັກນິຍົມຈຳນວນຫຼາຍຕີລາຄາວ່າ ລັດຖະທຳມະນູນຂອງຍີ່ປຸ່ນທີ່ສະຫະລັດ ອາເມຣິກາເປັນຜູ້ຮ່າງໃຫ້ ເຮັດໃຫ້ຍີ່ປຸ່ນເສື່ອມເສຍກຽດ ພາຍຫຼັງແພ້ສົງຄາມໂລກຄັ້ງທີ 2.

ເມື່ອກອງກຳລັງປ້ອງກັນຕົນເອງຍີ່ປຸ່ນ ສ້າງຕັ້ງຂຶ້ນເມື່ອປີ 1954 ໃນເບື້ອງຕົ້ນຄວາມຄິດເຫັນຂອງສາທາລະນະຕໍ່ບົດບາດຂອງກອງກຳລັງປ້ອງກັນຕົນເອງຍີ່ປຸ່ນ ແບ່ງອອກເປັນ 2 ຝ່າຍ ແຕ່ທຸກວັນນີ້ກອງກຳລັງປ້ອງກັນຕົນເອງດ້ຮັບການສະໜັບສະໜູນຫຼາຍຂຶ້ນ ຈາກການສົ່ງທະຫານບໍ່ຕິດອາວຸດ ເຂົ້າຮ່ວມພາລະກິດຮັກສາສັນຕິພາບ ແລະ ການບັນເທົາໄພພິບັດໃນຕ່າງປະເທດ.

ທ່ານ ຊິນໂຊ ອາເບະ ຕ້ອງການແກ້ໄຂເພີ່ມເຕີມ ມາດຕາ 9 ຂອງລັດຖະທຳມະນູນ ທີ່ກຳນົດຫ້າມຍີ່ປຸ່ນໃຊ້ກຳລັງ ໃນການແກ້ໄຂກໍລະນີຄວາມຂັດແຍ່ງລະຫວ່າງປະເທດ ທ່ານຕ້ອງການໃຫ້ຮຽກກອງກຳລັງປ້ອງກັນຕົນເອງຍີ່ປຸ່ນວ່າ “ກອງທັບ” ຢ່າງຊັດເຈນ.

(Photo by Kazuhiro NOGI / AFP)
(Photo by Kazuhiro NOGI / AFP)
(Photo by Kazuhiro NOGI / AFP)