ລັດຖະບານພ້ອມສົ່ງເສີມການໃຊ້ສື່ສັງຄົມອອນລາຍ ໃຫ້ເກີດຜົນປະໂຫຍດສູງສຸດ ຕໍ່ເສດຖະກິດ-ສັງຄົມ

ພາບ: ປະກອບຂ່າວ (Photo by Kirill KUDRYAVTSEV / AFP)

ຈາກຜົນກອງປະຊຸມລັດຖະບານສະໄໝສາມັນ ປະຈຳເດືອນ ຕຸລາ 2018 ທີ່ໄດ້ໄຂຂຶ້ນເມື່ອວັນທີ 18-19 ຕຸລາ ທີ່ຜ່ານມາ ຢູ່ທີ່ສຳນັກງານນາຍົກລັດຖະມົນຕີ,​ ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ໂດຍມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານເຂົ້າຮ່ວມຢ່າງພ້ອມພຽງ.

ເຊິ່ງໃນກອງປະຊຸມໄດ້ພ້ອມກັນສຸມໃສ່ພິຈາລະນາຫຼາຍບັນຫາທັງໃນດ້ານເສດຖະກິດ ແລະ ສັງຄົມລະດັບຊາດ ໂດຍໜຶ່ງໃນບັນຫາທີ່ໜ້າສົນໃຈຄື: ສະພາບການຄຸ້ມຄອງການນຳໃຊ້ອິນເຕີເນັດ ແລະ ສື່ສັງຄົມອອນລາຍ.

ກ່ຽວກັບບົດລາຍງານສະພາບການຄຸ້ມຄອງການນຳໃຊ້ອິນເຕີເນັດ ແລະ ສື່ສັງຄົມອອນລາຍ, ປັດຈຸບັນການພັດທະນາ, ການຄຸ້ມຄອງ ແລະ ການນຳໃຊ້ເຕັກໂນໂລຊີການສື່ສານຂໍ້ມູນຂ່າວສານ ໄດ້ສົ່ງກະທົບຢ່າງໃຫຍ່ຫຼວງທັງໃນດ້ານບວກ ແລະ ດ້ານລົບຕໍ່ການພັດທະນາເສດຖະກິດ-ສັງຄົມຂອງ ສປປ.ລາວ, ກອງປະຊຸມໄດ້ເຫັນດີຕໍ່ບົດລາຍງານຂອງຂະແໜງການ ແລະ ຊີ້ນຳໃຫ້ພາກສ່ວນທີ່ກ່ຽວຂ້ອງນຳໄປຄົ້ນຄວ້າ, ຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດການຄຸ້ມຄອງການນຳໃຊ້ອິນເຕີເນັດ ແລະ ສື່ສັງຄົມອອນລາຍ ໃຫ້ເກີດປະໂຫຍດສູງສຸດ ຕໍ່ການພັດທະນາເສດຖະກິດ-ສັງຄົມ.